ક્વાર્ટર ફાઇનલમાં વડોદરાની કચ્છ સામે 11-1થી ધમાકેદાર જીત, અમદાવાદે ભાવનગરને 7-1થી હરાવ્યું
ગાંધીનગર
ગુજરાત સ્ટેટ ફૂટબોલ એસોસિએશન (GSFA) દ્વારા આયોજિત સબ-જૂનિયર બોયઝ ઇન્ટર-ડિસ્ટ્રિક્ટ ફૂટબોલ ટુર્નામેન્ટ-2026 ગાંધીનગર ખાતે ચાલી રહી છે. ટુર્નામેન્ટમાં આજે રમાયેલી ક્વાર્ટર ફાઇનલની ચારેય મેચમાં રોમાંચક મુકાબલા જોવા મળ્યા હતા. શાનદાર પ્રદર્શન સાથે વડોદરા, અમદાવાદ, રાજકોટ અને ગાંધીનગરની ટીમોએ સેમિફાઇનલમાં સ્થાન નિશ્ચિત કર્યું છે.
વડોદરાનો કચ્છ સામે ગોલનો વરસાદ
આજની પ્રથમ ક્વાર્ટર ફાઇનલમાં વડોદરાની ટીમે કચ્છ સામે જબરદસ્ત પ્રદર્શન કરતાં 11-1ના મોટા માર્જિનથી વિજય મેળવ્યો હતો. વડોદરાની જીતમાં પગી યુગે 6 ગોલ, આર્યવંશ ત્રિપાઠીએ 3 ગોલ અને મિતાંશ પટેલે 2 ગોલ નોંધાવી ટીમને શાનદાર જીત અપાવી હતી. કચ્છ તરફથી એકમાત્ર ગોલ સંજય મારવાડાએ કર્યો હતો.
અમદાવાદની ટીમનો ભાવનગર સામે દબદબો
બીજી ક્વાર્ટર ફાઇનલમાં મજબૂત ગણાતી અમદાવાદની ટીમે ભાવનગરને 7-1થી હરાવી સેમિફાઇનલમાં પ્રવેશ કર્યો હતો. અમદાવાદ તરફથી શશાંક સંજયે 3 ગોલ, માનવ પટેલે 3 ગોલ અને અવીજિત ગીરીએ 1 ગોલ કર્યો હતો. ભાવનગર તરફથી એકમાત્ર ગોલ અક્ષ અમરિત કુમારે નોંધાવ્યો હતો.
રાજકોટનો વલસાડ સામે એકતરફી વિજય
ત્રીજી ક્વાર્ટર ફાઇનલમાં રાજકોટની ટીમે વલસાડને કોઈ તક આપ્યા વિના 5-0થી શાનદાર પરાજય આપ્યો હતો. રાજકોટ તરફથી જિનય મહેતાએ 3 ગોલ અને હેનિલ કનેરિયાએ 2 ગોલ નોંધાવી ટીમની જીતમાં મહત્વની ભૂમિકા ભજવી હતી.
ગાંધીનગર પણ સેમિફાઇનલમાં
ચોથી અને અંતિમ ક્વાર્ટર ફાઇનલમાં યજમાન ગાંધીનગરની ટીમે સુરત સામે આક્રમક રમતનું પ્રદર્શન કર્યું હતું. ગાંધીનગરની ટીમે સુરતને 9-3થી હરાવી સેમિફાઇનલમાં પોતાનું સ્થાન નિશ્ચિત કર્યું હતું.
આવતીકાલે બે સેમિફાઇનલ મુકાબલા
ટુર્નામેન્ટમાં હવે આવતીકાલે બે સેમિફાઇનલ મેચ રમાશે. પ્રથમ સેમિફાઇનલમાં વડોદરા અને અમદાવાદની ટીમો આમને-સામને ટકરાશે, જ્યારે બીજી સેમિફાઇનલમાં રાજકોટ અને ગાંધીનગર વચ્ચે મુકાબલો થશે. બંને ટીમો ફાઇનલમાં સ્થાન મેળવવા માટે પૂરી તાકાત લગાવશે.
2 સપ્ટેમ્બરે ફાઇનલ
ટુર્નામેન્ટની ફાઇનલ મેચ 2 સપ્ટેમ્બર, 2026ના રોજ રમાશે. આ સાથે ગુજરાતના સબ-જૂનિયર સ્તરના પ્રતિભાશાળી ખેલાડીઓ વચ્ચેની સ્પર્ધાનો રોમાંચક અંત આવશે.
નેશનલ ટીમના કેમ્પ માટે પણ ખેલાડીઓની પસંદગી
આ ટુર્નામેન્ટ માત્ર જિલ્લા કક્ષાની સ્પર્ધા પૂરતી મર્યાદિત નથી. અહીંથી ગુજરાતની નેશનલ ટીમના કેમ્પ માટે પ્રતિભાશાળી ખેલાડીઓની પસંદગી પણ કરવામાં આવી રહી છે. તેથી યુવા ખેલાડીઓ માટે આ ટુર્નામેન્ટ પોતાની પ્રતિભા દર્શાવી આગળ વધવાની મહત્વપૂર્ણ તક બની છે.
