15 વર્ષની ઉંમરે ઓરેન્જ કેપ જીતનાર યુવા બેટ્સમેન માટે ભારતીય ટીમના દરવાજા ખુલવાના સંકેત
એસવીએન,મુંબઈ:
IPL 2026માં પોતાના વિસ્ફોટક પ્રદર્શનથી સમગ્ર ક્રિકેટ જગતનું ધ્યાન ખેંચનાર 15 વર્ષીય વૈભવ સૂર્યવંશી હવે ટીમ ઈન્ડિયામાં સ્થાન મેળવવાના દાવેદારોમાં સામેલ થઈ ગયો છે. સૌથી નાની ઉંમરે ઓરેન્જ કેપ જીતનાર આ યુવા બેટ્સમેનને ભારતીય ટીમમાં તક આપવાની માંગ જોર પકડી રહી છે. આ દરમિયાન ભારતીય ક્રિકેટ કંટ્રોલ બોર્ડ (BCCI) તરફથી પણ તેના ભવિષ્યને લઈને સકારાત્મક સંકેતો મળ્યા છે.
IPL 2026નો સૌથી ચર્ચિત ખેલાડી
રાજસ્થાન રોયલ્સ માટે રમતા વૈભવ સૂર્યવંશીએ IPL 2026માં બેટિંગનો એવો ધમાકો કર્યો કે તે સમગ્ર ટૂર્નામેન્ટનો સૌથી ચર્ચિત ખેલાડી બની ગયો. માત્ર રન બનાવવામાં જ નહીં, પરંતુ ઓરેન્જ કેપ, ઇમર્જિંગ પ્લેયર ઓફ ધ સિઝન, મોસ્ટ વેલ્યુએબલ પ્લેયર અને સર્વોચ્ચ સ્ટ્રાઈક રેટ જેવા પ્રતિષ્ઠિત એવોર્ડ્સ પણ તેણે પોતાના નામે કર્યા.
BCCIએ વ્યક્ત કર્યો વિશ્વાસ, ટીમ ઈન્ડિયામાં તકના સંકેત
IPL 2026ની ફાઇનલ બાદ મીડિયા સાથે વાતચીત દરમિયાન BCCI સચિવ દેવજીત સાઇકિયાએ વૈભવના પ્રદર્શનની પ્રશંસા કરી હતી. તેમણે જણાવ્યું હતું કે વૈભવ એક અસાધારણ પ્રતિભા ધરાવતો ખેલાડી છે અને તેનું ભવિષ્ય અત્યંત ઉજ્જવળ છે. BCCI તેની પ્રતિભાને વધુ નીખારવા અને તેને ક્રિકેટના સર્વોચ્ચ સ્તર સુધી પહોંચાડવા માટે તમામ જરૂરી પ્રયાસો કરશે. આ નિવેદન બાદ વૈભવને ટૂંક સમયમાં ભારતીય ટીમમાં તક મળી શકે તેવી ચર્ચાઓ વધુ તેજ બની છે.
IPL 2026માં રેકોર્ડબ્રેક બેટિંગ
વૈભવે IPL 2026માં રાજસ્થાન રોયલ્સ તરફથી 16 ઇનિંગ્સમાં 776 રન ફટકાર્યા હતા. તેની સરેરાશ 48.50 અને સ્ટ્રાઈક રેટ 237.30 રહ્યો હતો. સમગ્ર સિઝન દરમિયાન તેણે એક સદી અને પાંચ અડધી સદી નોંધાવી હતી. તેના બેટમાંથી 63 ચોગ્ગા અને 72 છગ્ગા નીકળ્યા હતા.
આ પ્રદર્શન સાથે વૈભવ IPLના ઇતિહાસમાં સૌથી ઓછી ઉંમરે ઓરેન્જ કેપ જીતનાર બેટ્સમેન બન્યો હતો. ઉપરાંત, તેણે કોઈપણ ટી20 ટૂર્નામેન્ટમાં સૌથી વધુ છગ્ગા ફટકારવાનો વિશ્વવિક્રમ પણ પોતાના નામે નોંધાવ્યો હતો.
આગામી પડાવ: ઈન્ડિયા-A ટીમ
IPL પૂર્ણ થયા બાદ વૈભવનું આગામી લક્ષ્ય ઈન્ડિયા-A ટીમ સાથેનું પ્રદર્શન રહેશે. તે 9 જૂનથી શરૂ થનારી શ્રીલંકા ટ્રાય સિરીઝમાં ભારતીય ટીમનો ભાગ બનશે. ક્રિકેટ નિષ્ણાતોનું માનવું છે કે જો તે આ જ લય જાળવી રાખશે તો આયર્લેન્ડ અથવા ઝિમ્બાબ્વે પ્રવાસ માટેની સિનિયર ભારતીય ટીમમાં પણ તેને તક મળી શકે છે.
આ ઉપરાંત, વૈભવને એશિયન ગેમ્સ 2026 માટે પણ શોર્ટલિસ્ટ કરવામાં આવ્યો હોવાનું માનવામાં આવે છે. તે અગાઉ ભારતની અંડર-19 વર્લ્ડ કપ ટીમ અને ઇમર્જિંગ ટીમ્સ એશિયા કપમાં પણ દેશનું પ્રતિનિધિત્વ કરી ચૂક્યો છે.
ટેસ્ટ ક્રિકેટ રમવાનું છે સૌથી મોટું સપનું
IPL 2026ની ફાઇનલ બાદ વૈભવે પોતાના ભવિષ્યના લક્ષ્ય વિશે પણ ખુલાસો કર્યો હતો. તેણે જણાવ્યું હતું કે ભારત માટે ટેસ્ટ ક્રિકેટ રમવું તેનું સૌથી મોટું સપનું છે અને તે આ દિશામાં તૈયારી પણ કરી રહ્યો છે. જોકે, તેના મતે હજુ સુધી તેને લાંબા ફોર્મેટમાં પોતાની ક્ષમતા સાબિત કરવાની પૂરતી તક મળી નથી.
IPLમાં રેકોર્ડબ્રેક પ્રદર્શન, BCCIનો વિશ્વાસ અને સતત મળી રહેલી નવી તકો એ સંકેત આપે છે કે ભારતીય ક્રિકેટને ભવિષ્યનો એક મોટો સ્ટાર મળી ગયો છે. હવે ક્રિકેટપ્રેમીઓની નજર એ વાત પર ટકેલી રહેશે કે વૈભવ સૂર્યવંશી ક્યારે અને કયા પ્રવાસે ટીમ ઈન્ડિયાની સિનિયર જર્સીમાં મેદાન પર ઉતરે છે.
