કેન્સરની વધુ ચોકસાઈથી તપાસ અને દર્દીની સ્થિતિ અનુસાર વ્યક્તિગત સારવાર માટે આધુનિક સુવિધાઓ ઉપલબ્ધ
અમદાવાદ
કેન્સરની સારવારમાં માત્ર ગાંઠનું સ્થાન જાણવું પૂરતું નથી, પરંતુ ગાંઠ કેટલી સક્રિય છે અને શરીરમાં તેનો પ્રભાવ કેટલો છે તે સમજવું પણ મહત્વપૂર્ણ છે. આ દિશામાં અમદાવાદ સ્થિત HCG આસ્થા કેન્સર સેન્ટર ખાતે અદ્યતન PET-CT, Gamma Camera અને Targeted Radionuclide Therapy જેવી સુવિધાઓ શરૂ કરવામાં આવી છે. આ સુવિધાઓના માધ્યમથી કેન્સરની વધુ ચોકસાઈથી તપાસ, રોગના ફેલાવાની સમજ અને દર્દીની સ્થિતિ અનુસાર સારવારનું આયોજન કરવામાં મદદ મળશે.
કેન્દ્રના આધુનિક Nuclear Medicine વિભાગમાં શરીરની અંદરની કામગીરી અને રોગને સમજવા માટેની અદ્યતન તપાસ તેમજ ચોક્કસ કેન્સર કોષોને નિશાન બનાવી સારવાર આપવાની સુવિધા એક જ સ્થળે ઉપલબ્ધ કરાવવામાં આવી છે.
Gamma Camera એક વિશેષ પ્રકારનું સ્કેનિંગ મશીન છે. સામાન્ય સ્કેનમાં શરીરના અંગોનો આકાર અને રચના જોવા મળે છે, જ્યારે Gamma Camera દ્વારા અંગ યોગ્ય રીતે કાર્ય કરી રહ્યું છે કે નહીં તેની માહિતી મેળવવામાં મદદ મળે છે.
આ તપાસ દરમિયાન દર્દીને ખૂબ જ ઓછી અને સુરક્ષિત માત્રામાં વિશેષ Tracer આપવામાં આવે છે. આ Tracer શરીરના કયા ભાગમાં અને કેવી રીતે પહોંચે છે તેની માહિતી Gamma Camera મેળવી તેના આધારે અંગોની કામગીરી દર્શાવતા ચિત્રો તૈયાર કરે છે.
Gamma Cameraનો ઉપયોગ હૃદય, થાઇરોઇડ, લીવર, ગોલબ્લેડર, કિડની અને મૂત્રતંત્ર સહિતના વિવિધ અંગોની તપાસમાં થઈ શકે છે.
PET-CTમાં PET અને CT એમ બે પ્રકારની તપાસ એકસાથે કરવામાં આવે છે. PET સ્કેન શરીરમાં વધુ સક્રિય કોષો અંગે માહિતી આપે છે, જ્યારે CT શરીરના અંગો અને ગાંઠની વિગતવાર રચના દર્શાવે છે.
કેન્સરના કોષો ઘણી વખત સામાન્ય કોષો કરતાં વધુ સક્રિય હોવાથી PET-CTની મદદથી કેન્સર ક્યાં છે, કેટલું ફેલાયું છે અને કેટલું સક્રિય છે તે સમજવામાં ડૉક્ટરોને મદદ મળે છે. આ માહિતી સારવારના આયોજન તેમજ સારવારની અસરનું મૂલ્યાંકન કરવામાં ઉપયોગી બની શકે છે.
HCG આસ્થા કેન્સર સેન્ટરના કન્સલ્ટન્ટ ન્યુક્લિયર મેડિસિન સ્પેશિયાલિસ્ટ ડૉ. સૂર્ય તેજા ગવાણીએ જણાવ્યું હતું કે દર્દીના કેન્સરના પ્રકાર અને તબીબી સ્થિતિ અનુસાર અલગ-અલગ Tracersનો ઉપયોગ કરવામાં આવે છે. તેમના જણાવ્યા મુજબ કેન્દ્રમાં FDG, PSMA, DOTA અને FAPI જેવા અદ્યતન Tracers ઉપલબ્ધ છે.
કેન્દ્ર ખાતે Targeted Radionuclide Therapy પણ શરૂ કરવામાં આવી છે. આ પદ્ધતિમાં ચોક્કસ કેન્સર કોષોને ઓળખીને તેમની નજીક રેડિયેશન પહોંચાડવાનો પ્રયાસ કરવામાં આવે છે, જેથી કેન્સરના કોષોને નુકસાન પહોંચાડી શકાય અને આસપાસના સ્વસ્થ કોષો પર અસર શક્ય તેટલી ઓછી રહે.
કેટલાક થાઇરોઇડ કેન્સરમાં Radioiodine Therapy, ચોક્કસ Neuroendocrine Tumoursમાં PRRT અને યોગ્ય દર્દીઓમાં પ્રોસ્ટેટ કેન્સર માટે PSMA Therapyનો ઉપયોગ થઈ શકે છે.
ડૉ. ગવાણીના જણાવ્યા અનુસાર, આવી સારવાર Precision Medicineનો ભાગ છે, જેમાં દર્દીના રોગના પ્રકાર અને સ્થિતિને ધ્યાનમાં રાખીને સારવારની પસંદગી કરવામાં આવે છે.
એક જ સ્થળે તપાસથી ફોલોઅપ સુધી
- અદ્યતન PET-CT અને Gamma Cameraની સુવિધા
- FDG, PSMA, DOTA અને FAPI જેવા Tracers ઉપલબ્ધ
- Targeted Radionuclide Therapyની શરૂઆત
- Radioiodine Therapy, PRRT અને PSMA Therapy જેવી સારવારની સુવિધા
- કેન્સરની તપાસ, સારવાર અને ફોલોઅપ કેર માટે નિષ્ણાતોની ટીમ દ્વારા વ્યક્તિગત સારવાર આયોજન
કેન્દ્રના જણાવ્યા અનુસાર, અદ્યતન ટેક્નોલોજી અને નિષ્ણાતોની ટીમના સંકલનથી દર્દીના રોગને વધુ વિગતવાર સમજવા અને તેની જરૂરિયાત અનુસાર સારવારનું આયોજન કરવાનો પ્રયાસ કરવામાં આવી રહ્યો છે.
