15 ટકા લોકોએ પશ્ચિમ બંગાળના મુખ્યમંત્રી મમતા બેનરજીની તરફેણ કરી, દિલ્હીના સીએમ અરવિંદ કેજરીવાલને પણ 15 ટકા લોકોનું સમર્થન મળ્યું
નવી દિલ્હી
વિપક્ષનું ઈન્ડિયા ગઠબંધન 2024ની લોકસભા ચૂંટણીમાં એનડીએ ગઠબંધનને પડકારવા સજ્જ છે. કુલ 26 વિરોધ પક્ષોની બે સફળ બેઠકો બાદ હવે ત્રીજી બેઠક 31 ઓગસ્ટ અને 1 સપ્ટેમ્બરે મુંબઈમાં યોજાવાની છે. આ બેઠકમાં ઈન્ડિયા ગઠબંધનના સંયોજક અને બેઠકોની વહેંચણી જેવા મુદ્દાઓ પર પણ ચર્ચા થવાની આશા છે. જેના પર બધાની નજર ટકેલી છે.
જોકે, મહાગઠબંધનની આગેવાની કોણ કરશે તે અંગે લોકોના મનમાં અનેક સવાલો છે. દરમિયાન સીવોટરના મૂડ ઓફ ધ નેશન સર્વેના માધ્યમથી વિપક્ષી ગઠબંધનના સંયોજક કોણ હોવા જોઈએ? 26 પક્ષોના ઈન્ડિયા ગઠબંધનનું નેતૃત્વ કોણ કરી શકે છે? તેના જવાબો જાણવા પ્રયાસ કરાયો હતો. સરવેમાં કોંગ્રેસ નેતા રાહુલ ગાંધી, આપના વડા અરવિંદ કેજરીવાલ અને તૃણમૂલ કોંગ્રેસના સુપ્રીમો મમતા બેનરજીનું નામ સૂચવવામાં આવ્યું હતું, જેના પર લોકોએ પોતાનો અભિપ્રાય આપ્યો હતો.
સરવે અનુસાર 26 વિપક્ષી પાર્ટીઓના ગઠબંધનનું નેતૃત્વ કરવા માટે કોંગ્રેસ નેતા રાહુલ ગાંધી પર પ્રથમ પસંદગી ઉતારાઈ છે. સરવેમાં ભાગ લેનારા સૌથી વધુ 24 ટકા લોકોનું માનવું છે કે રાહુલ ગાંધી ઈન્ડિયા ગઠબંધનના સંયોજક તરીકેનો શ્રેષ્ઠ વિકલ્પ છે. જ્યારે 15 ટકા લોકોએ પશ્ચિમ બંગાળના મુખ્યમંત્રી મમતા બેનરજીની તરફેણ કરી હતી. દિલ્હીના સીએમ અરવિંદ કેજરીવાલને પણ 15 ટકા લોકોનું સમર્થન મળ્યું છે.
રાહુલ ગાંધીના નેતૃત્વમાં ભારત જોડો યાત્રાને લઈને લોકોના અભિપ્રાય પણ લેવામાં આવ્યા હતા. સવાલ પૂછવામાં આવ્યો કે શું ‘ભારત જોડો યાત્રા’ રાહુલ ગાંધી માટે ફળદાયી રહેશે? તેના પર સૌથી વધુ 44 ટકા લોકોનું કહેવું છે કે ‘ભારત જોડો યાત્રા’થી રાહુલ ગાંધીની સાર્વજનિક છબી સુધરી છે. 33 ટકા લોકોએ કહ્યું કે તેમની છબીમાં કોઈ ફેરફાર થયો નથી. તેમજ 13 ટકા લોકોનું માનવું છે કે આ મુલાકાત બાદ રાહુલ ગાંધીની છબી વધુ ખરાબ થઈ છે. મૂડ ઓફ ધ નેશન સર્વે 15 જુલાઈ 2023 થી 14 ઓગસ્ટ 2023 વચ્ચે હાથ ધરવામાં આવ્યો હતો. સર્વેના આંકડા 24 ઓગસ્ટના રોજ જાહેર કરવામાં આવ્યા હતા. લોકસભા ચૂંટણી 2024 પહેલા સીટોના અંદાજ અંગે તમામ રાજ્યોના કુલ 25,951 મતદારો સાથે વાત કર્યા બાદ આ આંકડા જાહેર કરવામાં આવ્યા હતા.
