સાઉથ સુપરસ્ટાર નાનીની ‘ધ પેરેડાઇઝ’ની બોક્સ ઓફિસ પર ધમાકેદાર ઓપનિંગ, હિન્દીમાં ‘હનુમાન અંશ’ આગળ ફિક્કી!

કુણાલ ખેમુની ‘વાઇબ’ અને કરીના કપૂરની ‘દાયરા’ સાતમા દિવસે બોક્સ ઓફિસ પર સુસ્ત, જાણો કઈ ફિલ્મે કરી કેટલી કમાણી.

મુંબઈ

સાઉથના જાણીતા સુપરસ્ટાર નાનીની મોસ્ટ અવેઇટેડ ફિલ્મ ‘ધ પેરેડાઇઝ’ (The Paradise) એ બોક્સ ઓફિસ પર શાનદાર ઓપનિંગ સાથે ધમાકો મચાવ્યો છે. શ્રીકાંત ઓડેલાના નિર્દેશનમાં બનેલી આ ફિલ્મ નાનીના કરિયરની સૌથી મોટી ઓપનિંગ સાબિત થઈ છે. જોકે, હિન્દી ડબ વર્ઝનમાં આ ફિલ્મને ભક્તિ ડ્રામા ફિલ્મ ‘હનુમાન અંશ’ સામે આશ્ચર્યજનક રીતે ટક્કર મળી છે.

રિપોર્ટ્સ મુજબ, ‘ધ પેરેડાઇઝ’ એ રિલીઝના પહેલા જ દિવસે દેશભરમાં 9,732 શોઝ દ્વારા ₹34.65 કરોડનું નેટ કલેક્શન અને ₹54.90 કરોડનું ગ્રોસ કલેક્શન કર્યું છે. આ સાથે પ્રીવ્યૂ શોઝની કમાણી ઉમેરતા ભારતમાં ફિલ્મે કુલ ₹46.25 કરોડનો આંકડો વટાવ્યો છે. ઓવરસીઝ માર્કેટમાંથી ₹22 કરોડની કમાણી સાથે વર્લ્ડવાઈડ ગ્રોસ કલેક્શન પહેલા જ દિવસે ₹76.90 કરોડ સુધી પહોંચી ગયું છે.

આ ફિલ્મ નાનીની અગાઉની ફિલ્મો ‘હિટ: ધ થર્ડ કેસ’ અને ‘દસરા’ના રેકોર્ડ તોડવામાં સફળ રહી છે, પરંતુ પ્રભાસની ‘ધ રાજા સાબ’ (₹53.75 કરોડ નેટ) અને રામ ચરણની ‘પેદ્દી’ (₹51 કરોડ નેટ) ના ઓપનિંગ રેકોર્ડને વટાવી શકી નથી. આ ફિલ્મનું કુલ બજેટ ₹200 કરોડ જણાવવામાં આવી રહ્યું છે.

બોક્સ ઓફિસ સરખામણી (પહેલો દિવસ):

• ધ રાજા સાબ: ₹53.75 કરોડ (દેશ), ₹100.20 કરોડ (વર્લ્ડવાઈડ)
• પેદ્દી: ₹51 કરોડ (દેશ), ₹110.49 કરોડ (વર્લ્ડવાઈડ)
• ધ પેરેડાઇઝ: ₹34.65 કરોડ (દેશ), ₹76.90 કરોડ (વર્લ્ડવાઈડ)

હિન્દી બોક્સ ઓફિસ પર ‘હનુમાન અંશ’નો દબદબો

જ્યારે ‘ધ પેરેડાઇઝ’ ને હિન્દી બેલ્ટમાં નબળો પ્રતિસાદ મળ્યો છે. ગુરુવારે રિલીઝના 49મા દિવસે પણ ‘હનુમાન અંશ’ ફિલ્મે ₹3.65 કરોડનું નેટ કલેક્શન કર્યું છે, જ્યારે ‘ધ પેરેડાઇઝ’નું હિન્દી વર્ઝન માત્ર ₹2.25 કરોડ જ કમાઈ શક્યું. જોકે, નાનીની ફિલ્મે ‘મિર્ઝાપુર ધ મૂવી’ (₹1.50 કરોડ) ને જરૂર પાછળ છોડી દીધી છે. ‘હનુમાન અંશ’નું દેશમાં કુલ નેટ કલેક્શન ₹288.33 કરોડ અને વર્લ્ડવાઈડ કલેક્શન ₹377.05 કરોડ પર પહોંચી ગયું છે.

કુણાલ ખેમુ, પ્રીતિ ઝિન્ટા અને સ્પર્શ શ્રીવાસ્તવ અભિનિત ફિલ્મ ‘વાઇબ’ (Vibe) અને કરીના કપૂર તથા પૃથ્વીરાજ સુકુમારણની ફિલ્મ ‘દાયરા’ એ બોક્સ ઓફિસ પર પોતાનું પહેલું અઠવાડિયું પૂરું કરી લીધું છે.

• વાઇબ: ₹40 કરોડના બજેટમાં બનેલી આ ફિલ્મે પહેલા અઠવાડિયામાં કુલ ₹11.35 કરોડનું નેટ કલેક્શન કર્યું છે. જોકે, સાતમા દિવસે કમાણી ઘટીને માત્ર ₹90 લાખ પર આવી ગઈ છે.
• દાયરા: મેઘના ગુલઝારના નિર્દેશનમાં બનેલી ₹55 કરોડના બજેટની આ ફિલ્મ સાત દિવસમાં માત્ર ₹6.36 કરોડ જ કમાઈ શકી છે. ગુરુવારે આ ફિલ્મે માંડ ₹41 લાખની કમાણી કરી છે, જેથી આ ફિલ્મના ભવિષ્ય પર મોટો સવાલ ઊભો થયો છે.

શુક્રવારથી સિદ્ધાર્થ મલ્હોત્રાની ‘ધ વન’ અને હોલીવુડ ફિલ્મ ‘એવેન્જર્સ: એન્ડગેમ એન્કોર’ ની રી-રિલીઝના કારણે આગામી દિવસોમાં આ ફિલ્મો વચ્ચે સ્પર્ધા વધુ તીવ્ર બનશે.