ડો. કાપડિયા: AI માત્ર સાધન નહીં, પણ પરિવર્તનનું સચોટ માધ્યમ છે
અમદાવાદ
GLS યુનિવર્સિટી દ્વારા શુક્રવારે તેના અમદાવાદ કેમ્પસ ખાતે હાઇબ્રિડ ફોર્મેટમાં ફ્લેગશિપ ઇન્ટરનેશનલ રિસર્ચ કોન્ફરન્સ ‘GLSU-ATRPM 2026’ નું સફળતાપૂર્વક આયોજન કરવામાં આવ્યું હતું. આ કોન્ફરન્સનો મુખ્ય વિષય ‘AI ઇન એક્શન’ હતો.
યુનિવર્સિટીના શતાબ્દી વર્ષ નિમિત્તે ત્રીજા સ્મરણાત્મક કાર્યક્રમ ‘શોધ શતાબ્દી – ધ રિસર્ચ કોન્ક્લેવ’ અંતર્ગત ‘એડવાન્સિસ ઇન થીયરી, રિસર્ચ એન્ડ પ્રેક્ટિસિસ ઇન મેનેજમેન્ટ’ (ATRPM) પર આ કોન્ફરન્સ યોજાઈ હતી. ઉલ્લેખનીય છે કે, GLS યુનિવર્સિટીએ આ વર્ષે ૨૩ ફેબ્રુઆરીથી તેના શતાબ્દી વર્ષની વર્ષભર ચાલનારી ઉજવણીનો પ્રારંભ કર્યો હતો.
શુક્રવારની આ કોન્ફરન્સમાં ‘૧૦૦ સંશોધન વિચારો’ રજૂ કરવામાં આવ્યા હતા, જે યુનિવર્સિટીની નવીનતા, આંતરશાખાકીય સહયોગ અને ભવિષ્યલક્ષી સંશોધન પ્રત્યેની પ્રતિબદ્ધતા દર્શાવે છે. આ આયોજનમાં શૈક્ષણિક જગતના નિષ્ણાતો, સંશોધકો અને ઉદ્યોગ જગતના વ્યાવસાયિકોએ મેનેજમેન્ટ અને બિઝનેસમાં AI ના વ્યવહારિક ઉપયોગો પર ગહન ચર્ચા કરી હતી.
ઇમર્જિંગ ટેકનોલોજી, સસ્ટેનેબિલિટી, ફાઇનાન્સ એન્ડ એકાઉન્ટિંગ, અને એન્ટરપ્રેન્યોરશિપ તથા સ્ટાર્ટ-અપ્સ જેવા મુખ્ય ક્ષેત્રોમાં સંશોધન પત્રો રજૂ કરવામાં આવ્યા હતા. વર્ષ ૨૦૨૧થી શરૂ થયેલી GLSU-ATRPM શ્રેણી હવે શિક્ષણ જગત અને ઉદ્યોગ જગત વચ્ચે સેતુ બાંધતું એક વિશ્વસનીય પ્લેટફોર્મ બની ગઈ છે. ૨૦૨૬ની આ આવૃત્તિમાં સેક્ટર-સ્પેસિફિક એપ્લિકેશન્સ અને જવાબદાર AI પદ્ધતિઓ પર વિશેષ ભાર મૂકવામાં આવ્યો હતો.
ઉદઘાટન સત્રમાં IIM અમદાવાદના પ્રોફેસર નિહારિકા વોહરા મુખ્ય વક્તા તરીકે ઉપસ્થિત રહ્યા હતા. તેમણે મેનેજમેન્ટના નિર્ણયો લેવામાં અને સંસ્થાકીય નેતૃત્વ ઘડવામાં AI ના વધતા પ્રભાવ વિશે વિગતવાર માહિતી આપી હતી. ત્યારબાદ વિવિધ ટેકનિકલ સત્રો યોજાયા હતા.
સમાપન સત્રમાં BBDO ઇન્ડિયાના પૂર્વ CEO અને મર્સિડીઝ-બેન્ઝ માટેની TeamX ના સભ્ય સુરજ કિશોર મુખ્ય વક્તા તરીકે હાજર રહ્યા હતા. GLS યુનિવર્સિટીના એક્ઝિક્યુટિવ ડાયરેક્ટર ડો. ચાંદની કાપડિયાએ સમાપન પ્રવચન આપ્યું હતું. આ સમગ્ર કાર્યક્રમ GLS યુનિવર્સિટીના પ્રેસિડેન્ટ સુધીરભાઈ નાણાવટીના દૂરંદેશી નેતૃત્વ હેઠળ આયોજિત કરવામાં આવ્યો હતો.
ડો. કાપડિયાએ તેમના સંબોધનમાં સૈદ્ધાંતિક ચર્ચાઓથી આગળ વધીને વાસ્તવિક અમલીકરણ પર ભાર મૂકતા જણાવ્યું હતું કે, “‘AI ઇન એક્શન’ એ માત્ર સાધનો કે ટ્રેન્ડ વિશે નથી; તે તેના ઉપયોગ, પ્રયોગ અને અમલીકરણ વિશે છે. AI નું સાચું મૂલ્ય માનવીય વિચારધારાને બદલવામાં નહીં, પરંતુ તેને વિસ્તૃત કરવામાં રહેલું છે. AI સફળતાની વ્યાખ્યા નથી કરતું — આપણે તેનો ઉપયોગ કેવી રીતે કરીએ છીએ તેના પર સફળતાનો આધાર છે.”
આ પ્રસંગે ‘KALP’ જર્નલને ડિજિટલ પ્લેટફોર્મ તરીકે પુનઃ લોન્ચ કરવામાં આવ્યું હતું, જેનો હેતુ યુનિવર્સિટીમાં પ્રભાવશાળી અને વ્યવહારુ સંશોધનને પ્રોત્સાહન આપવાનો છે.
શતાબ્દી વર્ષમાં GLS યુનિવર્સિટી: ગુજરાત લો સોસાયટી (GLS) એ ૨૦૨૬માં તેના શૈક્ષણિક શ્રેષ્ઠતાના ૧૦૦મા વર્ષમાં પ્રવેશ કર્યો છે. આ શતાબ્દી વર્ષનું ઉદઘાટન ૨૩ ફેબ્રુઆરી, ૨૦૨૬ના રોજ મુખ્યમંત્રી ભૂપેન્દ્ર પટેલ દ્વારા કરવામાં આવ્યું હતું. ફેબ્રુઆરી ૨૦૨૭ સુધી ચાલનારી આ ઉજવણીમાં દર મહિને વિશિષ્ટ કાર્યક્રમો યોજાશે. માર્ચ મહિનામાં બીજા સ્મરણાત્મક કાર્યક્રમ તરીકે ‘વિકસિત ભારત માટે ૧૦૦ કેમ્પસ આઈડિયાઝ’ વિષય પર સ્ટાર્ટઅપ પ્રદર્શન યોજવામાં આવ્યું હતું.
