કેબ સાથે ટ્રેન ટિકિટની સુવિધા પણ; ixigoની ટેક્નોલોજીથી થશે બુકિંગ, PNR સ્ટેટસ પણ જાણી શકાશે
નવી દિલ્હી
હવે ટ્રેનની ટિકિટ બુક કરવા માટે માત્ર IRCTCની વેબસાઇટ કે એપ પર નિર્ભર રહેવાની જરૂર નહીં પડે. કેબ બુકિંગ પ્લેટફોર્મ Uberએ પોતાના એપમાં ટ્રેન ટિકિટ બુકિંગની સુવિધા શરૂ કરી છે. Uberએ આ સેવા માટે ixigo સાથે ભાગીદારી કરી છે. ખાસ વાત એ છે કે મુસાફરો એક જ એપ દ્વારા ઘરેથી રેલવે સ્ટેશન સુધીની કેબ, ટ્રેન ટિકિટ અને સ્ટેશનથી આગળની મુસાફરીનું આયોજન કરી શકશે.
Uber એપમાં મળશે ‘Bus & Train’ વિકલ્પ
Uber એપના હોમ સ્ક્રીન પર હવે Bus & Trainનો વિકલ્પ જોવા મળશે. તેમાં જઈને યુઝર્સ Train Tickets પસંદ કરી શકશે. ત્યારબાદ પ્રસ્થાન અને ગંતવ્ય સ્ટેશનની વિગતો દાખલ કરતાં ઉપલબ્ધ ટ્રેનોની યાદી સામે આવશે. મુસાફરો પોતાની અનુકૂળતા પ્રમાણે ટ્રેન પસંદ કરીને ટિકિટ બુક કરી શકશે.
ટ્રેન ટિકિટ બુક કરવાની સરળ પ્રક્રિયા
Uber પર ટ્રેન ટિકિટ બુક કરવા માટે સૌપ્રથમ એપ ખોલીને Bus & Train વિકલ્પ પર ક્લિક કરવાનું રહેશે. ત્યારબાદ Train Tickets પસંદ કરી પ્રસ્થાન અને ગંતવ્ય સ્ટેશન દાખલ કરવાના રહેશે. ઉપલબ્ધ ટ્રેનોમાંથી યોગ્ય ટ્રેન પસંદ કર્યા બાદ સીટ અથવા બર્થની પસંદગી કરી શકાશે.
આગળ મુસાફરનું નામ, ઉંમર, લિંગ અને બર્થ પ્રેફરન્સ જેવી જરૂરી વિગતો ભરવાની રહેશે. ત્યારબાદ પોતાનું IRCTC યુઝર આઈડી અને પાસવર્ડ દાખલ કરવો પડશે. UPI, ડેબિટ અથવા ક્રેડિટ કાર્ડ તથા નેટ બેન્કિંગ જેવા વિકલ્પોથી પેમેન્ટ કરી શકાશે. બુકિંગ સફળ થતાં સ્ક્રીન પર PNR નંબર અને ઈ-ટિકિટની વિગતો મળશે.
PNR સ્ટેટસ પણ એક જ એપમાં ચેક કરી શકાશે
Uberની આ સુવિધા માત્ર ટિકિટ બુકિંગ પૂરતી મર્યાદિત નથી. મુસાફરો પોતાના ટ્રેન ટિકિટનો PNR સ્ટેટસ પણ ચેક કરી શકશે. એટલે ટિકિટ બુક થયા બાદ તેની સ્થિતિ જાણવા માટે અલગ પ્લેટફોર્મ પર જવાની જરૂરિયાત ઓછી થશે.
ઘરેથી સ્ટેશન અને સ્ટેશનથી ઘર સુધીની મુસાફરી
આ સુવિધાનો સૌથી મોટો ફાયદો ફર્સ્ટ અને લાસ્ટ-માઈલ કનેક્ટિવિટીમાં જોવા મળશે. મુસાફર એક જ એપ દ્વારા ઘરેથી રેલવે સ્ટેશન સુધી Uber કેબ બુક કરી શકશે અને મુસાફરી પૂર્ણ થયા બાદ સ્ટેશનથી પોતાના ગંતવ્ય સુધી પણ કેબ મેળવી શકશે.
દેશના કેટલાક મોટા રેલવે સ્ટેશનો પર Uberના પિક-અપ અને ડ્રોપ-ઓફ ઝોન પણ ઉપલબ્ધ છે, જેના કારણે મુસાફરોને સ્ટેશન પર કેબ શોધવામાં સરળતા રહેવાની અપેક્ષા છે.
શું Uber પર બુકિંગ IRCTC કરતાં ફાસ્ટ હશે?
Uberએ ટ્રેન ટિકિટ બુકિંગનો અનુભવ સરળ અને સ્મૂથ બનાવવાનો પ્રયાસ કર્યો છે. જોકે, Uber પર ટિકિટ બુક કરવાથી IRCTC કરતાં ટિકિટ કન્ફર્મ થવાની શક્યતા આપમેળે વધી જાય છે એવું માનવું યોગ્ય નથી. ટિકિટની ઉપલબ્ધતા અને કન્ફર્મેશન રેલવેના સત્તાવાર બુકિંગ સિસ્ટમમાં ઉપલબ્ધ સીટ પર જ નિર્ભર રહેશે.
Uberનું મલ્ટીમોડલ ટ્રાન્સપોર્ટ તરફ મોટું પગલું
Uber હવે માત્ર કેબ બુકિંગ એપ તરીકે નહીં પરંતુ મલ્ટીમોડલ મોબિલિટી પ્લેટફોર્મ તરીકે પોતાની સેવાઓનો વિસ્તાર કરી રહ્યું છે. એપમાં કેબ, ઓટો, બાઇક, મેટ્રો અને ઇન્ટરસિટી બસ જેવી સેવાઓ બાદ હવે ટ્રેન ટિકિટ બુકિંગનો ઉમેરો કરવામાં આવ્યો છે. આથી મુસાફરોને અલગ-અલગ એપમાં જવાને બદલે એક જ પ્લેટફોર્મ પર મુસાફરીનું આયોજન કરવાની સુવિધા મળશે.
