ભારતની પ્રતિભાનો ઉપયોગ બીજાઓની સેવા માટે કરો , સેમ પિત્રોડાના નિવેદનથી વિવાદ; ભાજપે કોંગ્રેસ પર નિશાન સાધ્યું

ઓવરસીઝ કોંગ્રેસના વડા સામ પિત્રોડાએ ભારતની કાચી પ્રતિભા વિશે વાત કરતા આપેલા નિવેદન પર ભાજપે કોંગ્રેસ પાર્ટી પર નિશાન સાધ્યું છે. એક મુલાકાતમાં, પિત્રોડાએ ભારતના ટેકનોલોજી ઇકોસિસ્ટમ વિશે મહત્વપૂર્ણ ટિપ્પણીઓ કરી હતી

એસવીએન,નવી દિલ્હી  

ઇન્ડિયન ઓવરસીઝ કોંગ્રેસના વડા સેમ પિત્રોડાના નિવેદનથી ફરી એકવાર વિવાદ થયો છે. પિત્રોડાએ દાવો કર્યો હતો કે ભારતે બીજાઓની સેવા કરવા માટે ‘ કાચી ‘ પ્રતિભા ઉત્પન્ન કરી છે. ભારતના ટેકનોલોજી ઇકોસિસ્ટમ પર ટિપ્પણી કરતા તેમણે કહ્યું કે  શરમજનક વાત છે કે 1.5 અબજ લોકો ધરાવતા દેશ પાસે પોતાની ઓપરેટિંગ સિસ્ટમ નથી.  સેમ પિત્રોડાના આ નિવેદન પર ભાજપે આકરી પ્રતિક્રિયા આપી છે. ભાજપે આ નિવેદન માટે કોંગ્રેસ પર સીધું નિશાન સાધ્યું છે. જોકે , આ પહેલીવાર નથી જ્યારે પિત્રોડાના નિવેદનથી વિવાદ થયો હોય. ભાજપે પિત્રોડાના  ભારત માટે ખરાબ બોલવાનો  આરોપ લગાવ્યો હતો .
સેમ પિત્રોડાએ શું કહ્યું ?

એક મુલાકાતમાં , સેમ પિત્રોડાએ જણાવ્યું હતું કે ભારતે કાચી  યુવા પ્રતિભાનો મોટો આધાર બનાવ્યો છે , પરંતુ સ્થાનિક નવીનતા માટે તેનો ઉપયોગ કરવામાં નિષ્ફળ રહ્યું છે. તેમણે કહ્યું કે આપણે ઘણી બધી યુવા પ્રતિભા બનાવી છે , પરંતુ તે કાચી છે. આ પ્રતિભા આખરે વિશ્વભરની બહુરાષ્ટ્રીય કંપનીઓને તેમના પ્રોગ્રામિંગ , બેંકિંગ , કાનૂની પ્રણાલીઓ , ઉદ્યોગ , ઉત્પાદન અને લોજિસ્ટિક્સમાં મદદ કરે છે. તેમણે વધુમાં કહ્યું કે ભારતે પોતાના વૈશ્વિક સ્તરના ટેકનોલોજી ઉત્પાદનો બનાવ્યા નથી. તેમણે કહ્યું કે આ પ્રતિભાનો ઉપયોગ અન્ય લોકોની સેવા કરવા માટે કરવામાં આવ્યો છે.

પિત્રોડાએ કહ્યું કે ન તો આપણે પોતાનું સોશિયલ મીડિયા પ્લેટફોર્મ બનાવ્યું છે , ન તો માઈક્રોસોફ્ટ જેવી મોટી કંપની શરૂ કરી છે. ઓવરસીઝ કોંગ્રેસના વડાએ ઉમેર્યું કે આપણે પોતાની ઓપરેટિંગ સિસ્ટમ પણ બનાવી નથી. તેમણે કહ્યું , આ શરમજનક છે કે 1.5 અબજ લોકો ધરાવતા દેશ પાસે પોતાની ઓપરેટિંગ સિસ્ટમ નથી. આપણે મોબાઈલ ફોન માટે ઓપરેટિંગ સિસ્ટમ પણ બનાવી શક્યા નથી. આપણે ખરેખર આપણી પ્રતિભાનો ઉપયોગ બીજાઓની સેવા કરવા માટે કર્યો છે.

ભાજપે નિશાન સાધ્યું

ભાજપે આ મુદ્દે કોંગ્રેસ પાર્ટીની આકરી ટીકા કરી હતી. પાર્ટીના પ્રવક્તા શહજાદ પૂનાવાલાએ કહ્યું હતું કે  લશ્કર-એ-કોંગ્રેસના મુખ્ય સલાહકાર  એ ફરી એકવાર જુઠ્ઠું બોલીને ભારતની મજાક ઉડાવી છે. પૂનાવાલાએ ઉમેર્યું હતું કે કોંગ્રેસ પાર્ટીના નિંદનીય કાર્યો પછી, હવે  લશ્કર-એ-કોંગ્રેસના મુખ્ય સલાહકાર  સેમ પિત્રોડા આવે છે .
ભાજપના પ્રવક્તાએ કહ્યું કે પિત્રોડા ફરી એકવાર ભારતને બદનામ કરવાન એજન્ડાને આગળ વધારે છે. તેમણે કહ્યું કે અંકલ સેમ જૂઠું બોલીને ભારતની મજાક ઉડાવે છે. પૂનાવાલાએ સોશિયલ મીડિયા પ્લેટફોર્મ X પર એક પોસ્ટમાં કહ્યું કે કમનસીબે, કોંગ્રેસનું એકમાત્ર મિશન જૂઠું બોલીને ભારતને બદનામ કરવાનું છે. પછી ભલે તે આપણું UPI હોય , આત્મનિર્ભર રસીઓ હોય, ઓપરેશન સિંદૂર હોય, કે પછી એવું કહેવું હોય કે જ્યારે આપણે 8% વૃદ્ધિ આપી રહ્યા છીએ ત્યારે અર્થતંત્ર મરી ગયું છે! કોંગ્રેસ ભારતને નફરત કરે છે.