વધતી વસતી અને ઉદ્યોગોને મળશે ગુણવત્તાયુક્ત વીજ પુરવઠો, 24 હજાર ચોરસ મીટર જમીન પર કામગીરી શરૂ
કામરેજ
કામરેજ વિધાનસભા ક્ષેત્રના ખોલવડ-ભાદા વિસ્તારમાં વધતી રહેણાંક વસાહતો અને ઔદ્યોગિક વિકાસને ધ્યાનમાં રાખીને રાજ્ય સરકારે વીજ માળખાને વધુ મજબૂત બનાવવાનો મહત્વપૂર્ણ નિર્ણય લીધો છે. પ્રિલીમીનરી ટી.પી. સ્કીમ નં. 47 હેઠળ રિઝર્વેશન નં. R-22 ખાતે 24 હજાર ચોરસ મીટર જમીન પર ગુજરાત એનર્જી ટ્રાન્સમિશન કોર્પોરેશન (GETCO) દ્વારા રૂ. 84 કરોડના ખર્ચે નવું સબ સ્ટેશન સ્થાપિત કરવામાં આવશે. રાજ્યના આરોગ્ય રાજ્ય મંત્રી પ્રફુલ પાનશેરીયાએ જણાવ્યું હતું કે, આગામી એક વર્ષમાં આ સબ સ્ટેશન કાર્યરત થતાં સમગ્ર વિસ્તારમાં અવિરત અને ગુણવત્તાયુક્ત વીજ પુરવઠો ઉપલબ્ધ થશે.
રાજ્ય સરકારનું આગોતરું આયોજન
મંત્રી પ્રફુલ પાનશેરીયાએ જણાવ્યું હતું કે ખોલવડ વિસ્તારમાં છેલ્લા કેટલાક વર્ષોમાં મોટા પાયે રહેણાંક વિકાસ થયો છે અને આગામી સમયમાં પણ આ વિસ્તાર ઝડપથી વિસ્તરવાનો છે. વધતી વીજ જરૂરિયાતને પહોંચી વળવા માટે GETCO દ્વારા રૂ. 84 કરોડની રકમ સુડા ખાતે જમા કરાવવામાં આવી છે. સાથે જ પ્રોજેક્ટ માટે જરૂરી 24 હજાર ચોરસ મીટર જમીનનો કબજો પણ મેળવી લેવામાં આવ્યો છે.
એક વર્ષમાં મળશે નવા સબ સ્ટેશનનો લાભ
આ સબ સ્ટેશન આગામી એક વર્ષમાં સંપૂર્ણ રીતે કાર્યરત થઈ જશે. તેના કારણે ખોલવડ, ભાદા અને આસપાસના વિસ્તારોમાં વીજ પુરવઠાની ક્ષમતામાં નોંધપાત્ર વધારો થશે. હાલની પરિસ્થિતિમાં આગામી એક-બે વર્ષમાં નવા વીજ જોડાણો આપવા માટે જરૂરી વીજ લોડ ઉપલબ્ધ ન રહેવાની શક્યતા હતી, પરંતુ રાજ્ય સરકારે સમયસર આયોજન કરીને આ સંભવિત સમસ્યાનો કાયમી ઉકેલ લાવવાનો પ્રયાસ કર્યો છે.
ભવિષ્યના વિકાસને મળશે પ્રોત્સાહન
રાજ્ય સરકાર માત્ર વર્તમાન જરૂરિયાતો પૂરતી જ નહીં, પરંતુ ભવિષ્યના વિકાસને પણ ધ્યાનમાં રાખીને આયોજન કરી રહી છે. ખોલવડ વિસ્તારમાં આગામી સમયમાં વધુ રહેણાંક યોજનાઓ અને ઔદ્યોગિક એકમો ઉભા થવાની સંભાવનાને ધ્યાનમાં રાખીને GETCO સાથે પરામર્શ કરીને વધુ એક 66 કે.વી. અથવા 220 કે.વી. ક્ષમતાનું સબ સ્ટેશન સ્થાપવાની સંભાવના પર પણ વિચારણા ચાલી રહી છે.
રહેવાસીઓ અને ઉદ્યોગોને મળશે સીધો લાભ
નવા સબ સ્ટેશનના નિર્માણથી વિસ્તારના રહેવાસીઓને નવા વીજ જોડાણો ઝડપથી મળી શકશે તેમજ ઉદ્યોગોને સ્થિર અને ગુણવત્તાયુક્ત વીજ પુરવઠો પ્રાપ્ત થશે. પરિણામે નવા રહેણાંક પ્રોજેક્ટો, વેપાર અને ઔદ્યોગિક રોકાણોને પણ પ્રોત્સાહન મળશે. વીજ પુરવઠાની વિશ્વસનીયતા વધતાં વિકાસની ગતિ વધુ તેજ બનવાની અપેક્ષા છે.
કામરેજ માટે અત્યાર સુધીનું સૌથી મોટું પાવર પ્લાનિંગ
મંત્રી પ્રફુલ પાનશેરીયાના જણાવ્યા અનુસાર, કામરેજ વિધાનસભા ક્ષેત્રના ખોલવડ વિસ્તારમાં હાથ ધરાયેલું આ અત્યાર સુધીનું સૌથી મોટું પાવર ઇન્ફ્રાસ્ટ્રક્ચર આયોજન છે. આ પ્રોજેક્ટ પૂર્ણ થયા બાદ માત્ર હાલના રહેવાસીઓને જ નહીં પરંતુ ભવિષ્યમાં વસનારા હજારો પરિવારો અને નવા ઉદ્યોગોને પણ લાંબા ગાળે ગુણવત્તાયુક્ત અને અવિરત વીજ પુરવઠાનો લાભ મળશે. રાજ્ય સરકારનું આ આગોતરું આયોજન વિસ્તારના સર્વાંગી વિકાસમાં મહત્વની ભૂમિકા ભજવશે.
