આર્મી સ્પોર્ટ્સ ઇન્સ્ટિટ્યૂટના તાલીમાર્થીઓએ ઉઝબેકિસ્તાન અને ચાઇનીઝ તાઈપેઈને હરાવીને પોડિયમ પર સ્થાન મેળવ્યું, તરવૈયા કુશાગ્ર રાવતે 1500 મીટર ફ્રીસ્ટાઇલમાં બ્રોન્ઝ મેડલ જીત્યો
અમદાવાદ
અમદાવાદના વીર સાવરકર સ્પોર્ટ્સ કોમ્પ્લેક્સ ખાતે યોજાયેલી 11મી એશિયન એક્વેટિક્સ ચેમ્પિયનશિપના બીજા દિવસે, ભારતીય ડાઇવર ખેલાડી ઇન્દિવર સાઈરામ અને વિલ્સન સિંહ નિંગથૌજમે ઐતિહાસિક પ્રદર્શન સાથે પુરુષોની 10 મીટર સિંક્રનાઇઝ્ડ ડાઇવિંગ ઇવેન્ટમાં બ્રોન્ઝ મેડલ જીત્યા.
18 વર્ષીય ઇન્દિવર સાઈરામ અને 32 વર્ષીય વિલ્સન સિંહ નિંગથૌજમ, બંને મણિપુરના રહેવાસી છે, અને પુણેમાં આર્મી સ્પોર્ટ્સ ઇન્સ્ટિટ્યૂટ (ASI) ખાતે તાલીમ લઈ રહ્યા છે. તેઓએ 300.66 પોઈન્ટ સાથે શાનદાર બ્રોન્ઝ મેડલ જીત્યો. તેઓ ચીનના ઝાંગ્યુ કુઇ, ઝાનહોંગ ઝુ (381.75) અને મલેશિયાના બર્ટ્રાન્ડ રોડિકટે લિસેઝ, એનરિક એમ. હેરોલ્ડ (મલેશિયા) (329.73) થી પાછળ રહ્યા. આ સ્પર્ધામાં કુલ પાંચ દેશોએ ભાગ લીધો હતો, જેમાં ઉઝબેકિસ્તાન અને ચાઇનીઝ તાઇપેઈનો સમાવેશ થાય છે, જે અનુક્રમે ચોથા અને પાંચમા સ્થાને રહ્યા.
ભારતીય ડાઇવરોએ આ પ્રતિષ્ઠિત સ્પર્ધામાં ક્યારેય મેડલ જીત્યો નથી પણ હવે તેઓ આગામી વર્ષે જાપાનના નાગોયામાં યોજાનારી એશિયન ગેમ્સમાં સ્થાન મેળવવા માટે મજબૂત દાવેદાર બન્યા છે.
આજે તેમના મેડલ વિશે વાત કરતાં આ જોડીના કોચ, ઓસ્ટ્રેલિયાના શેનોન રોયે, જેમને ASI દ્વારા નિયુક્ત કરવામાં આવ્યા હતા, તેમણે કહ્યું કે , “હું છેલ્લા બે વર્ષથી તેમની સાથે કામ કરી રહ્યો છું, અને સાચું કહું તો, તેઓ બાકીના વિશ્વ અને એશિયા કરતા ઘણા પાછળ હતા. પરંતુ છેલ્લા છ મહિનામાં, અમે ખાસ કરીને સિંક્રનાઇઝ્ડ ઇવેન્ટ્સ, પ્લેટફોર્મ અને 3 મીટર સ્પ્રિંગબોર્ડ ઇવેન્ટ્સ પર ધ્યાન કેન્દ્રીત કર્યું છે. અમે વિદેશમાં કેમ્પ, મલેશિયામાં અને સિંગાપોરમાં વર્લ્ડ ચેમ્પિયનશિપમાં ઘણો સમય વિતાવ્યો છે.
તેમણે વધુમાં જણાવ્યું કે, “તેમને સિંક્રનાઇઝ્ડ જોડી તરીકે સ્પર્ધા કરવા માટે તૈયાર કરવા, જે વ્યક્તિગત સ્પર્ધાથી ખૂબ જ અલગ છે, તે પ્રથમ પ્રાથમિકતા હતી. પરંતુ તેમને વર્લ્ડ ચેમ્પિયનશિપની ઉચ્ચ ગુણવત્તા અને ઉચ્ચ ક્ષમતાનો પરિચય કરાવવો પણ મહત્વપૂર્ણ હતું. “
સ્વિમિંગમાં, 12 ભારતીય તરવૈયાઓ પોતપોતાની ઇવેન્ટની ફાઇનલમાં પહોંચ્યા હતા, અને બે રિલે ટીમો પણ ફાઇનલમાં પહોંચી હતી. જોકે, 1500 મીટર ફ્રીસ્ટાઇલમાં ફક્ત કુશાગ્ર રાવતે બ્રોન્ઝ મેડલ જીત્યો હતો. તેણે 15:30.88 નો સમય આપ્યો હતો, જ્યારે વિયેતનામના હુય હોઆંગ ન્ગુયેને 15:15.01ના સમય સાથે ગોલ્ડ મેડલ જીત્યો હતો, જ્યારે ઉઝબેકિસ્તાનના ઇલ્યા સિબિર્ત્સેવે 15:23.35ના સમય સાથે સિલ્વર મેડલ જીત્યો હતો.
