રાજુલા નજીક સર્જાયેલી દુર્ઘટનાએ સમગ્ર પંથકને હચમચાવ્યું; બે કલાકની જહેમત બાદ આગ પર કાબૂ
અમરેલી
અમરેલી જિલ્લાના રાજુલા તાલુકામાં આવેલા ધાતરવડી બ્રિજ પર શનિવારે એક ભયાનક અકસ્માત સર્જાયો હતો. બ્રિજ પરથી પસાર થઈ રહેલો ટ્રક અચાનક અનિયંત્રિત બની નીચે ખાબક્યો હતો. અકસ્માત બાદ ટ્રકમાં ભીષણ આગ ફાટી નીકળતાં ટ્રક ચાલક કેબિનમાં જ ફસાઈ ગયો હતો અને જીવતો ભૂંજાઈ જતાં તેનું કરુણ મોત નીપજ્યું હતું. ઘટનાએ સમગ્ર વિસ્તારમાં ચકચાર મચાવી દીધી હતી.
બ્રિજ પરથી નીચે ખાબક્યો ટ્રક
પ્રાપ્ત માહિતી અનુસાર, રાજુલાના ધાતરવડી બ્રિજ પરથી પસાર થઈ રહેલો ટ્રક કોઈ કારણસર ચાલકના કાબૂ બહાર ગયો હતો. ટ્રકે બ્રિજની રેલિંગ તોડી સીધો નીચે પટકાયો હતો. અકસ્માત એટલો ગંભીર હતો કે નીચે પડતાં જ ટ્રકમાં આગ ભભૂકી ઊઠી હતી. પ્રાથમિક અનુમાન મુજબ ટ્રકની ઓઇલ ટેન્ક અથવા એન્જિનમાં થયેલા વિસ્ફોટને કારણે આગ ઝડપથી પ્રસરી ગઈ હતી.
ઘટનાસ્થળે દોડી પહોંચ્યું તંત્ર
અકસ્માત અને આગની ઘટનાને પગલે આસપાસના લોકો તાત્કાલિક ઘટનાસ્થળે એકત્ર થયા હતા. સ્થાનિકોએ તરત જ ઇમરજન્સી સેવાઓને જાણ કરતાં 112ની ટીમ તેમજ ફાયર વિભાગનો કાફલો સ્થળ પર દોડી આવ્યો હતો. ફાયર બ્રિગેડના જવાનોએ ભારે જહેમત ઉઠાવી સતત બે કલાક સુધી આગ બુઝાવવાની કામગીરી હાથ ધરી હતી.
ચાલકને બચાવવાની તક ન મળી
આગ એટલી વિકરાળ હતી કે ટ્રક ચાલકને કેબિનમાંથી બહાર નીકળવાનો કોઈ અવકાશ મળ્યો નહોતો. આગની જ્વાળાઓમાં ઘેરાઈ જતાં તેનું ઘટનાસ્થળે જ મોત નીપજ્યું હતું. આગ પર કાબૂ મેળવ્યા બાદ ટ્રકમાંથી ચાલકનો સળગી ગયેલો મૃતદેહ બહાર કાઢવામાં આવ્યો હતો.
મૃતકની ઓળખ, તપાસ શરૂ
પોલીસની પ્રાથમિક તપાસમાં મૃતકની ઓળખ અજય ભાલિયા તરીકે થઈ છે. મૃતદેહને પોસ્ટમોર્ટમ માટે રાજુલા સિવિલ હોસ્પિટલ ખાતે ખસેડવામાં આવ્યો છે. અકસ્માત પાછળનું ચોક્કસ કારણ હજુ સ્પષ્ટ થયું નથી. ચાલકને ઝોકું આવ્યું હતું, વાહનમાં યાંત્રિક ખામી સર્જાઈ હતી કે અન્ય કોઈ કારણ જવાબદાર હતું તે અંગે રાજુલા પોલીસે ગુનો નોંધી વધુ તપાસ શરૂ કરી છે.
