એનડીએની બેઠકમાં ચિરાગ પાસવાન, જીતન રામ માંઝીની પાર્ટી એચએએમ ઉપરાંત ઉપેન્દ્ર કુશવાહાની આરએલજેડી અને મુકેશ સાહનીની પાર્ટી વીઆઈપી અંગે પણ નિર્ણય લેવામાં આવી શકે છે
નવી દિલ્હી
ભાજપે પણ લોકસભા ચૂંટણીમાં વિપક્ષી એકતાને ટક્કર આપવા તૈયારીઓ શરૂ કરી દીધી છે. તે એનડીએથી અલગ થઈ ગયેલા સાથી પક્ષોને સાથે લાવવાની કવાયત પણ શરૂ કરી રહી છે. તે આની શરૂઆત બિહારથી કરવા જઈ રહી છે. બીજેપી અધ્યક્ષ જેપી નડ્ડાએ 18 જુલાઈએ એનડીએની બેઠક બોલાવી છે. તેમણે લોક જનશક્તિ પાર્ટીના પ્રમુખ ચિરાગ પાસવાન અને હિન્દુસ્તાની અવમ મોરચાના પ્રમુખ જીતન રામ માંઝીને બેઠકમાં હાજરી આપવા આમંત્રણ આપ્યું છે.
લાંબા સમયથી ચર્ચા થઈ રહી છે કે, માંઝી અને ચિરાગ ફરી એનડીએમાં સામેલ થઈ શકે છે. તેઓ સતત અલગ-અલગ મુદ્દાઓ પર ભાજપને સમર્થન આપી રહ્યા છે. હાલમાં જ કેન્દ્રીય ગૃહ રાજ્ય મંત્રી નિત્યાનંદ રાય પણ પટનામાં ચિરાગ પાસવાનને મળ્યા હતા. આ બેઠક એલજેપીઆરના નેતાઓની બેઠક દરમિયાન થઈ હતી. બેઠક બાદ ચિરાગે પોતાના નેતાઓને કહ્યું હતું કે, ભાજપ સાથે ગઠબંધનની વાત ઘણા સમયથી ચાલી રહી છે. હવે વધુ એક કે બે રાઉન્ડની વાતચીત થવાની છે.
એનડીએની બેઠકમાં ચિરાગ પાસવાન, જીતન રામ માંઝીની પાર્ટી એચએએમ ઉપરાંત ઉપેન્દ્ર કુશવાહાની આરએલજેડી અને મુકેશ સાહનીની પાર્ટી વીઆઈપી અંગે પણ નિર્ણય લેવામાં આવી શકે છે. જો કે, આ તમામ નેતાઓ એનડીએમાં પાછા ફરવાના સંકેત આપી ચૂક્યા છે. કોઈપણ રીતે, ચિરાગ, માંઝી અને ઉપેન્દ્ર કુશવાહ અગાઉ પણ એનડીએમાં સામેલ થઈ ચૂક્યા છે.
