21 જૂનની પરીક્ષા પહેલાં સુરક્ષા વ્યવસ્થાની થશે આખરી ચકાસણી, 22 લાખ વિદ્યાર્થીઓ આપશે પરીક્ષા
નવી દિલ્હી:
21 જૂને યોજાનારી NEET-UG 2026ની રિ-એક્ઝામને લઈને National Testing Agency (NTA) અને કેન્દ્ર સરકારે સુરક્ષાને સર્વોચ્ચ પ્રાથમિકતા આપી છે. પરીક્ષામાં કોઈપણ પ્રકારની ગેરરીતિ, પેપર લીક અથવા અનિયમિતતા અટકાવવા માટે દેશભરના તમામ પરીક્ષા કેન્દ્રો પર શનિવારે વિશાળ સ્તરે મોક ડ્રિલ યોજવાનો નિર્ણય લેવામાં આવ્યો છે.
સવારથી મોડી રાત સુધી ચાલશે સુરક્ષા સમીક્ષા
NTA દ્વારા દેશના તમામ પરીક્ષા કેન્દ્રોને અગાઉથી જ નિયંત્રણ હેઠળ લઈ લેવામાં આવ્યા છે. શનિવારે સવારે 9 વાગ્યાથી શરૂ થનારી મોક ડ્રિલ મોડી રાત સુધી ચાલશે, જેમાં પરીક્ષા વ્યવસ્થાની દરેક બાબતની ચકાસણી કરવામાં આવશે. સુરક્ષા વ્યવસ્થાની સમીક્ષા માટે દેશભરમાં અંદાજે 2.5 લાખ જેટલા સુરક્ષાકર્મીઓને તૈનાત કરવામાં આવશે.
ત્રિસ્તરીય સુરક્ષા કવચ હેઠળ રહેશે પરીક્ષા
આ વખતે NEET-UG પરીક્ષાને સંપૂર્ણપણે સુરક્ષિત બનાવવા માટે ત્રિસ્તરીય સુરક્ષા વ્યવસ્થા અમલમાં મૂકવામાં આવી છે. પ્રશ્નપત્રો અને ઉત્તરવહીઓના પરિવહન તેમજ સુરક્ષિત સંગ્રહની જવાબદારી અર્ધસૈનિક દળોને સોંપવામાં આવી છે. પરીક્ષા કેન્દ્રો સુધી સામગ્રી પહોંચાડવાથી લઈને પરીક્ષા પૂર્ણ થયા બાદ તેને પરત લાવવાની સમગ્ર પ્રક્રિયા કડક સુરક્ષા હેઠળ હાથ ધરાશે.
5000થી વધુ કેન્દ્રોનું થશે લાઈવ મોનિટરિંગ
દેશભરના 5000થી વધુ પરીક્ષા કેન્દ્રોમાં સ્થાપિત CCTV કેમેરાનું સીધું લાઈવ મોનિટરિંગ NTAના મુખ્ય મથક પરથી કરવામાં આવશે. પરીક્ષા દરમિયાન કોઈ શંકાસ્પદ પ્રવૃત્તિ કે ગેરરીતિ સામે આવે તો તાત્કાલિક કાર્યવાહી થઈ શકે તે માટે વિશેષ નિયંત્રણ વ્યવસ્થા ઉભી કરવામાં આવી છે.
સોશિયલ મીડિયા પર રહેશે 24 કલાક નજર
પેપર લીક સંબંધિત અફવાઓ અને ભ્રામક માહિતી ફેલાતી અટકાવવા માટે ઉચ્ચ સ્તરીય મોનિટરિંગ સેન્ટર કાર્યરત કરવામાં આવ્યું છે. આ સેન્ટર સોશિયલ મીડિયા પ્લેટફોર્મ્સ પર ચોવીસે કલાક નજર રાખશે. ઉપરાંત વિવિધ તપાસ એજન્સીઓ, જિલ્લા પ્રશાસન તેમજ કેન્દ્ર અને રાજ્ય સરકારોના વરિષ્ઠ અધિકારીઓ પણ પરીક્ષાની પ્રક્રિયા પર સીધું નિરીક્ષણ કરશે.
22 લાખ વિદ્યાર્થીઓ માટે તૈયારીઓ પૂર્ણ
સત્તાવાર માહિતી અનુસાર, 21 જૂનની પરીક્ષા માટે દેશભરમાંથી અંદાજે 22 લાખ વિદ્યાર્થીઓએ નોંધણી કરાવી છે, જેમાંથી 18 લાખથી વધુ ઉમેદવારો એડમિટ કાર્ડ ડાઉનલોડ કરી ચૂક્યા છે. NTAએ દાવો કર્યો છે કે પરીક્ષાના સફળ અને પારદર્શક આયોજન માટે તમામ જરૂરી તૈયારીઓ પૂર્ણ કરી દેવામાં આવી છે.
