ખાનપુર સ્થિત રાઇફલ ક્લબમાં મા અંબાની આરતી અને પૂજન સાથે કાર્યક્રમનો પ્રારંભ; હોદ્દેદારો, સભ્યો અને તેમના પરિવારજનોએ પરંપરાગત ગરબાની રમઝટ બોલાવી
અમદાવાદ:
અમદાવાદ મિલિટરી એન્ડ રાઇફલ ટ્રેનિંગ એસોસિએશન (A.M. & R.T.A.) દ્વારા અમદાવાદના ખાનપુર સ્થિત રાઇફલ ક્લબ ખાતે ભક્તિભાવ અને પરંપરાગત ઉત્સાહ સાથે ગરબા કાર્યક્રમનું આયોજન કરવામાં આવ્યું હતું. આ કાર્યક્રમમાં ક્લબના સભ્યો અને તેમના પરિવારજનોએ ઉત્સાહભેર ભાગ લઈને મા અંબાની આરાધના કરી હતી અને પરંપરાગત ગરબાની રમઝટ બોલાવી હતી.
કાર્યક્રમનો પ્રારંભ મા અંબાની આરતી અને પૂજન સાથે કરવામાં આવ્યો હતો. આ પ્રસંગે સર્વના સુખ, શાંતિ, સમૃદ્ધિ અને કલ્યાણ માટે માતાજીના આશીર્વાદની પ્રાર્થના કરવામાં આવી હતી. ત્યારબાદ ઉપસ્થિત સભ્યો અને તેમના પરિવારજનોએ પરંપરાગત ગરબામાં ભાગ લીધો હતો. ભક્તિ, એકતા અને આનંદના માહોલમાં યોજાયેલા આ કાર્યક્રમમાં સૌએ ઉત્સાહપૂર્વક ભાગ લઈને ઉત્સવની ઉજવણી કરી હતી.
આ પ્રસંગે એસોસિએશનના પ્રમુખ અનિલ પટેલ, માનદ મહામંત્રી ભાવેશ પટેલ અને ઉપપ્રમુખ મનીષ પટેલ સહિત અન્ય મહાનુભાવો, એસોસિએશનના સભ્યો અને તેમના પરિવારજનો ઉપસ્થિત રહ્યા હતા. તમામ હોદ્દેદારો અને સભ્યોએ મા અંબાની આરતીમાં સહભાગી બની ગરબા કાર્યક્રમની ઉજવણીને યાદગાર બનાવી હતી.
આ કાર્યક્રમ દ્વારા એસોસિએશને ભારતીય સંસ્કૃતિ અને પરંપરાઓને પ્રોત્સાહન આપવા સાથે સભ્યો વચ્ચે સામાજિક એકતા, પરસ્પર સદભાવ અને ભાઈચારાની ભાવનાને વધુ મજબૂત કરવાનો સંદેશ આપ્યો હતો.
કાર્યક્રમના અંતે મા અંબાને સર્વના જીવનમાં સુખ, શાંતિ, સમૃદ્ધિ અને ખુશહાલી જળવાઈ રહે તેવી પ્રાર્થના સાથે ગરબા કાર્યક્રમનું આનંદમય સમાપન થયું હતું.
