મધ્યપ્રદેશના ઇન્દોરમાં એક મંદિરમાં થયેલી ચોરીનો વીડિયો સોશિયલ મીડિયા પર સતત વાયરલ થઈ રહ્યો છે. તેમાં એક ચોર મંદિરમાં પ્રવેશ કરતો, દાનપેટી તોડીને પૈસા કાઢતો દેખાય છે. પોલીસે CCTV ફૂટેજના આધારે આરોપી ગણેશ કાલદાતેની ધરપકડ કરી છે
ઇન્દોર
ઇન્દોરના વિઝન નગર પોલીસ સ્ટેશન વિસ્તારમાં આવેલા મેઘદૂત નગરમાં સ્થિત એક શિવ મંદિરની દાનપેટીમાંથી પૈસા ચોરીની ઘટના પ્રકાશમાં આવી છે. આ સમગ્ર ઘટના CCTV કેમેરામાં રેકોર્ડ થઈ ગઈ છે. ચોર મંદિરમાં પ્રવેશ કરે છે, હાથ જોડીને આસપાસ જુએ છે, પછી દાનપેટી તોડીને પૈસા કાઢવાનો પ્રયાસ કરે છે. પરંતુ જ્યારે તે કોઈને નજીક આવતા સાંભળે છે, ત્યારે તે બહાર જોવા જાય છે. જ્યારે તે કોઈને જોતો નથી, ત્યારે તે પાછો અંદર જાય છે, દાનપેટીમાં હાથ નાખે છે, મુઠ્ઠીભર પૈસા કાઢે છે, ખિસ્સામાં મૂકે છે અને ત્યાંથી નીકળી જાય છે.
આ ઘટના અંગે પોલીસ ફરિયાદ દાખલ કરવામાં આવી હતી. સીસીટીવી ફૂટેજના આધારે, આરોપી, રામનગર ભામોરીના રહેવાસી ગણેશ કાલદાતેની ધરપકડ કરવામાં આવી છે. અહેવાલો અનુસાર, આરોપીને મંદિરની અંદર સીસીટીવી કેમેરા લાગેલા હોવાની ખબર નહોતી. કેમેરા ઉપર લગાવેલો હોઈ ચોરને તેની ખબર પડી નહતી. આ ઘટના બાદ, આ વીડિયો સોશિયલ મીડિયા પર વાયરલ થઈ રહ્યો છે.
આ ઘટના વિસ્તારના રહેવાસીઓમાં ચર્ચાનો વિષય બની ગઈ છે, જેઓ કહી રહ્યા છે કે ચોર હવે ભગવાનના મંદિરોને પણ ટાર્ગેટ કરી રહ્યા છે. આ ઘટનાના પગલે નજીકના મંદિરોમાં પૂજારીઓ અને ભક્તો આ ઘટના પ્રત્યે વધુને વધુ સતર્ક બન્યા છે.
