કેમિકલ યુક્ત દારૂ કરતા મહુડાનો દારૂ સારો, મનસુખ વસાવાનું નિવેદન ચર્ચામાં

આદિવાસી યુવાનોને શિક્ષણ તરફ વળવા અપીલ; ગ્રામ પંચાયત ભવનના બાંધકામથી લઈને વિપક્ષ પરના પ્રહારો સુધી અનેક મુદ્દાઓએ ખેંચ્યું ધ્યાન

નર્મદા

ભરૂચના સાંસદ મનસુખ વસાવા ફરી એકવાર પોતાના નિવેદનોને લઈને ચર્ચામાં આવ્યા છે. નર્મદા જિલ્લાના નાંદોદ તાલુકાના ઢોલાર ગામમાં યોજાયેલી ‘આદર્શ ગ્રામવિકાસ સમિતિ’ની પ્રથમ બેઠક દરમિયાન તેમણે સ્થાનિક પ્રશ્નો, વિકાસકાર્યો, શિક્ષણ અને દારૂની સમસ્યા સહિતના મુદ્દાઓ પર ખુલ્લેઆમ પોતાના વિચારો વ્યક્ત કર્યા હતા. તેમના કેટલાક નિવેદનો બાદ રાજકીય અને સામાજિક વર્તુળોમાં ચર્ચા શરૂ થઈ છે.

ગ્રામ પંચાયત ભવનના બાંધકામ મુદ્દે સ્પષ્ટતા

તાજેતરમાં ઢોલાર ગામના નવા ગ્રામ પંચાયત ભવનમાં ઉદ્ઘાટન પહેલાં જ તિરાડો પડ્યાનો વીડિયો સોશિયલ મીડિયા પર વાયરલ થયો હતો. આ મુદ્દે પ્રતિક્રિયા આપતા મનસુખ વસાવાએ નબળા બાંધકામ માટે મનરેગા (NREGA) યોજના હેઠળ થતી કામગીરીને જવાબદાર ઠેરવી હતી. સાથે તેમણે ગ્રામજનોને ખાતરી આપી હતી કે ગામને વધુ સારી સુવિધાઓ સાથે નવું અને મજબૂત મકાન બનાવી આપવામાં આવશે.

મહુડાના દારૂ અંગેની ટિપ્પણીથી ચર્ચા

બેઠક દરમિયાન સાંસદે આદિવાસી વિસ્તારોમાં દારૂની વધતી સમસ્યા અંગે ચિંતા વ્યક્ત કરી હતી. તેમણે કહ્યું કે બહારથી આવતો કેમિકલયુક્ત દારૂ યુવાનોના સ્વાસ્થ્ય માટે જોખમી સાબિત થઈ રહ્યો છે. આ સંદર્ભમાં તેમણે કહ્યું હતું કે કેમિકલયુક્ત દારૂના બદલે પરંપરાગત રીતે મહુડામાંથી બનાવાતો દારૂ વધુ સારું વિકલ્પ બની શકે. તેમના આ નિવેદન બાદ સ્થાનિક સ્તરે તેમજ રાજકીય વર્તુળોમાં વિવિધ પ્રકારની ચર્ચાઓ શરૂ થઈ છે.

યુવાનોને શિક્ષણ અને રોજગાર તરફ વળવાની અપીલ

મનસુખ વસાવાએ આદિવાસી યુવાનોને સંબોધતા કહ્યું કે સમાજના વિકાસ માટે શિક્ષણ સૌથી મોટું હથિયાર છે. તેમણે ભગવાન બિરસા મુંડાના સંઘર્ષને યાદ કરતાં યુવાનોને દારૂ અને વ્યસનથી દૂર રહી શિક્ષણ તરફ આગળ વધવા અનુરોધ કર્યો હતો. તેમણે જણાવ્યું કે ઉદ્યોગોમાં રોજગારીની અનેક તકો ઉપલબ્ધ છે અને લાયકાત ધરાવતા યુવાનોને નોકરી અપાવવા માટે તેઓ પોતે પણ પ્રયત્નશીલ રહેશે.

બિરસા મુંડાના આદર્શો અપનાવવાની હાકલ

સાંસદે પોતાના સંબોધનમાં કહ્યું કે માત્ર મહાપુરુષોના નામના નારા લગાવવાથી સમાજનો વિકાસ શક્ય નથી. તેમના વિચારો અને આદર્શોને જીવનમાં ઉતારવાની જરૂર છે. તેમણે આદિવાસી યુવાનોને સમાજના વિકાસમાં સક્રિય ભૂમિકા ભજવવા અને નવી દિશામાં આગળ વધવા પ્રેરિત કર્યા હતા.

વિપક્ષી નેતાઓ પર પણ કર્યા આકરા પ્રહારો

બેઠક દરમિયાન મનસુખ વસાવાએ વિપક્ષી નેતાઓને પણ આડે હાથ લીધા હતા. તેમણે આરોપ લગાવ્યો હતો કે કેટલાક લોકો સોશિયલ મીડિયા મારફતે ભ્રામક માહિતી ફેલાવી વિકાસકાર્યોને બદનામ કરવાનો પ્રયાસ કરી રહ્યા છે. તેમણે દાવો કર્યો કે ભાજપ સરકાર દ્વારા કરવામાં આવેલા વિકાસકાર્યોની સાચી માહિતી લોકો સુધી પહોંચાડવાની જરૂર છે.

રાજકીય વર્તુળોમાં ગરમાઈ ચર્ચા

સાંસદના નિવેદનો બાદ નર્મદા અને ભરૂચ જિલ્લાના રાજકીય વર્તુળોમાં ચર્ચાઓનો માહોલ સર્જાયો છે. ખાસ કરીને મહુડાના દારૂ અંગેની તેમની ટિપ્પણી અને વિપક્ષ સામે કરાયેલા પ્રહારોને લઈને વિવિધ પ્રતિક્રિયાઓ સામે આવી રહી છે. આગામી દિવસોમાં આ મુદ્દે વધુ રાજકીય પ્રતિસાદ જોવા મળી શકે છે.