ઉંમર મર્યાદામાં છૂટછાટ, શારીરિક પરીક્ષા અને લેખિત પરીક્ષામાંથી પણ મુક્તિ; ગૃહ મંત્રાલયે Ex-Agniveer માટે અલગ વિંગની રચના કરી
નવી દિલ્હી
કેન્દ્ર સરકારે નિવૃત્ત અગ્નિવીરો (Ex-Agniveers) માટે કેન્દ્રીય સશસ્ત્ર પોલીસ દળો (CAPFs) અને આસામ રાઇફલ્સમાં ભરતી પ્રક્રિયામાં મહત્વપૂર્ણ રાહતોની જાહેરાત કરી છે. સરકારે કોન્સ્ટેબલ (જનરલ ડ્યૂટી) અને રાઇફલમેનની ભરતી માટે Ex-Agniveer નામની નવી શ્રેણી બનાવી છે, જેના હેઠળ તેમને અનામત સહિત અનેક વિશેષ લાભ આપવામાં આવશે.
50 ટકા જગ્યાઓ રહેશે અનામત
કેન્દ્ર સરકારના નિર્ણય મુજબ CAPFs અને આસામ રાઇફલ્સમાં કોન્સ્ટેબલ (GD) અને રાઇફલમેનની ભરતીમાં Ex-Agniveers માટે 50 ટકા જગ્યાઓ અનામત રાખવામાં આવશે. આ નિર્ણયથી અગ્નિપથ યોજના હેઠળ સેવા પૂર્ણ કરનારા યુવાનોને સુરક્ષા દળોમાં કારકિર્દી આગળ વધારવાની વધુ તક મળશે.
ઉંમર મર્યાદામાં વિશેષ છૂટછાટ
ભરતી માટે નિર્ધારિત મહત્તમ ઉંમર મર્યાદામાં Ex-Agniveersને ત્રણ વર્ષની છૂટછાટ આપવામાં આવશે. ઉપરાંત, અગ્નિવીરોની પ્રથમ બેચના ઉમેદવારોને નિર્ધારિત મહત્તમ ઉંમર મર્યાદા ઉપરાંત વધારાની પાંચ વર્ષની છૂટછાટ પણ મળશે.
ત્રણ પરીક્ષાઓમાંથી સંપૂર્ણ મુક્તિ
સરકારે Ex-Agniveersને ભરતી પ્રક્રિયામાં વધુ રાહત આપતાં તેમને ફિઝિકલ સ્ટાન્ડર્ડ ટેસ્ટ (PST), ફિઝિકલ એફિશિયન્સી ટેસ્ટ (PET) તેમજ લેખિત પરીક્ષામાંથી પણ મુક્તિ આપવાનો નિર્ણય કર્યો છે. આથી ભરતી પ્રક્રિયા વધુ સરળ અને ઝડપી બનશે.
Ex-Agniveer માટે અલગ વિંગની રચના
ગૃહ મંત્રાલયે નિવૃત્ત અગ્નિવીરોના પુનઃરોજગાર અને તેમના ભાવિ કારકિર્દી વિકાસ માટે સમર્પિત Ex-Agniveer વિંગની પણ રચના કરી છે. આ વિંગ વિવિધ વિભાગો સાથે સંકલન કરીને Ex-Agniveersને રોજગારી અને અન્ય તકો ઉપલબ્ધ કરાવવામાં સહાય કરશે.
લોકસભામાં સરકારે આપી માહિતી
ગૃહ મંત્રાલયમાં રાજ્યમંત્રી નિત્યાનંદ રાયએ લોકસભામાં એક પ્રશ્નના લેખિત જવાબમાં આ માહિતી આપી હતી. તેમણે જણાવ્યું કે હાલમાં અગ્નિવીરોની પ્રથમ બેચે હજી તેમની નિર્ધારિત સેવા અવધિ પૂર્ણ કરી નથી, પરંતુ તેમના ભાવિ પુનઃરોજગારને ધ્યાનમાં રાખીને સરકારે પહેલેથી જ આ વ્યવસ્થા અમલમાં મૂકી છે.
