BRO સ્ટ્રેટેજિક ઇન્ફ્રાસ્ટ્રક્ચર કોન્ક્લેવમાં રક્ષામંત્રીએ કહ્યું- નવી ટેક્નોલોજીથી વિશ્વસ્તરીય સરહદી માળખું ઉભું કરી રાષ્ટ્રીય સુરક્ષા અને ‘વિકસિત ભારત’ના લક્ષ્યને મળશે વેગ
નવી દિલ્હી
રક્ષામંત્રી રાજનાથ સિંહે જણાવ્યું છે કે ભવિષ્યમાં યુદ્ધનું સ્વરૂપ ભલે આધુનિક ટેક્નોલોજી, ચોકસાઈયુક્ત હથિયારો અને અદ્યતન પ્લેટફોર્મ પર આધારિત બનતું જાય, પરંતુ સરહદી માર્ગો, ટનલ, એરફિલ્ડ અને બંદરો જેવા વ્યૂહાત્મક ઇન્ફ્રાસ્ટ્રક્ચરની ભૂમિકા હંમેશા નિર્ણાયક રહેશે. નવી દિલ્હીમાં આયોજિત બોર્ડર રોડ્સ ઓર્ગેનાઇઝેશન (BRO)ના સ્ટ્રેટેજિક ઇન્ફ્રાસ્ટ્રક્ચર કોન્ક્લેવમાં તેમણે જણાવ્યું કે સૈનિકોને મોરચે પહોંચાડતો રસ્તો પણ રાષ્ટ્રીય સુરક્ષાનો એટલો જ મહત્વપૂર્ણ ભાગ છે જેટલો સરહદ પર તૈનાત જવાન.
BRO બની વિશ્વસ્તરીય વ્યૂહાત્મક સંસ્થા
રક્ષામંત્રીએ જણાવ્યું કે છેલ્લા સાડા છ દાયકામાં BRO માત્ર રસ્તા બનાવતી એજન્સીમાંથી વિશ્વની અગ્રણી વ્યૂહાત્મક ઇન્ફ્રાસ્ટ્રક્ચર સંસ્થાઓમાં સ્થાન પ્રાપ્ત કરી ચૂકી છે. અટલ ટનલ, ઉમલિંગ-લા પાસ રોડ અને સેલા ટનલ જેવા પ્રોજેક્ટ્સ BROની ટેક્નિકલ ક્ષમતા, સમર્પણ અને કઠિન પરિસ્થિતિઓમાં કામ કરવાની શક્તિના જીવંત ઉદાહરણ છે.
નવી ટેક્નોલોજીથી સરહદી માળખાને મળશે મજબૂતી
રાજનાથ સિંહે જણાવ્યું કે BRO ટનલિંગ ટેક્નોલોજી સહિત અનેક આધુનિક અને વિશિષ્ટ ટેક્નોલોજી અપનાવી રહી છે. પહાડી વિસ્તારોમાં માર્ગ અને હાઈવેના ઝડપી નિર્માણમાં ટેક્નોલોજી અને માનવ સંકલ્પનું અનોખું સંયોજન જોવા મળે છે. તેમણે ભારપૂર્વક જણાવ્યું કે વિશ્વસ્તરીય ઇન્ફ્રાસ્ટ્રક્ચરનું નિર્માણ રાષ્ટ્રીય સુરક્ષા મજબૂત કરવાની સાથે ‘વિકસિત ભારત-2047’ના લક્ષ્યને પણ આગળ ધપાવશે.
