સિરાજ – બુમરાહની વેધક બોલિંગ,કેએલ રાહુલની ફિફ્ટી સાથે ભારતનું પહેલા દિવસે જ વેસ્ટ ઈન્ડિઝ પર પ્રભુત્વ

અમદાવાદ ટેસ્ટ દિવસ 1: ભારત સામેની પ્રથમ ટેસ્ટ મેચના પહેલા દિવસે વેસ્ટ ઈન્ડિઝ ફક્ત 162 રનમાં ઓલઆઉટ થઈ ગયું હતું. કેએલ રાહુલની ફિફ્ટીએ ભારતને વેસ્ટ ઈન્ડિઝ પર દબાણ બનાવવામાં મદદ કરી

અમદાવાદ

વેસ્ટ ઈન્ડિઝ સામેની પ્રથમ ટેસ્ટ મેચના પહેલા દિવસે ભારતીય ટીમનું વર્ચસ્વ રહ્યું. વેસ્ટ ઈન્ડિઝે નરેન્દ્ર મોદી સ્ટેડિયમ ખાતે ટોસ જીતીને પહેલા બેટિંગ કરવાનો નિર્ણય લીધો. મોહમ્મદ સિરાજ અને જસપ્રીત બુમરાહની ઘાતક બોલિંગને કારણે પ્રવાસી ટીમનો દાવ 45મી ઓવરમાં ફક્ત 162 રનમાં સમેટાઈ ગયો. કેએલ રાહુલ અને યશસ્વી જયસ્વાલે ભારતીય ટીમને મજબૂત શરૂઆત અપાવી. રમતના અંતે ભારતે 2 વિકેટે 121 રન બનાવ્યા હતા. વેસ્ટ ઈન્ડિઝ 41 રનથી આગળ હતું, પરંતુ ભારતની 8 વિકેટ બાકી છે.

કેએલ રાહુલે ફિફ્ટી ફટકારી
કેએલ રાહુલ અને યશસ્વી જયસ્વાલે ભારતીય ટીમને મજબૂત શરૂઆત અપાવી. વરસાદને કારણે ત્રીજા સત્રમાં રમત થોડીવાર માટે રોકાઈ ગઈ હતી. વિરામ પહેલા, યશસ્વી 35 બોલમાં 4 રન બનાવીને બેટિંગ કરી રહ્યો હતો. વરસાદ બંધ થયા પછી તેણે ફરીથી હુમલો શરૂ કર્યો, 15મી ઓવરમાં જસ્ટિન ગ્રીવ્ઝની બોલ પર ત્રણ ચોગ્ગા ફટકાર્યા. આ દરમિયાન, રાહુલ અને યશસ્વીએ અડધી સદીની ભાગીદારી પૂર્ણ કરી. 54 બોલમાં 36 રન બનાવ્યા પછી, યશસ્વી જેડેન સિલ્સનો શિકાર બન્યો. તેણે રાહુલ સાથે 68 રન ઉમેર્યા.

સાઈ સુદર્શન નિષ્ફળ ગયો અને રોસ્ટન ચેઝ દ્વારા માત્ર 7 રનમાં આઉટ થયો. ત્યારબાદ કેએલ રાહુલ સાથે કેપ્ટન શુભમન ગિલ જોડાયો. તેણે 101 બોલમાં પોતાની 19મી ટેસ્ટ ફિફ્ટી પૂર્ણ કરી. સ્ટમ્પ સમયે, રાહુલ 53 રને હતો, જ્યારે કેપ્ટન ગિલ 18 રને રમતમાં હતો.

વેસ્ટ ઈન્ડિઝની બેટિંગ સંપૂર્ણપણે નિષ્ફળ ગઈ
ઓસ્ટ્રેલિયા સામેની ઘરઆંગણે ટેસ્ટ શ્રેણીમાં શરમજનક હારનો સામનો કરનાર વેસ્ટ ઈન્ડિઝે અમદાવાદમાં પોતાનું ખરાબ ફોર્મ ચાલુ રાખ્યું. ટીમના કોઈપણ બેટ્સમેન ક્રીઝ પર રહેવાની હિંમત બતાવી શક્યા નહીં. ઓપનર તગનરાજન ચંદ્રપોલ ખાતું ખોલ્યા વિના આઉટ થયો. વેસ્ટ ઈન્ડિઝે નિયમિત અંતરાલે વિકેટ ગુમાવી. જસ્ટિન ગ્રીવ્સે ૩૨, શાઈ હોપે ૨૬ અને કેપ્ટન રોસ્ટન ચેઝે ૨૪ રન બનાવ્યા.

ભારત માટે, જસપ્રીત બુમરાહ અને મોહમ્મદ સિરાજની જોડી વેસ્ટ ઈન્ડિઝના બેટ્સમેન માટે ઘાતક સાબિત થઈ. ઇનિંગ્સની શરૂઆતમાં સિરાજ બુમરાહ કરતા પણ વધુ અસરકારક રહ્યો. સિરાજે ૧૪ ઓવરમાં ૪૦ રન આપીને ૪ વિકેટ લીધી. જસપ્રીત બુમરાહએ ૧૪ ઓવરમાં ૪૨ રન આપીને ૩ વિકેટ લીધી. કુલદીપ યાદવે ૬.૧ ઓવરમાં ૨૫ રન આપીને ૨ વિકેટ લીધી. વોશિંગ્ટન સુંદરને પણ એક વિકેટ મળી.