20 જુલાઈ સુધી પરિણામની શક્યતા; કાઉન્સેલિંગ પ્રક્રિયા થશે વધુ સરળ અને ઝડપી, 8થી 10 હજાર નવી MBBS બેઠકો ઉમેરાવાની સંભાવના
નવી દિલ્હી:
નેશનલ ટેસ્ટિંગ એજન્સી (NTA) ટૂંક સમયમાં NEET UG 2026 રી-એગ્ઝામનું પરિણામ જાહેર કરી શકે છે. અંદાજે 20 લાખથી વધુ ઉમેદવારો પરિણામની આતુરતાથી રાહ જોઈ રહ્યા છે. સૂત્રોના જણાવ્યા અનુસાર, 20 જુલાઈ 2026 સુધી પરિણામ જાહેર થવાની શક્યતા છે. પરિણામ બાદ દેશભરના મેડિકલ કોલેજોમાં પ્રવેશ માટેની કાઉન્સેલિંગ પ્રક્રિયા શરૂ કરવામાં આવશે.
કાઉન્સેલિંગ પ્રક્રિયા થશે વધુ સરળ
સૂત્રોના જણાવ્યા મુજબ તાજેતરમાં કેન્દ્રીય આરોગ્ય મંત્રાલય, શિક્ષણ મંત્રાલય, નેશનલ મેડિકલ કમિશન (NMC) અને મેડિકલ કાઉન્સેલિંગ કમિટી (MCC) વચ્ચે ઉચ્ચસ્તરીય બેઠક યોજાઈ હતી. તેમાં કાઉન્સેલિંગ પ્રક્રિયાને વધુ સરળ, પારદર્શક અને સમયબદ્ધ બનાવવાના મુદ્દે ચર્ચા કરવામાં આવી હતી.
આ વર્ષે NEET રી-એગ્ઝામને કારણે પ્રવેશ પ્રક્રિયામાં પહેલેથી જ વિલંબ થયો હોવાથી, નવા શૈક્ષણિક સત્રમાં વધુ મોડું ન થાય તે માટે કાઉન્સેલિંગ ઝડપથી પૂર્ણ કરવાની યોજના તૈયાર કરવામાં આવી રહી છે. પરિણામ જાહેર થતાં જ કાઉન્સેલિંગનું સંપૂર્ણ સમયપત્રક પણ જાહેર કરવામાં આવશે.
MBBS સીટ મેટ્રિક્સ ટૂંક સમયમાં જાહેર થશે
સૂત્રોના જણાવ્યા અનુસાર, 2026-27ના શૈક્ષણિક વર્ષ માટે MBBS સીટ મેટ્રિક્સ લગભગ તૈયાર થઈ ગઈ છે અને આગામી થોડા દિવસોમાં તેની સત્તાવાર જાહેરાત થઈ શકે છે. તેના આધારે દેશભરની તમામ મેડિકલ કોલેજોમાં ઉપલબ્ધ બેઠકોની વિગતો જાહેર થશે.
8થી 10 હજાર નવી MBBS બેઠકો ઉમેરાવાની સંભાવના
કેન્દ્ર સરકાર નવા શૈક્ષણિક વર્ષમાં MBBSની બેઠકોમાં 8,000થી 10,000નો વધારો કરવાની તૈયારીમાં છે. ગયા વર્ષે દેશમાં આશરે 1.29 લાખ MBBS બેઠકો ઉપલબ્ધ હતી, જ્યારે આ વર્ષે તે વધીને 1.40 લાખ સુધી પહોંચી શકે છે. બેઠકોમાં વધારાથી વધુ વિદ્યાર્થીઓને મેડિકલ અભ્યાસની તક મળશે અને પ્રવેશ પ્રક્રિયા પણ વધુ સુવ્યવસ્થિત બનશે.
NMC અને NTAની શું છે જવાબદારી?
NEET-UG એ NMC અધિનિયમ-2019ની કલમ 14 હેઠળ લેવામાં આવતી દેશવ્યાપી કોમન એન્ટ્રન્સ પરીક્ષા છે. નેશનલ મેડિકલ કમિશન (NMC) પરીક્ષાના નિયમો, લાયકાત, અભ્યાસક્રમ, પ્રવેશ માપદંડ અને કોમન કાઉન્સેલિંગની નીતિ નક્કી કરે છે, જ્યારે નેશનલ ટેસ્ટિંગ એજન્સી (NTA) પરીક્ષાના આયોજન અને સંચાલનની જવાબદારી સંભાળે છે.
પરિણામ જાહેર થયા બાદ લાખો વિદ્યાર્થીઓ માટે મેડિકલ પ્રવેશ પ્રક્રિયાનો માર્ગ ખુલશે અને વધતી MBBS બેઠકોને કારણે આ વર્ષે પ્રવેશની તકો અગાઉની સરખામણીએ વધુ અનુકૂળ બનવાની શક્યતા છે.