કનેક્ટિવિટી વિકાસનું મુખ્ય આધારસ્તંભ
રક્ષામંત્રીએ કહ્યું કે માર્ગ, રેલ, હવાઈ અને ડિજિટલ કનેક્ટિવિટી કોઈપણ સંસ્કૃતિ અને રાષ્ટ્રના વિકાસ માટે અનિવાર્ય છે. સરકારે એવી વ્યવસ્થા ઉભી કરી છે કે દૂરદરાજના વિસ્તારોમાં રહેતો કોઈપણ નાગરિક મુખ્ય પ્રવાહથી અલગ ન પડે. તેમણે જણાવ્યું કે ‘વાઇબ્રન્ટ વિલેજ પ્રોગ્રામ’ હેઠળ અગાઉ ‘છેલ્લા ગામ’ તરીકે ઓળખાતા સરહદી ગામોને હવે ‘દેશના પ્રથમ ગામ’ તરીકે વિકસાવવામાં આવી રહ્યા છે.
નવીનતા અને સંશોધન પર આપ્યો ભાર
રાજનાથ સિંહે જણાવ્યું કે ભવિષ્ય માટે તૈયાર વ્યૂહાત્મક ઇન્ફ્રાસ્ટ્રક્ચર બનાવવા માટે નવીનતા, સંશોધન અને અમલીકરણમાં શ્રેષ્ઠતા જરૂરી છે. તેમણે ઉદ્યોગો, શૈક્ષણિક સંસ્થાઓ, ઇજનેરો અને વહીવટી તંત્રને સાથે મળીને કાર્ય કરવાની અપીલ કરી, જેથી ટેક્નોલોજી આધારિત મજબૂત ઇકોસિસ્ટમ ઉભી થઈ શકે.
BROનું ડિજિટલ રૂપાંતરણ તેજ ગતિએ
BROના ડિરેક્ટર જનરલ લેફ્ટનન્ટ જનરલ હરપાલ સિંહે જણાવ્યું કે હવે વ્યૂહાત્મક ક્ષમતાનું મૂલ્યાંકન માત્ર કેટલું બાંધવામાં આવ્યું છે તેના આધારે નહીં, પરંતુ આયોજન, અમલીકરણ, મોનિટરિંગ અને જાળવણી કેટલી બુદ્ધિશાળી રીતે કરવામાં આવે છે તેના આધારે થશે. BRO હાલમાં AI આધારિત સોલ્યુશન્સ, ડિજિટલ પ્લાનિંગ, આધુનિક બાંધકામ પદ્ધતિઓ અને મિકેનાઇઝેશન પર વિશેષ ભાર મૂકી રહ્યું છે.
ડિજિટલ પ્લેટફોર્મ અને BRO એન્થમનું અનાવરણ
કાર્યક્રમ દરમિયાન રક્ષામંત્રીએ BROના વિવિધ પ્રોજેક્ટ્સને ઉત્કૃષ્ટ કામગીરી બદલ સન્માનિત કર્યા હતા. સાથે જ પ્રોજેક્ટ મેનેજમેન્ટ અને ભરતી માટે બે નવા ડિજિટલ પ્લેટફોર્મ લોન્ચ કર્યા. ઉપરાંત ‘પથ પ્રદર્શક’, ‘ઊંચી સડકેન’ અને ‘પથ વિકાસ’ નામના ત્રણ પ્રકાશનોનું વિમોચન તેમજ BRO એન્થમનું પણ અનાવરણ કરવામાં આવ્યું.
ટેક્નોલોજી આધારિત વ્યૂહાત્મક વિકાસ પર બે દિવસીય મંથન
15થી 16 જુલાઈ દરમિયાન યોજાયેલા આ બે દિવસીય કોન્ક્લેવમાં સૈન્ય અધિકારીઓ, નીતિ નિર્માતાઓ, ઇન્ફ્રાસ્ટ્રક્ચર નિષ્ણાતો, ઉદ્યોગ જગત અને ટેક્નોલોજી ક્ષેત્રના પ્રતિનિધિઓએ ભાગ લીધો હતો. “Enhancing Capability through Technology, Innovation and Execution Excellence” થીમ હેઠળ સરહદી વિસ્તારોમાં ભવિષ્યલક્ષી અને ટકાઉ ઇન્ફ્રાસ્ટ્રક્ચર વિકાસ માટે વિવિધ વિષયો પર ચર્ચા કરવામાં આવી હતી.
