ગુજરાતે પ્રથમ દાવમાં 534/9 રન બનાવી દાવ ડિકલેર કર્યો; કેરળ પ્રથમ દાવમાં 279 અને ફોલોઓન બાદ બીજા દાવમાં 191 રનમાં ઓલઆઉટ, ઉર્વિલ પટેલ બન્યો પ્લેયર ઓફ ધ મેચ
અમદાવાદ
ગુજરાતની ક્રિકેટ ટીમે કેરળ સામેની ચાર દિવસીય ક્રિકેટ મેચમાં શાનદાર પ્રદર્શન કરીને એક ઇનિંગ્સ અને 64 રનથી ભવ્ય વિજય મેળવ્યો છે. ગુજરાતની જીતમાં વિકેટકીપર બેટર ઉર્વિલ પટેલનું વિશેષ યોગદાન રહ્યું હતું. તેણે પ્રથમ દાવમાં અણનમ 210 રનની યાદગાર ઇનિંગ્સ રમીને ટીમને મજબૂત સ્થિતિમાં પહોંચાડી હતી. તેના આ શાનદાર પ્રદર્શન બદલ તેને પ્લેયર ઓફ ધ મેચ જાહેર કરવામાં આવ્યો હતો.
ગુજરાતે પ્રથમ દાવમાં 144.2 ઓવરમાં નવ વિકેટ ગુમાવીને 534 રન બનાવી દાવ ડિકલેર કર્યો હતો. તેના જવાબમાં કેરળની ટીમ પ્રથમ દાવમાં 88.2 ઓવરમાં 279 રનમાં ઓલઆઉટ થઈ ગઈ હતી. આમ ગુજરાતને પ્રથમ દાવના આધારે 255 રનની વિશાળ સરસાઈ મળી હતી. ત્યારબાદ કેરળને ફોલોઓન આપતાં બીજા દાવમાં પણ ગુજરાતના બોલરોએ પ્રભુત્વ જાળવી રાખ્યું હતું. કેરળની ટીમ બીજી ઇનિંગ્સમાં 88 ઓવરમાં 191 રન જ બનાવી શકી હતી.
ઉર્વિલ પટેલની બેવડી સદીથી ગુજરાતનો વિશાળ સ્કોર
ગુજરાતની પ્રથમ ઇનિંગ્સમાં ઉર્વિલ પટેલે બેટિંગની જવાબદારી સંભાળીને 227 બોલમાં અણનમ 210 રન ફટકાર્યા હતા. તેની ઇનિંગ્સમાં 17 ચોગ્ગા અને છ છગ્ગાનો સમાવેશ થયો હતો. ઉર્વિલે 92.51ના સ્ટ્રાઇક રેટથી બેટિંગ કરીને કેરળના બોલરો સામે દબદબો જમાવ્યો હતો.
તેને અન્ય બેટરોનો પણ સારો સહયોગ મળ્યો હતો. આર્ય દેસાઈએ 132 બોલમાં 95 રન બનાવ્યા હતા, જ્યારે વિશાલ જયસ્વાલે 120 બોલમાં 77 રનનું યોગદાન આપ્યું હતું. અભિષેક દેસાઈએ 42, અમિત દેસાઈએ 36 અને મનન હિંગરાજિયાએ 33 રન બનાવ્યા હતા. કેરળ તરફથી નેડુમંકુઝી બેસિલે ત્રણ વિકેટ ઝડપી હતી, જ્યારે આદિત્ય સરવટેએ બે વિકેટ મેળવી હતી.
પ્રથમ દાવમાં કેરળ 279 રનમાં સમેટાયું
534 રનના જવાબમાં ઉતરેલી કેરળની ટીમ ગુજરાતના બોલરો સામે સંઘર્ષ કરતી જોવા મળી હતી. જોકે કેપ્ટન વિષ્ણુ વિનોદે 65 બોલમાં 66 રન અને આદિત્ય સરવટેએ 116 બોલમાં 58 રન બનાવી પ્રતિકાર કર્યો હતો. મોહમ્મદ અઝહરુદ્દીને 57 રન અને સચિન બેબીએ 42 રન બનાવ્યા હતા. તેમ છતાં કેરળની આખી ટીમ 279 રનમાં સમેટાઈ ગઈ હતી.
ગુજરાત તરફથી અર્જન નાગવાસવાલાએ ચાર વિકેટ ઝડપી હતી, જ્યારે ચિંતન ગાજાએ ત્રણ અને સિદ્ધાર્થ દેસાઈએ બે વિકેટ મેળવી હતી.
બીજી ઇનિંગ્સમાં પણ ગુજરાતના બોલરોનો દબદબો
255 રનની સરસાઈ બાદ ફોલોઓન રમવા ઉતરેલી કેરળની ટીમ બીજી ઇનિંગ્સમાં પણ મોટો સ્કોર કરવામાં નિષ્ફળ રહી હતી. સચિન બેબીએ 182 બોલમાં 52 રન બનાવી લાંબો સંઘર્ષ કર્યો હતો. વિષ્ણુ વિનોદે 39 અને અભિષેક નાયરે 29 રન બનાવ્યા હતા. જોકે અન્ય બેટરો લાંબી ઇનિંગ્સ રમી શક્યા નહોતા અને કેરળની ટીમ 191 રનમાં ઓલઆઉટ થઈ ગઈ હતી.
ગુજરાત તરફથી અર્જન નાગવાસવાલાએ બીજી ઇનિંગ્સમાં પણ ચાર વિકેટ ઝડપી હતી. સિદ્ધાર્થ દેસાઈએ બે વિકેટ મેળવી હતી, જ્યારે ચિંતન ગાજા, વિશાલ જયસ્વાલ અને અમિત દેસાઈએ એક-એક વિકેટ ઝડપી હતી.
આમ ગુજરાતે બેટિંગ અને બોલિંગ બંને વિભાગમાં પ્રભાવશાળી પ્રદર્શન કરીને કેરળ સામે એક ઇનિંગ્સ અને 64 રનથી વિજય નોંધાવ્યો હતો. ઉર્વિલ પટેલની અણનમ બેવડી સદી અને અર્જન નાગવાસવાલાની બંને ઇનિંગ્સમાં મળીને આઠ વિકેટ ગુજરાતની જીતનાં મુખ્ય પરિબળ બન્યાં હતાં.
