સ્વચ્છ રસોડું, શુદ્ધ ભોજન અને પારદર્શક વ્યવસ્થા: સુરતની પહેલને આરોગ્ય મંત્રી પ્રફુલ પાનશેરીયાએ બિરદાવી

મોટા વરાછાની ચુંદડી અને મૌસમ રેસ્ટોરન્ટની મુલાકાત લઈ સ્વચ્છતા તથા ગ્રાહક વિશ્વાસની પહેલને પ્રોત્સાહન આપ્યું; રસોડામાં CCTV અને ગુણવત્તાયુક્ત સામગ્રીની સ્પષ્ટ માહિતીની કરી પ્રશંસા

સુરત, મોટા વરાછા:

સ્વચ્છ રસોડું, ગુણવત્તાયુક્ત ભોજન અને ગ્રાહકો સાથે પારદર્શક વ્યવહાર—આ ત્રણ બાબતોને વ્યવસાયની નૈતિક જવાબદારી સમજીને અમલમાં મૂકતા રેસ્ટોરન્ટ સંચાલકો અન્ય માટે પ્રેરણારૂપ બની શકે છે. આ અભિગમને પ્રોત્સાહન આપવા રાજ્યના આરોગ્ય મંત્રી પ્રફુલ પાનશેરીયાએ સુરતના મોટા વરાછા સ્થિત ચુંદડી રેસ્ટોરન્ટ અને મૌસમ રેસ્ટોરન્ટની મુલાકાત લીધી હતી. આ મુલાકાતનો મુખ્ય ઉદ્દેશ તપાસ કે દબાણ લાવવાનો નહીં, પરંતુ સ્વચ્છતા અને પારદર્શકતા માટે સ્વયં પહેલ કરનારા સંચાલકોની કામગીરીને બિરદાવવાનો હતો.

રસોડામાં CCTV, ગ્રાહકોને ભોજન બનાવવાની પ્રક્રિયા જોવાની તક

રેસ્ટોરન્ટમાં સ્વચ્છતા જાળવવાની સાથે રસોડામાં CCTV કેમેરા ગોઠવવામાં આવ્યા છે. તેની ડિસ્પ્લે એવી રીતે રાખવામાં આવી છે કે ગ્રાહકો પણ ભોજન તૈયાર કરવાની પ્રક્રિયા જોઈ શકે. આ વ્યવસ્થાથી રસોડાની કામગીરી અંગે પારદર્શકતા જળવાય છે અને ગ્રાહકોમાં ભોજનની સ્વચ્છતા તથા ગુણવત્તા અંગે વિશ્વાસ વધે છે.

આ ઉપરાંત, રેસ્ટોરન્ટમાં ઉપયોગમાં લેવાતી ચીઝ, પનીર અને બટર જેવી સામગ્રીની બ્રાન્ડ અંગેની માહિતી દર્શાવતાં બોર્ડ પણ મૂકવામાં આવ્યાં છે. એનાલોગ પનીર કે ચીઝનો ઉપયોગ કરવામાં આવતો નથી તેવી સ્પષ્ટતા કરતાં બોર્ડ દ્વારા ગ્રાહકોને ઉપયોગમાં લેવાતી સામગ્રી અંગે જાણકારી આપવાનો પ્રયાસ કરવામાં આવ્યો છે. ગ્રાહકોને ભોજનમાં વપરાતી સામગ્રી વિશે સ્પષ્ટ માહિતી મળે અને તેઓ વિશ્વાસ સાથે ભોજન લઈ શકે તે દિશામાં કરવામાં આવેલી આ પહેલની આરોગ્ય મંત્રીએ પ્રશંસા કરી હતી.

રેસ્ટોરન્ટ સંચાલકનું ચુંદડી ઓઢાડી સન્માન

આ મુલાકાત દરમિયાન આરોગ્ય મંત્રી પ્રફુલ પાનશેરીયાએ રેસ્ટોરન્ટના માલિકને ચુંદડી ઓઢાડીને સન્માનિત કર્યા હતા. સ્વચ્છતા અને પારદર્શકતાને પ્રાથમિકતા આપતી આ કામગીરીને તેમણે અન્ય રેસ્ટોરન્ટ સંચાલકો માટે પ્રેરણાદાયી ગણાવી હતી. સાથે જ રાજ્યભરમાં ખાદ્ય વ્યવસાય સાથે સંકળાયેલા લોકો આવી વ્યવસ્થાઓ અપનાવે તેવો અનુરોધ કર્યો હતો.

મંત્રીએ જણાવ્યું હતું કે ગુજરાતના દરેક રેસ્ટોરન્ટમાં રસોડું સ્વચ્છ અને આરોગ્યપ્રદ હોવું જોઈએ. શક્ય હોય ત્યાં સુધી રસોડાની કામગીરી ગ્રાહકો જોઈ શકે તેવી પારદર્શક વ્યવસ્થા ઊભી કરવી જોઈએ, જેથી પીરસવામાં આવતા ભોજનની સ્વચ્છતા અને ગુણવત્તા અંગે તેમનો વિશ્વાસ મજબૂત બને. દરેક સંચાલકે પોતાની નૈતિક જવાબદારી સમજીને આવી પહેલ કરવી જરૂરી છે.

સુરતની પહેલ ગુજરાતભરમાં પ્રેરણારૂપ બને તેવો સંદેશ

સુરતથી શરૂ થયેલી આ પહેલને ગુજરાતભરમાં વિસ્તૃત કરવાની ભાવના સાથે મંત્રીએ અન્ય રેસ્ટોરન્ટ સંચાલકોને પણ રસોડામાં CCTV કેમેરા ગોઠવવા, સ્વચ્છતા અંગે પારદર્શકતા જાળવવા અને ગુણવત્તાયુક્ત સામગ્રીનો ઉપયોગ કરવા પ્રેરિત કર્યા હતા. આ અભિગમનો હેતુ માત્ર સરકારી નિયમોનું પાલન કરાવવાનો નથી, પરંતુ ખાદ્ય વ્યવસાયમાં જવાબદારી અને ગ્રાહક વિશ્વાસની સંસ્કૃતિ વિકસાવવાનો છે.

નવરાત્રિના પ્રથમ પાવન દિવસે માં જગદંબાને સૌના સ્વાસ્થ્ય અને સુખાકારી માટે પ્રાર્થના કરતાં મંત્રીએ જણાવ્યું હતું કે તેઓ પોતે તથા આરોગ્ય વિભાગના અધિકારીઓ આવી પહેલને પ્રોત્સાહન આપવા ઉપસ્થિત રહ્યા છે, જેથી અન્ય સંચાલકો પણ તેમાંથી પ્રેરણા મેળવે.

આ મુલાકાત દ્વારા જનઆરોગ્યની જાળવણીમાં સરકારની સાથે રેસ્ટોરન્ટ સંચાલકોની ભૂમિકા પણ મહત્ત્વપૂર્ણ હોવાનું રેખાંકિત કરવામાં આવ્યું હતું. સ્વચ્છ રસોડું, શુદ્ધ અને ગુણવત્તાયુક્ત ભોજન તથા પારદર્શક વ્યવસ્થા દ્વારા ગ્રાહકોનો વિશ્વાસ જીતવાની આવી પહેલ સમગ્ર ગુજરાતમાં પ્રસરશે તો તે સ્વસ્થ ગુજરાતના નિર્માણ તરફનું મહત્ત્વપૂર્ણ પગલું બની શકે છે.