ત્રણ કેટેગરીમાં 60 ક્લબોનો રેકોર્ડબ્રેક સહભાગ; એક જ દિવસમાં 27 મેચો રમાઈ, અનેક ટીમોએ મોટા અંતરથી જીત મેળવી
અમદાવાદ:
ગુજરાત સ્ટેટ ફૂટબોલ એસોસિએશન (GSFA) દ્વારા આયોજિત અંડર-13, અંડર-15 અને અંડર-17 બોયઝ યુથ લીગ ક્લબ ચેમ્પિયનશિપ-2026માં રોમાંચક મુકાબલાઓ સાથે ગોલનો વરસાદ જોવા મળ્યો હતો. અમદાવાદ, આણંદ અને વડોદરા ખાતે રમાયેલી મેચોમાં વિવિધ ક્લબોએ શાનદાર પ્રદર્શન કર્યું હતું. ત્રણેય કેટેગરીમાં મળીને કુલ 60 ક્લબો ભાગ લઈ રહી છે, જે અત્યાર સુધીનો રેકોર્ડ છે. ચેમ્પિયનશિપની દરેક કેટેગરીમાં વિજેતા બનનારી ટીમને ઓલ ઇન્ડિયા ફૂટબોલ ફેડરેશન (AIFF) દ્વારા આયોજિત યુથ લીગમાં રમવાની તક મળશે.
આ ચેમ્પિયનશિપમાં ગુજરાતની નામાંકિત ફૂટબોલ ક્લબો ભાગ લઈ રહી છે. અંડર-13 અને અંડર-15 કેટેગરીમાં 23-23 ક્લબો, જ્યારે અંડર-17 કેટેગરીમાં 14 ક્લબો મેદાનમાં છે. યુવા ખેલાડીઓને પોતાની પ્રતિભા દર્શાવવા અને રાષ્ટ્રીય સ્તરની સ્પર્ધા સુધી પહોંચવા માટે આ ટુર્નામેન્ટ મહત્ત્વપૂર્ણ મંચ પૂરું પાડી રહી છે.
અંડર-13: બરોડા, સીવીએમ અને એઆરએ એફસીની મોટી જીત
અંડર-13 કેટેગરીમાં બરોડા એફએએ ફ્લોરી એસએને 8-0થી અને સીવીએમ એફસીએ અનસ્ટોપેબલ એફસીને 13-0થી હરાવીને પ્રભાવશાળી જીત નોંધાવી હતી. શાર્પશૂટર એફસીએ એસજીવીપી એફએને 3-0થી, માસ્ટર એફસીએ એસજીવીપી એફસી એનઇને 3-0થી અને બ્લૂ ટાઇગર એફસીએ નવરચના એસએને 3-1થી પરાજય આપ્યો હતો.
ગાંધીનગર એફસીએ રેન્જર એફસીને 5-2થી હરાવી હતી, જ્યારે કહાની એફસી અને બીએફએ યુનાઇટેડ વચ્ચેનો મુકાબલો 4-4થી ડ્રો રહ્યો હતો.
અમદાવાદના એઆરએ ખાતે રમાયેલી અન્ય મેચોમાં કર્ણાવતી એફસીએ ઓએમએમ એફસીને 7-1થી, સેવી સ્વરાજ એફસીએ સૂર્યવંશી એફસીને 8-1થી અને એઆરએ એફસીએ લીવે એફસીને 10-0થી હરાવી હતી. એસએજી એફએએ રાઇઝિંગ સ્ટાર એફએ સામે 5-3થી જીત મેળવી હતી.
અંડર-15: એસકે યુનાઇટેડ અને એનસીડી એફસીનો ગોલવર્ષા સાથે વિજય
અંડર-15 કેટેગરીમાં એસકે યુનાઇટેડ એફસીએ ગાંધીનગર એફસીને 14-0થી હરાવીને સૌથી પ્રભાવશાળી પ્રદર્શનોમાંનું એક નોંધાવ્યું હતું. આ મેચમાં સાવિને સાત ગોલ ફટકારીને ટીમની જીતમાં મહત્ત્વપૂર્ણ યોગદાન આપ્યું હતું.
એનસીડી એફસીએ અનસ્ટોપેબલ એફસીને 13-0થી પરાજય આપ્યો હતો. આ મેચમાં ચંદ્રવીરસિંહે ચાર ગોલ નોંધાવ્યા હતા. અન્ય મુકાબલાઓમાં શાર્પશૂટર એફસીએ સિગનસ એસએને 4-2થી અને અમદાવાદ યુનાઇટેડ એફસીએ એસજીવીપી એફસી જૂનાગઢને 4-0થી હરાવ્યું હતું.
અંડર-17: એસકે યુનાઇટેડ એફસીનો 21-0થી ભવ્ય વિજય
અંડર-17 કેટેગરીમાં એસકે યુનાઇટેડ એફસીએ કાજાં એફસીને 21-0થી હરાવીને દિવસની સૌથી મોટી જીત નોંધાવી હતી. આ મુકાબલામાં જ્યાન પુરોહિતે છ ગોલ ફટકારીને શાનદાર પ્રદર્શન કર્યું હતું.
કહાની એફસીએ કર્ણાવતી એફસીને 7-0થી હરાવી હતી. આ મેચમાં ખુમાન્થેમે ચાર ગોલ નોંધાવ્યા હતા. એઆરએ એફસીએ પાનોલી એફસીને 10-0થી પરાજય આપ્યો હતો, જ્યારે એસજીવીપી એફસીએ દ્વિવેદી બ્રધર્સ એફસીને 7-0થી હરાવી હતી. એસજીવીપી એફસીની જીતમાં સાજિદ અલીએ ચાર ગોલ ફટકાર્યા હતા.
યુવા પ્રતિભાઓ માટે રાષ્ટ્રીય સ્તરે પહોંચવાની તક
ગુજરાત સ્ટેટ ફૂટબોલ એસોસિએશનની આ ચેમ્પિયનશિપ રાજ્યમાં યુવા ફૂટબોલને પ્રોત્સાહન આપવા માટે મહત્ત્વપૂર્ણ સાબિત થઈ રહી છે. ત્રણેય કેટેગરીમાં 60 ક્લબોની ભાગીદારી અને મોટા સ્કોર સાથેની જીતો યુવા ખેલાડીઓની પ્રતિભા તથા સ્પર્ધાત્મક ક્ષમતાને ઉજાગર કરે છે. આયોજકોના જણાવ્યા અનુસાર, વિવિધ કેટેગરીમાં ચેમ્પિયન બનનારી ટીમોને AIFFની યુથ લીગમાં રમવાની તક મળશે.
આજે વિવિધ કેટેગરીમાં કુલ 27 મેચો રમાડવામાં આવી હતી, જેમાં અનેક ટીમોએ આક્રમક રમત અને ગોલ કરવાની ક્ષમતા દર્શાવી હતી.
