કડોદરા ગામમાં ભારે વરસાદ બાદ પૂર જેવી સ્થિતિ વચ્ચે 400થી વધુ લોકોને રાહત સામગ્રીનું વિતરણ, સધર્ન કમાન્ડની ટીમો સતત કાર્યરત
સુરત
સુરત જિલ્લાના કડોદરા ગામમાં સતત વરસાદને કારણે સર્જાયેલી પૂર જેવી પરિસ્થિતિમાં ભારતીય સેનાએ તાત્કાલિક રાહત અને બચાવ કામગીરી હાથ ધરી છે. સધર્ન કમાન્ડની ફ્લડ રિલીફ ટીમોએ જિલ્લા વહીવટીતંત્ર સાથે સંકલન કરીને અનેક લોકોને સુરક્ષિત સ્થળે ખસેડ્યા છે તેમજ અસરગ્રસ્ત પરિવારોને જરૂરી રાહત સામગ્રી પહોંચાડી છે.
ભારતીય સેનાએ હાથ ધરી રાહત કામગીરી
સુરત જિલ્લાના કડોદરા ગામમાં ભારે વરસાદ અને પૂરના કારણે સામાન્ય જનજીવન પ્રભાવિત બન્યું છે. પરિસ્થિતિને ધ્યાનમાં રાખીને ભારતીય સેનાની સધર્ન કમાન્ડ દ્વારા ફ્લડ રિલીફ કોલમ તૈનાત કરવામાં આવી છે. સેનાની ટીમો સ્થાનિક પ્રશાસન સાથે મળીને બચાવ અને રાહત કામગીરીમાં જોડાઈ છે.
34 નાગરિકોનું રેસ્ક્યૂ, પરિવારોને સુરક્ષિત સ્થળે ખસેડાયા
સેનાની ટીમોએ અત્યાર સુધીમાં 34 નાગરિકોને સુરક્ષિત રીતે બચાવી લીધા છે. ઉપરાંત અનેક પરિવારોને જોખમી વિસ્તારોમાંથી સલામત સ્થળોએ સ્થળાંતરિત કરવામાં આવ્યા છે જેથી કોઈ જાનહાનિ ન થાય.
400થી વધુ લોકોને રાહત સામગ્રીનું વિતરણ
રાહત કામગીરી દરમિયાન 400થી વધુ અસરગ્રસ્ત લોકોને ખાદ્ય સામગ્રી અને અન્ય આવશ્યક રાહત સામગ્રીનું વિતરણ કરવામાં આવ્યું છે. સ્થાનિક વહીવટીતંત્ર અને સેનાના સંયુક્ત પ્રયાસોથી અસરગ્રસ્તોને તાત્કાલિક સહાય પહોંચાડવામાં આવી રહી છે.
બોટ અને જીવનરક્ષક સાધનો સાથે ટીમો સતત તૈનાત
ભારતીય સેનાની ટીમો બોટ, લાઇફ જેકેટ સહિતના જીવનરક્ષક સાધનોથી સજ્જ છે અને જરૂરિયાત મુજબ વધુ બચાવ કામગીરી માટે સંપૂર્ણ રીતે તૈયાર છે. પરિસ્થિતિ પર સતત નજર રાખી વધુ કોઈ પણ આકસ્મિક સ્થિતિનો સામનો કરવા સેનાની ટીમો સતર્ક છે.
