ગવર્મેન્ટ સ્પાઇન ઇન્સ્ટિટ્યૂટ ખાતે આધુનિક સાધનોનું આરોગ્ય રાજ્યમંત્રી પ્રફુલ પાનશેરિયાના હસ્તે લોકાર્પણ

શહેરી વિકાસ રાજ્યમંત્રી દર્શનાવાઘેલા અને ONGC ના જનરલ મેનેજર શિલાદિત્ય સરકારની વિશેષ ઉપસ્થિતિ

અમદાવાદ

અમદાવાદની ગવર્મેન્ટ (CL&SC) સ્પાઇન ઇન્સ્ટિટ્યૂટ, સિવિલ હોસ્પિટલ ખાતે આરોગ્ય મંત્રી પ્રફુલ પાનશેરિયાના હસ્તે પ્રોસ્થેટિક્સ અને ઓર્થોટિક્સ (P&O) વિભાગ માટેના આધુનિક સાધનોનો લોકાર્પણ સમારોહ યોજાયો હતો. આ પ્રસંગે અતિથિ વિશેષ તરીકે શહેરી વિકાસ રાજ્યમંત્રી દર્શના વાઘેલા તથા ONGC ના જનરલ મેનેજર (CSR) શિલાદિત્ય સરકાર ઉપસ્થિત રહ્યા હતા.

આ પ્રસંગે પ્રફુલ પાનશેરિયાએ આ સાધનો માટે આર્થિક સહયોગ બદલ ઓઇલ એન્ડ નેચરલ ગેસ કોર્પોરેશન(ONGC)ની સામાજિક જવાબદારીને બિરદાવતાં જણાવ્યું કે આ અત્યાધુનિક સાધનોથી સંસ્થાના P&O વિભાગની કામગીરી વધુ સચોટ અને ઝડપી બનશે. જેનો સીધો લાભ અહીં સારવાર લેતા હજારો દર્દીઓને મળશે. તેમણે રાજ્યની આરોગ્ય સેવાઓને મજબૂત કરવા બદલ ONGCને અભિનંદન પાઠવ્યા હતા.

આ અવસરે રાજ્યમંત્રી દર્શના વાઘેલાએ પણ આ પહેલની પ્રશંસા કરી હતી. કાર્યક્રમના પ્રારંભમાં ગવર્મેન્ટ (CL&SC) સ્પાઇન ઇન્સ્ટિટ્યૂટના નિયામક ડૉ. પીયૂષ મિત્તલે સૌ ઉપસ્થિતોનું સ્વાગત કર્યું હતું અને સંસ્થાની કામગીરી તેમજ નવાં સાધનોની ઉપયોગીતા વિશે વિગતવાર માહિતી આપી હતી.