જીએલએસની શતાબ્દી ઉજવણીમાં ‘રૂટ્સ ઓફ ટુમોરો’ અંતર્ગત વૃક્ષારોપણ, હરિયાળા ભવિષ્યનો સંકલ્પ

એએમસી કમિશનર બંછાનિધિ પાની અને પત્રકાર અજય ઉમટની ઉપસ્થિતિમાં વિદ્યાર્થીઓએ પર્યાવરણ સંરક્ષણની પ્રતિજ્ઞા લીધી

અમદાવાદ

અમદાવાદ સ્થિત ગુજરાત લો સોસાયટી (જીએલએસ)ની શતાબ્દી વર્ષની ઉજવણી અંતર્ગત જીએલએસ યુનિવર્સિટી દ્વારા એલિસબ્રિજ કેમ્પસમાં ‘રૂટ્સ ઓફ ટુમોરો’ વૃક્ષારોપણ કાર્યક્રમ યોજાયો હતો. કાર્યક્રમ દ્વારા પર્યાવરણ સંરક્ષણ, ટકાઉ વિકાસ અને આવનારી પેઢી માટે હરિયાળું ભવિષ્ય નિર્માણનો સંદેશ આપવામાં આવ્યો હતો.

શતાબ્દી ઉજવણીનો પાંચમો કાર્યક્રમ

જીએલએસની શતાબ્દી ઉજવણીના પાંચમા કાર્યક્રમ તરીકે યોજાયેલા આ વૃક્ષારોપણ અભિયાનમાં શિક્ષણ સાથે સામાજિક જવાબદારીનું મહત્વ ઉજાગર કરવામાં આવ્યું હતું. વિદ્યાર્થીઓ, શિક્ષકો અને મહાનુભાવોએ મળીને વૃક્ષારોપણ કરી હરિયાળા અને સ્વચ્છ પર્યાવરણના નિર્માણ માટે પોતાની પ્રતિબદ્ધતા વ્યક્ત કરી હતી.

મહાનુભાવોએ આપ્યો પર્યાવરણ જાગૃતિનો સંદેશ

કાર્યક્રમમાં અમદાવાદ મ્યુનિસિપલ કોર્પોરેશન (એએમસી)ના કમિશનર બંછાનિધિ પાની મુખ્ય મહેમાન તરીકે હાજર રહ્યા હતા, જ્યારે જાણીતા પત્રકાર અજય ઉમટ પણ ઉપસ્થિત રહ્યા હતા. બંને મહાનુભાવોએ પર્યાવરણનું સંરક્ષણ માત્ર સરકાર કે કોઈ એક સંસ્થાની જવાબદારી નહીં, પરંતુ સમગ્ર સમાજની સામૂહિક ફરજ હોવાનું જણાવ્યું હતું. તેમણે શિક્ષણ સંસ્થાઓને પર્યાવરણ જાગૃતિ માટે મહત્વપૂર્ણ માધ્યમ ગણાવી યુવાનોને વધુ સક્રિય બનવા અપીલ કરી હતી.

વધુમાં વધુ વૃક્ષો વાવવાનો સંદેશ

જીએલએસ યુનિવર્સિટીના પ્રમુખ સુધીર નાણાવટીના નેતૃત્વમાં યોજાયેલા કાર્યક્રમ દરમિયાન મહાનુભાવોએ વૃક્ષારોપણ કર્યું હતું. વિદ્યાર્થીઓ અને શિક્ષકો સાથેના સંવાદમાં તેમણે વધુમાં વધુ વૃક્ષો વાવવા તેમજ વાવેલા છોડનું જતન કરવાની જવાબદારી નિભાવવાનો સંદેશ આપ્યો હતો. તેમણે જણાવ્યું હતું કે આજે વાવાયેલું દરેક વૃક્ષ આવતીકાલની પેઢી માટે સ્વચ્છ હવા, સુરક્ષિત પર્યાવરણ અને આશાનું પ્રતીક છે.

વિદ્યાર્થીઓએ લીધો સંકલ્પ

કાર્યક્રમમાં જીએલએસ યુનિવર્સિટીના એક્ઝિક્યુટિવ ડિરેક્ટર ડૉ. ચાંદની કાપડિયા, યુનિવર્સિટીના અધિકારીઓ, વિવિધ સંસ્થાઓના વડાઓ, શિક્ષકો, કર્મચારીઓ અને મોટી સંખ્યામાં વિદ્યાર્થીઓ ઉપસ્થિત રહ્યા હતા. સૌએ ઉત્સાહપૂર્વક વૃક્ષારોપણમાં ભાગ લઈ વાવેલા છોડની સંભાળ રાખવાનો સંકલ્પ કર્યો હતો.

શિક્ષણ સાથે સામાજિક જવાબદારીનો સંદેશ

જીએલએસની શતાબ્દી ઉજવણી અંતર્ગત યોજાયેલા આ કાર્યક્રમ દ્વારા સંસ્થાએ સ્પષ્ટ સંદેશ આપ્યો કે શિક્ષણ માત્ર જ્ઞાન પૂરતું સીમિત નથી, પરંતુ સમાજ અને પર્યાવરણ પ્રત્યેની જવાબદારી નિભાવવાનું પણ એટલું જ જરૂરી છે. ‘રૂટ્સ ઓફ ટુમોરો’ અભિયાન દ્વારા વિદ્યાર્થીઓમાં જવાબદાર નેતૃત્વ, ટકાઉ વિકાસ અને સમાજસેવાની ભાવનાને વધુ મજબૂત બનાવવાનો પ્રયાસ કરવામાં આવ્યો હતો. કાર્યક્રમના અંતે તમામ ઉપસ્થિતોએ વધુમાં વધુ વૃક્ષો વાવવા, પર્યાવરણનું જતન કરવા અને હરિયાળા ભવિષ્યના નિર્માણ માટે સતત પ્રયત્નશીલ રહેવાની પ્રતિજ્ઞા લીધી હતી.