એકતા પરેડમાં અંબાજીના આદિવાસી બાળકોની ‘હેટ્રિક’: સતત ત્રીજી વખત ગુંજશે બેગપાઇપર બેન્ડના સૂર

વડાપ્રધાન નરેન્દ્ર મોદીની ઉપસ્થિતિમાં સ્ટેચ્યુ ઓફ યુનિટી ખાતે રાષ્ટ્રીય એકતા દિવસની પરેડમાં પ્રસ્તુતિ આપશે ; ‘ભીખ નહીં, શિક્ષણ’ના મંત્રથી વંચિત બાળકોને મળી નવી ઓળખ

સુખદેવ વસાવા. રાજપીપળા:

સરદાર વલ્લભભાઈ પટેલની જન્મજયંતી નિમિત્તે એકતાનગર સ્થિત સ્ટેચ્યુ ઓફ યુનિટી ખાતે યોજાનારી રાષ્ટ્રીય એકતા દિવસની ઉજવણીમાં અંબાજીના આદિવાસી બાળકો વધુ એક વખત પોતાની પ્રતિભાનો પરિચય આપવા સજ્જ બન્યા છે. બનાસકાંઠા જિલ્લાના અંબાજી વિસ્તારમાં રહેતા વંચિત આદિવાસી સમુદાયના 25 બાળકોની બેગપાઇપર બેન્ડ ટીમ સતત ત્રીજી વખત રાષ્ટ્રીય કક્ષાની ‘એકતા પરેડ’માં પ્રસ્તુતિ આપશે. વડાપ્રધાન નરેન્દ્રભાઈ મોદીની ઉપસ્થિતિમાં આ બાળકો દેશભક્તિના સૂર રેલાવી ગુજરાત માટે ગૌરવની ક્ષણ સર્જશે.

છ વર્ષના કઠોર પ્રશિક્ષણથી મેળવી નવી ઓળખ

‘ભીખ નહીં, શિક્ષણ’ના મૂળમંત્ર સાથે શ્રી શક્તિ સેવા કેન્દ્ર (SSSK), અંબાજી દ્વારા છેલ્લા 16 વર્ષથી વંચિત બાળકોના જીવનમાં પરિવર્તન લાવવાનું કાર્ય કરવામાં આવી રહ્યું છે. સંસ્થાના માર્ગદર્શક નિતિન પરમારના નેતૃત્વ હેઠળ ચાલતા આ સેવાયજ્ઞે અનેક બાળકોને શિક્ષણ, શિસ્ત અને કૌશલ્યના માર્ગે આગળ વધવાની તક આપી છે.

એક સમયે ભીખ માગવા કે બાલમજૂરી કરવા મજબૂર બનેલાં કેટલાંક બાળકો આજે પોતાની મહેનત અને પ્રતિભાથી દેશભરમાં ઓળખ મેળવી રહ્યાં છે. સંસ્થા દ્વારા 14થી 18 વર્ષની વયજૂથનાં 25 આદિવાસી બાળકોને બેગપાઇપર બેન્ડની વિશેષ તાલીમ આપવામાં આવી છે. છેલ્લા છ વર્ષથી આ બાળકો નિયમિત રિયાઝ, કઠોર શિસ્ત અને સતત અભ્યાસ દ્વારા પોતાની કળાને નિખારી રહ્યાં છે.

સંગીત સાથે આત્મવિશ્વાસ અને ટીમવર્કના સંસ્કાર

બેગપાઇપર બેન્ડની તાલીમ માત્ર સંગીત પૂરતી મર્યાદિત રહી નથી. આ પ્રક્રિયાએ બાળકોમાં આત્મવિશ્વાસ, સમયપાલન, નેતૃત્વ, સામૂહિક જવાબદારી અને ટીમવર્ક જેવા ગુણોનો વિકાસ કરવામાં પણ મહત્ત્વની ભૂમિકા ભજવી છે. વિવિધ બેન્ડ સ્પર્ધાઓમાં ભાગ લઈને બાળકોએ પોતાની પ્રતિભાને વધુ મજબૂત બનાવી છે.

યોગ્ય માર્ગદર્શન અને તક મળે તો વંચિત પરિવારોનાં બાળકો પણ સફળતાનાં શિખરો સર કરી શકે છે, તે આ બાળકોની સફર સાબિત કરે છે. પહાડોના ખોળેથી નીકળીને રાષ્ટ્રીય મંચ સુધી પહોંચેલા આ બાળકો આજે અન્ય બાળકો માટે પણ પ્રેરણારૂપ બન્યાં છે.

સ્ટેચ્યુ ઓફ યુનિટીના પટાંગણમાં રિહર્સલ શરૂ

રાષ્ટ્રીય એકતા દિવસની ઉજવણીને લઈને સ્ટેચ્યુ ઓફ યુનિટીના પટાંગણમાં 25 બાળકોની બેન્ડ ટીમ દ્વારા રિહર્સલ શરૂ કરી દેવામાં આવ્યું છે. બાળકો ઉત્સાહ, એકાગ્રતા અને શિસ્ત સાથે પરેડની તૈયારી કરી રહ્યાં છે. સરદાર વલ્લભભાઈ પટેલની વિશ્વની સૌથી ઊંચી પ્રતિમાની પૃષ્ઠભૂમિમાં જ્યારે બેગપાઇપર બેન્ડના સૂર ગુંજે છે, ત્યારે સમગ્ર વાતાવરણ દેશભક્તિના રંગે રંગાઈ ઊઠે છે.

આ બાળકો સતત ત્રીજા વર્ષે એકતા પરેડમાં ભાગ લેવા જઈ રહ્યાં છે, જે તેમની નિયમિત મહેનત અને સંસ્થાના સતત પ્રયાસોનું પરિણામ છે. વડાપ્રધાન નરેન્દ્રભાઈ મોદીની ઉપસ્થિતિમાં યોજાનારી આ રાષ્ટ્રીય કક્ષાની ઉજવણીમાં પ્રસ્તુતિ આપવી બાળકો માટે વિશેષ ગૌરવની બાબત છે.

શિક્ષણ, સંસ્કાર અને દેશભક્તિનો પ્રેરણાદાયી સંગમ

અંબાજીના આ બાળકોની સફળતા માત્ર બેન્ડની પ્રસ્તુતિ પૂરતી સીમિત નથી. તે વંચિત બાળકોને યોગ્ય દિશા, તાલીમ અને તક મળે તો તેમનું જીવન કેવી રીતે બદલાઈ શકે છે તેનું જીવંત ઉદાહરણ છે. શ્રી શક્તિ સેવા કેન્દ્રના પ્રયાસોથી બાળકોમાં કૌશલ્યની સાથે શિસ્ત અને રાષ્ટ્રભાવનાનો પણ વિકાસ થયો છે.

રાષ્ટ્રીય એકતા દિવસની પરેડમાં સતત ત્રીજી વખત ભાગ લઈને આ બાળકો પોતાની પ્રતિભા દ્વારા આદિવાસી સમાજનું ગૌરવ વધારશે. ‘ભીખ નહીં, શિક્ષણ’ના સંકલ્પથી શરૂ થયેલી આ યાત્રા આજે દેશભક્તિના સૂર સાથે નવી ઊંચાઈએ પહોંચી છે. અંબાજીના આ ‘પહાડોમાં તરાશેલા હીરા’ની સફળતા ભવિષ્યની પેઢી માટે પ્રેરણાનું પ્રતીક બની રહેશે.