પાકિસ્તાનમાં પણ ‘જેન ઝી’ આંદોલનનું આહ્વાન: ઈમરાન ખાનની બહેન અલીમા ખાને ભારતનું ઉદાહરણ આપ્યું

ભારતના બાળકોના સંઘર્ષની પ્રશંસા કરતા અલીમા ખાને પાકિસ્તાની સરકાર પર નિશાન સાધ્યું અને યુવાનોને રસ્તા પર ઉતરવા અપીલ કરી

લાહોર

પાકિસ્તાનના પૂર્વ વડાપ્રધાન ઈમરાન ખાનનાં બહેન અલીમા ખાને તાજેતરમાં એક જાહેરસભાને સંબોધિત કરતી વખતે પાકિસ્તાનમાં પણ ‘જેન ઝી’ (Gen Z) આંદોલન શરૂ કરવાનું આહ્વાન કર્યું છે. તેમણે પાકિસ્તાની યુવાનો અને બાળકો સમક્ષ ભારતનું ઉદાહરણ આપતા કહ્યું કે જ્યારે ભારતના બાળકોએ પોતાના હકો માટે અવાજ ઉઠાવ્યો, ત્યારે ત્યાંની સરકારને ઝૂકવું પડ્યું હતું.

અલીમા ખાને સભામાં જણાવ્યું હતું કે, “હિન્દુસ્તાનમાં જુઓ કેવી રીતે બાળકો બહાર આવ્યા છે. તમારા બાજુના દેશમાં બાળકોએ પોતાના હકો માંગ્યા અને સરકારને તેમની વાત સ્વીકારવાની ફરજ પડી.” તેમણે દાવો કર્યો કે ભારતમાં બાળકો પર લાઠીચાર્જ થયા બાદ સરકારે માફી માંગવી પડી હતી અને એક મંત્રીએ પોતાના પદ પરથી રાજીનામું પણ આપવું પડ્યું હતું.

પાકિસ્તાનની વર્તમાન સરકાર અને શાસન વ્યવસ્થા પર આકરા પ્રહાર કરતા અલીમા ખાને કહ્યું કે પાકિસ્તાનમાં પરિસ્થિતિ તદ્દન વિપરીત છે. અહીંની સરકાર ચોરીથી બનાવવામાં આવી છે અને કોઈ પણ પદાધિકારી નૈતિક જવાબદારી સ્વીકારીને રાજીનામું આપવા તૈયાર નથી. તેમણે પાકિસ્તાનના શાસકો અને સેના સામે અવાજ ઉઠાવતા કહ્યું કે અહીં એટલી નિર્લજ્જતા છે કે પ્રજાના હકો પર તરાપ મારવા છતાં કોઈ જવાબદેહ બનતું નથી.

આ ભાષણ દરમિયાન અલીમા ખાને પાકિસ્તાન અધિકૃત Kashmir (PoK) ના રાવલકોટમાં થયેલી ગોળીબારની ઘટનાની પણ તીવ્ર નિંદા કરી હતી. તેમણે નિર્દોષ નાગરિકોના મોતના મામલે સરકારી તંત્ર અને સેનાને આડે હાથ લીધા હતા અને સવાલ કર્યો હતો કે નાગરિકો પર ઘાતક બળનો ઉપયોગ કરવાનો આદેશ આખરે કોણે આપ્યો હતો? ઉલ્લેખનીય છે કે ઈમરાન ખાન હાલ જેલમાં છે અને તેમની બહેન સરકાર વિરુદ્ધ સતત વિરોધ પ્રદર્શનોનું નેતૃત્વ કરી રહી છે.