સ્કોટ્સટાઉન સ્ટેડિયમની મુલાકાત લઈ નીરજ ચોપડા સહિત ભારતીય ખેલાડીઓને ચીયર-અપ કર્યા, રમતપ્રેમીઓના ઉત્સાહને બિરદાવ્યો
ગ્લાસગો (સ્કોટલેન્ડ):
સ્કોટલેન્ડના ગ્લાસગોમાં યોજાઈ રહેલી કોમનવેલ્થ ગેમ્સ દરમિયાન ગુજરાતના નાયબ મુખ્યમંત્રી હર્ષ સંઘવીએ સ્કોટ્સટાઉન સ્ટેડિયમની મુલાકાત લઈ ભારતીય એથ્લેટ્સનો ઉત્સાહ વધાર્યો હતો. તેમણે સ્ટેડિયમમાં ઉપસ્થિત ભારતીય રમતપ્રેમીઓ સાથે મુલાકાત કરી અને દેશનું પ્રતિનિધિત્વ કરી રહેલા ખેલાડીઓને શ્રેષ્ઠ પ્રદર્શન માટે શુભેચ્છાઓ પાઠવી હતી.
ભારતીય ખેલાડીઓ માટે ગૂંજી ઉઠ્યું સ્ટેડિયમ
સ્ટેડિયમમાં ભારતીય એથ્લેટ્સને પ્રોત્સાહિત કરવા માટે મોટી સંખ્યામાં ભારતીય રમતપ્રેમીઓ અને સમર્થકો ઉપસ્થિત રહ્યા હતા. ખાસ કરીને ભારતના સ્ટાર જેવલિન થ્રોઅર નીરજ ચોપડા સહિતના ખેલાડીઓ માટે પ્રશંસકોનો ઉત્સાહ અને જુસ્સો અદ્ભુત તથા પ્રેરણાદાયી જોવા મળ્યો હતો.
પ્રશંસકો સાથે મળીને કર્યું ચીયર-અપ
નાયબ મુખ્યમંત્રી હર્ષ સંઘવીએ સ્ટેડિયમમાં હાજર પ્રશંસકો સાથે સમય વિતાવ્યો અને સૌ સાથે મળીને ભારતીય ખેલાડીઓનું ચીયર-અપ કર્યું હતું. તેમણે કહ્યું કે આંતરરાષ્ટ્રીય મંચ પર ભારતનું પ્રતિનિધિત્વ કરતા ખેલાડીઓ દેશનું ગૌરવ છે અને તેમના મનોબળમાં વધારો કરવો દરેક ભારતીયની જવાબદારી છે.
રમતગમતને પ્રોત્સાહન આપવાનો સંદેશ
આ મુલાકાત દરમિયાન નાયબ મુખ્યમંત્રીએ ભારતીય ખેલાડીઓની મહેનત, સમર્પણ અને રમતિયાળ ભાવનાની પ્રશંસા કરી હતી. તેમણે આશા વ્યક્ત કરી હતી કે ભારતીય ખેલાડીઓ કોમનવેલ્થ ગેમ્સમાં શ્રેષ્ઠ પ્રદર્શન કરીને દેશ માટે વધુ મેડલ જીતશે અને વિશ્વ મંચ પર ભારતનું ગૌરવ વધારશે.
