વીર સાવરકર સ્પોર્ટ્સ કોમ્પ્લેક્સ ખાતે રમતગમત રાજ્યમંત્રી ડૉ. જયરામ ગામીતે શુભારંભ કરાવ્યો; એશિયન અને કોમનવેલ્થ ગેમ્સ માટે ક્વોલિફિકેશનનું મહત્વપૂર્ણ મંચ
અમદાવાદ:
ગુજરાત રમતગમત ક્ષેત્રે સતત નવી સિદ્ધિઓ હાંસલ કરી રહ્યું છે ત્યારે અમદાવાદના વીર સાવરકર સ્પોર્ટ્સ કોમ્પ્લેક્સ ખાતે 79મી સિનિયર નેશનલ એક્વેટિક ચેમ્પિયનશિપ-2026નો ભવ્ય પ્રારંભ થયો છે. રમતગમત રાજ્યમંત્રી ડૉ. જયરામ ગામીતની ઉપસ્થિતિમાં યોજાયેલા ઉદ્ઘાટન સમારોહમાં દેશભરના ખેલાડીઓ, રમતગમત અધિકારીઓ અને મહાનુભાવોએ ભાગ લીધો હતો.
ઓલિમ્પિક સ્તરના ખેલાડીઓ તૈયાર કરવાનો મંચ
ઉદ્ઘાટન પ્રસંગે રમતગમત રાજ્યમંત્રી ડૉ. જયરામ ગામીતે જણાવ્યું હતું કે તરવું માત્ર રમત જ નહીં પરંતુ જીવન બચાવનારી મહત્વપૂર્ણ કળા પણ છે. તેમણે માના પટેલ, વેદાંત માધવન, સાજન પ્રકાશ અને વિશ્વવિખ્યાત તરવૈયા માઈકલ ફેલ્પ્સ જેવા ખેલાડીઓના ઉદાહરણો આપતાં કહ્યું હતું કે આવી રાષ્ટ્રીય સ્પર્ધાઓ ભવિષ્યમાં ભારતને ઓલિમ્પિક સ્તરના ચેમ્પિયન ખેલાડીઓ આપી શકે છે.
370 તૈરાકો વચ્ચે થશે જોરદાર મુકાબલો
સ્વિમિંગ ફેડરેશન ઓફ ઇન્ડિયા (SFI)ના નેજા હેઠળ યોજાતી આ છ દિવસીય ચેમ્પિયનશિપ 21 જૂન સુધી ચાલશે. દેશના 32 રાજ્યો, કેન્દ્રશાસિત પ્રદેશો અને વિવિધ સ્પોર્ટ્સ પ્રમોશન સંસ્થાઓમાંથી કુલ 370 પ્રતિભાશાળી તૈરાકો આ સ્પર્ધામાં ભાગ લઈ રહ્યા છે. પુરુષ અને મહિલા વર્ગની કુલ 42 સ્પર્ધાત્મક ઇવેન્ટ્સનું આયોજન કરવામાં આવ્યું છે.
એશિયન અને કોમનવેલ્થ ગેમ્સ માટે મહત્વપૂર્ણ તક
આ ચેમ્પિયનશિપ આગામી એશિયન ગેમ્સ અને કોમનવેલ્થ ગેમ્સ માટે ક્વોલિફિકેશન ઇવેન્ટ તરીકે પણ મહત્વ ધરાવે છે. ખેલાડીઓ માટે આંતરરાષ્ટ્રીય સ્પર્ધાઓમાં સ્થાન મેળવવા માટે આ એક મહત્વપૂર્ણ મંચ સાબિત થશે.
પ્રથમ દિવસે જ જોવા મળ્યો રોમાંચ
સ્પર્ધાના પ્રથમ દિવસે 400 મીટર ફ્રીસ્ટાઇલ, 100 મીટર બ્રેસ્ટસ્ટ્રોક અને વિવિધ રિલે રેસમાં દેશના જાણીતા ઓલિમ્પિયન ખેલાડીઓએ ઉત્કૃષ્ટ દેખાવ કર્યો હતો. ખેલાડીઓના પ્રદર્શનથી દર્શકોમાં ભારે ઉત્સાહ જોવા મળ્યો હતો.
મહાનુભાવો ઉપસ્થિત રહ્યા
ઉદ્ઘાટન સમારોહમાં સ્વિમિંગ ફેડરેશન ઓફ ઇન્ડિયાના પ્રમુખ આર. એમ. જયપ્રકાશ, ગોવાના મંત્રી દિગંબર કામત, વિરેન્દ્ર નાણાવટી, મોનલ ડી. ચોક્સી, ઉર્વશી દેવી તેમજ ચિંતન પટેલ સહિત અનેક આગેવાનો અને રમતપ્રેમીઓ ઉપસ્થિત રહ્યા હતા.
