ઇન્ફિસ્ટાર અને ફિનલેન્ડની આર્કિપ્લગનું સંયુક્ત સાહસ: ભારતમાં પ્રથમવાર મોડ્યુલર પ્લગ ફ્લો સીબીજી ટેક્નોલોજી

કચરામાંથી ક્લિન એનર્જી બનાવવા માટે ‘આર્કિસ્ટાર બાયોએનર્જી’ની શરૂઆત; ગાંધીનગરમાં રૂ. 50 કરોડના રોકાણ સાથે પાયલોટ પ્રોજેક્ટ સ્થપાશે

અમદાવાદ

ઇન્ફિસ્ટાર રિન્યૂએબલ્સ પ્રાઇવેટ લિમિટેડે ફિનલેન્ડની અગ્રણી કંપની આર્કિપ્લગ Oy સાથે એક મહત્વપૂર્ણ વ્યૂહાત્મક ભાગીદારી કરી છે. આ સહયોગ દ્વારા ભારતમાં પહેલીવાર અદ્યતન મોડ્યુલર પ્લગ ફ્લો કોમ્પ્રેસ્ડ બાયોગેસ (CBG) ટેક્નોલોજી રજૂ કરવામાં આવી રહી છે, જે દેશના રિન્યૂએબલ એનર્જી લક્ષ્યોને વેગ આપશે.

આર્કિસ્ટાર બાયોએનર્જી દ્વારા ટર્નકી સોલ્યુશન્સ

આ સંયુક્ત સાહસ અંતર્ગત સ્થાપિત ‘આર્કિસ્ટાર બાયોએનર્જી પ્રાઇવેટ લિમિટેડ’ દ્વારા ટર્નકી મેક-ઇન-ઇન્ડિયા મોડ્યુલર પ્લગ-ફ્લો સીબીજી પ્લાન્ટ્સ (<3 TPD) પૂરા પાડવામાં આવશે. આ પ્લાન્ટ્સ કૃષિ કચરો, મ્યુનિસિપલ સોલિડ વેસ્ટ અને અન્ય ઓર્ગેનિક કચરાને ક્લિન એનર્જીમાં રૂપાંતરિત કરવા માટે અત્યંત સક્ષમ છે. યુરોપ અને એશિયામાં સફળ થયા બાદ આ ટેક્નોલોજી હવે ભારતીય બજારમાં આવી રહી છે.

પરંપરાગત પ્લાન્ટ્સ કરતાં અનોખી અને ઝડપી ટેક્નોલોજી

આ મોડ્યુલર સીબીજી પ્લાન્ટ્સ માત્ર 4 થી 5 મહિનામાં જ ઉત્પાદન માટે કાર્યરત થઈ જાય છે, જ્યારે પરંપરાગત પ્લાન્ટ્સમાં 12 થી 18 મહિનાનો સમય લાગે છે. આ ડ્રાય એનારોબિક રિએક્ટરમાં પાણીની ખૂબ જ ઓછી આવશ્યકતા રહે છે. પરંપરાગત વેટ ડાઇજેશન સિસ્ટમની સરખામણીમાં આ સિસ્ટમ લગભગ 30 ટકા ઓછો ફીડસ્ટોક અને ઓછી વીજળી વાપરે છે, જેનાથી ઓપરેટિંગ ખર્ચ ઘટે છે અને વ્યાપારી ધોરણે મોટો ફાયદો થાય છે.

૧૦૦થી વધુ પ્રકારના ફીડસ્ટોકનો ઉપયોગ

આ ઓપન અને મોડ્યુલર સિસ્ટમ 100થી વધુ વિવિધ પ્રકારના ફીડસ્ટોકને પ્રોસેસ કરી શકે છે. જેમાં નેપિયર ઘાસ, મ્યુનિસિપલ સોલિડ વેસ્ટ, ભુસા, પ્રેસ મડ, કપાસનો કચરો, ફળો અને શાકભાજીનો વેસ્ટ, તેમજ પોલ્ટ્રી વેસ્ટનો સમાવેશ થાય છે. આ વિવિધતા તેને કૃષિ, ઔદ્યોગિક અને મ્યુનિસિપલ ક્ષેત્રો માટે આદર્શ બનાવે છે.

‘આત્મનિર્ભર ભારત’ અને ‘વિકસિત ભારત’ વિઝનને વેગ

ઇન્ફિસ્ટાર ગ્રૂપના ચેરમેન અને એમડી સુહ્રદ વી સારાભાઇએ જણાવ્યું હતું કે આ ભાગીદારી દ્વારા વૈશ્વિક સ્તરે સફળ ટેક્નોલોજી ભારતમાં લાવવામાં આવી રહી છે. મોટાભાગના સાધનોનું ભારતમાં ઉત્પાદન કરીને ‘આત્મનિર્ભર ભારત’ અને ‘વિકસિત ભારત 2047’ ના વિઝનમાં યોગદાન આપવામાં આવશે. આર્કિપ્લગ Oyના વાઇસ પ્રેસિડેન્ટ જારી વાલ્ટાનેને પણ આ પહેલને ભારતના સસ્ટેનેબિલિટી લક્ષ્યો માટે સીમાચિહ્નરૂપ ગણાવી હતી.

ગાંધીનગરમાં પાયલોટ પ્રોજેક્ટ અને ભવિષ્યની યોજનાઓ

આ પહેલ હેઠળ ગુજરાતના ગાંધીનગર જિલ્લામાં આશરે રૂ. 50 કરોડના રોકાણ સાથે 60 એકરમાં પાયલોટ પ્રોજેક્ટ સ્થાપિત થઈ રહ્યો છે. આ સર્ક્યુલર ઇકોનોમી મોડેલ હેઠળ નેપિયર ઘાસ ઉગાડવામાં આવશે, કેપ્ટિવ સોલાર પાવરનો ઉપયોગ થશે અને કાર્બનિક ખાતરનું ઉત્પાદન થશે. આ પ્રોજેક્ટ અંતર્ગત આગામી 5 વર્ષમાં ભારતમાં લગભગ 150 મોડ્યુલર પ્લગ ફ્લો સીબીજી રિએક્ટર વેચવાની યોજના છે.