૧૨ વર્ષ સેવા, સુશાસન અને જનકલ્યાણના’ અભિયાન અંતર્ગત કામરેજમાં સ્વચ્છતા અભિયાન

વડાપ્રધાન નરેન્દ્ર મોદીના ૧૨ વર્ષના કાર્યકાળની ઉજવણી, આરોગ્ય રાજ્યમંત્રી પ્રફુલ પાનશેરિયાની ઉપસ્થિતિમાં સામૂહિક શ્રમદાન

એસવીએન, સુરત

દેશના વડાપ્રધાન તરીકે નરેન્દ્ર મોદીના ૧૨ વર્ષના સફળ કાર્યકાળની ઉજવણી નિમિત્તે સમગ્ર દેશમાં વિવિધ કાર્યક્રમો યોજાઈ રહ્યા છે. ‘૧૨ વર્ષ સેવા, સુશાસન અને જનકલ્યાણના’ અભિયાન અંતર્ગત સુરત જિલ્લાના કામરેજ વિધાનસભા વિસ્તારમાં વિશાળ સ્વચ્છતા અભિયાનનું આયોજન કરવામાં આવ્યું હતું. આ કાર્યક્રમમાં આરોગ્ય રાજ્યમંત્રી અને કામરેજના ધારાસભ્ય પ્રફુલ પાનશેરિયા ઉપસ્થિત રહ્યા હતા.

વાલક પાટિયા વિસ્તારમાં યોજાયું અભિયાન

સ્વચ્છતા અભિયાનનું આયોજન વાલક પાટિયા ખાતે ઈન્ફિનિટી બાગ, પેરેડાઈઝ ફાર્મની સામે તેમજ જમનાબા ભવનની પાછળ આવેલા વિસ્તારમાં કરવામાં આવ્યું હતું. કાર્યક્રમમાં ભાજપના હોદ્દેદારો, પૂર્વ હોદ્દેદારો, કોર્પોરેટરો, કાર્યકર્તાઓ, યુવા મોરચાના સભ્યો અને મોટી સંખ્યામાં સ્થાનિક નાગરિકોએ ઉત્સાહપૂર્વક ભાગ લીધો હતો.

વિકાસ અને સુશાસનના ૧૨ વર્ષની ઉજવણી

આ પ્રસંગે આરોગ્ય રાજ્યમંત્રી પ્રફુલ પાનશેરિયાએ જણાવ્યું હતું કે વડાપ્રધાન નરેન્દ્ર મોદીના નેતૃત્વમાં છેલ્લા ૧૨ વર્ષ દરમિયાન દેશે વિકાસ, સુશાસન, ગરીબ કલ્યાણ, સ્વચ્છતા અને આત્મનિર્ભરતા જેવા ક્ષેત્રોમાં નોંધપાત્ર પ્રગતિ હાંસલ કરી છે. તેમણે જણાવ્યું કે સરકારની અનેક જનકલ્યાણકારી યોજનાઓએ સામાન્ય નાગરિકોના જીવનમાં સકારાત્મક પરિવર્તન લાવ્યું છે.

‘સ્વચ્છ ભારત’ જનઆંદોલન બન્યું

પાનશેરિયાએ જણાવ્યું હતું કે ‘સ્વચ્છ ભારત અભિયાન’ માત્ર સરકારી યોજના પૂરતું મર્યાદિત નથી રહ્યું, પરંતુ તે જનઆંદોલનનું સ્વરૂપ ધારણ કરી ચૂક્યું છે. કરોડો લોકો આ અભિયાન સાથે જોડાયા છે અને દેશને સ્વચ્છ બનાવવામાં પોતાનું યોગદાન આપી રહ્યા છે. સ્વચ્છતા પ્રત્યેની જાગૃતિના કારણે લોકોના જીવનમાં સકારાત્મક પરિવર્તન જોવા મળ્યું છે.

નાગરિકોએ લીધો સ્વચ્છતાનો સંકલ્પ

અભિયાન દરમિયાન ઉપસ્થિત આગેવાનો, કાર્યકર્તાઓ અને નાગરિકોએ સામૂહિક શ્રમદાન કરીને વિસ્તારની સફાઈ કરી હતી. સાથે જ સૌએ પોતાના વિસ્તારને સ્વચ્છ રાખવા અને અન્ય લોકોને પણ સ્વચ્છતા માટે પ્રેરિત કરવાનો સંકલ્પ વ્યક્ત કર્યો હતો. સમગ્ર કાર્યક્રમ દરમિયાન સેવા, વિકાસ અને જનકલ્યાણના મૂલ્યોને ઉજાગર કરતું ઉત્સાહપૂર્ણ વાતાવરણ જોવા મળ્યું હતું.