એડમિટ કાર્ડમાં ટેક્નિકલ ખામીથી વિદ્યાર્થી અને પરિવાર પરેશાન; NTAએ ભૂલ સ્વીકારી સુધારેલા કાર્ડનું આપ્યું આશ્વાસન
નવી દિલ્હી
NEET UG 2026ની રિ-એક્ઝામ પૂર્વે નેશનલ ટેસ્ટિંગ એજન્સી (NTA)ની વધુ એક મોટી બેદરકારી સામે આવી છે. નાગપુરના એક વિદ્યાર્થીને પરીક્ષા કેન્દ્ર તરીકે ભારતના બદલે સંયુક્ત આરબ અમીરાત (UAE)ના અબુ ધાબી સ્થિત એક શાળાનું કેન્દ્ર ફાળવાતા વિદ્યાર્થી અને તેના પરિવારજનો ભારે મુશ્કેલીમાં મુકાયા છે. આ ઘટનાએ સોશિયલ મીડિયા પર પણ વ્યાપક ચર્ચા જગાવી છે.
એડમિટ કાર્ડ જોઈ વિદ્યાર્થી ચોંકી ગયો
માહિતી મુજબ, નાગપુરના અબ્દુલ્લા મોહમ્મદ તાલિબે NEET UG રિ-એક્ઝામ માટે અરજી કરી હતી અને પોતાના રાજ્યમાં જ પરીક્ષા કેન્દ્ર મળવાની અપેક્ષા રાખી હતી. જોકે, એડમિટ કાર્ડ ડાઉનલોડ કરતાં તેને પરીક્ષા કેન્દ્ર તરીકે અબુ ધાબીની એક ઇન્ડિયન સ્કૂલનું સરનામું જોવા મળ્યું હતું. અચાનક વિદેશી કેન્દ્ર ફાળવાતા વિદ્યાર્થી અને પરિવાર આઘાતમાં સરી પડ્યા હતા.
પાસપોર્ટ ન હોવાથી ઊભી થઈ મુશ્કેલી
વિદ્યાર્થીના પરિવાર માટે સૌથી મોટી સમસ્યા એ છે કે અબ્દુલ્લા પાસે પાસપોર્ટ જ નથી. જેના કારણે વિદેશ જઈને પરીક્ષા આપવી શક્ય નથી. વિદ્યાર્થીના પિતા મોહમ્મદ તાલિબે જણાવ્યું હતું કે તેમણે અરજી દરમિયાન નાગપુર નજીકના ત્રણ જિલ્લા વિકલ્પ તરીકે પસંદ કર્યા હતા, છતાં અબુ ધાબીનું કેન્દ્ર ફાળવાયું. આ ઘટના બાદ વિદ્યાર્થી માનસિક રીતે વ્યથિત થઈ ગયો હતો અને પરીક્ષા આપવાનો પણ ઇનકાર કરી રહ્યો હતો.
NTAએ ભૂલ સ્વીકારી
મામલો ચર્ચામાં આવતાં NTAએ આને ટેક્નિકલ ખામી ગણાવી પોતાની ભૂલ સ્વીકારી છે. એજન્સીએ પરિવારને ખાતરી આપી છે કે વિદ્યાર્થીને ટૂંક સમયમાં સુધારેલું એડમિટ કાર્ડ આપવામાં આવશે. પરિવારને NTA તરફથી ઇમેઇલ મારફતે પણ જાણ કરવામાં આવી છે કે ભૂલ સુધારવાની પ્રક્રિયા હાથ ધરવામાં આવી છે.
21 જૂને યોજાશે રિ-એક્ઝામ
NEET UG 2026ની રિ-એક્ઝામ 21 જૂનના રોજ બપોરે 2 વાગ્યાથી સાંજે 5:15 વાગ્યા સુધી યોજાશે. ઉમેદવારોએ પરીક્ષા કેન્દ્ર પર એડમિટ કાર્ડ અને જરૂરી દસ્તાવેજો સાથે હાજર રહેવું પડશે. NTAએ તમામ ઉમેદવારોને સૂચના આપી છે કે એડમિટ કાર્ડમાં નામ, ફોટો, વ્યક્તિગત વિગતો અથવા પરીક્ષા કેન્દ્ર સંબંધિત કોઈ વિસંગતતા જણાય તો તાત્કાલિક સત્તાવાર રીતે ફરિયાદ નોંધાવવી.
પરીક્ષા વ્યવસ્થાપન પર ફરી ઉઠ્યા સવાલ
આ ઘટનાએ પરીક્ષા સંચાલન અને NTAની કામગીરી પર ફરી એકવાર સવાલો ઊભા કર્યા છે. મહત્વપૂર્ણ રાષ્ટ્રીય સ્તરની પરીક્ષા પહેલાં આવી ભૂલો વિદ્યાર્થીઓમાં ચિંતા અને અસુરક્ષાની લાગણી ઊભી કરી રહી છે. નિષ્ણાતોનું માનવું છે કે આવી ટેક્નિકલ ક્ષતિઓને રોકવા માટે વધુ સચોટ અને જવાબદાર વ્યવસ્થા જરૂરી બની છે.
