પ્રથા પવારની બેવડી સિદ્ધિ, મૌબોની ચેટરજીનો વિજય; ગુજરાત સ્ટેટ રેન્કિંગ ટેબલ ટેનિસમાં અમદાવાદનો દબદબો

વિમેન્સ અને જુનિયર ગર્લ્સમાં અમદાવાદના ખેલાડીઓએ જીત્યા ખિતાબો, યુવા વર્ગોમાં પણ શહેરનું શાનદાર પ્રદર્શન

અમદાવાદ

ગુજરાત સ્ટેટ ટેબલ ટેનિસ એસોસિયેશનના નેજા હેઠળ અને ટેબલ ટેનિસ એસોસિયેશન ઓફ અમદાવાદ (ટીટીએએ)ના ઉપક્રમે યોજાયેલી પ્રથમ ગુજરાત સ્ટેટ રેન્કિંગ ટેબલ ટેનિસ ટૂર્નામેન્ટ-2026માં અમદાવાદના ખેલાડીઓએ શાનદાર પ્રદર્શન કરીને અનેક કેટેગરીમાં ખિતાબો પોતાના નામે કર્યા હતા. વીર સાવરકર સ્પોર્ટ્સ કોમ્પ્લેક્સ ખાતે યોજાયેલી આ સ્પર્ધામાં પ્રથા પવારે વિમેન્સ અને જુનિયર ગર્લ્સ (અંડર-19) એમ બે ખિતાબ જીતીને યાદગાર સિદ્ધિ નોંધાવી હતી.

રોમાંચક ફાઇનલમાં પ્રથાનો વિજય

વિમેન્સ વિભાગની ફાઇનલમાં અમદાવાદની પ્રથા પવાર અને ઓઇશિકી જોઆરદાર વચ્ચે જબરદસ્ત ટક્કર જોવા મળી હતી. પ્રથાએ શરૂઆતની બે ગેમ જીતી મજબૂત લીડ મેળવી હતી, પરંતુ ઓઇશિકીએ શાનદાર વાપસી કરીને મેચને નિર્ણાયક સાતમી ગેમ સુધી ખેંચી હતી. અંતિમ ગેમમાં પ્રથાએ 14-12થી વિજય મેળવી 4-3થી મેચ જીતીને ચેમ્પિયનશિપનો તાજ પોતાના નામે કર્યો હતો.

જુનિયર ગર્લ્સમાં પણ પ્રથાનો દબદબો

પ્રથા પવારે અગાઉ જુનિયર ગર્લ્સ (અંડર-19) વિભાગમાં પણ ખિતાબ જીત્યો હતો. તેણે સેમિફાઇનલમાં ચાર્મી ત્રિવેદીને હરાવ્યા બાદ ફાઇનલમાં સુરતની દાનિયા ગોદીલને 4-1થી પરાજય આપીને ટાઇટલ હાંસલ કર્યું હતું. આ સાથે તેણે ટૂર્નામેન્ટમાં બેવડી સફળતા મેળવી હતી.

મૌબોની ચેટરજી બની અંડર-17 ચેમ્પિયન

જુનિયર ગર્લ્સ (અંડર-17) વિભાગમાં અમદાવાદની મૌબોની ચેટરજીએ ઉત્તમ રમત દાખવી હતી. સેમિફાઇનલમાં ભાવનગરની ચાર્મી ત્રિવેદીને 3-2થી હરાવ્યા બાદ તેણે ફાઇનલમાં દાનિયા ગોદીલ સામે પણ 3-2થી રોમાંચક જીત મેળવી ખિતાબ પોતાના નામે કર્યો હતો.

યુવા વર્ગોમાં અમદાવાદનું વર્ચસ્વ

ટૂર્નામેન્ટના યુવા વર્ગોમાં પણ અમદાવાદના ખેલાડીઓનો દબદબો રહ્યો હતો. અનાયરા મણિયારે હોપ્સ (અંડર-9) ગર્લ્સ, સાયાંશ ક્રિસ્ટીએ હોપ્સ (અંડર-9) બોયઝ અને નક્ષ પટેલે કેડેટ (અંડર-13) બોયઝ વિભાગમાં ચેમ્પિયન બની શહેરનું ગૌરવ વધાર્યું હતું.

આ ઉપરાંત રેહાંશ સિંઘવી (અંડર-11 બોયઝ), પ્રિશા પરેશ (અંડર-11 ગર્લ્સ), ધિમહી કારબરાવાલા (અંડર-13 ગર્લ્સ), દેવ ભટ્ટ (અંડર-15 બોયઝ) અને દાનિયા ગોદીલ (અંડર-15 ગર્લ્સ) પણ પોતાના વિભાગના વિજેતા બન્યા હતા.

પરિણામો

હોપ્સ ગર્લ્સ (અંડર-9)

• ચેમ્પિયન: અનાયરા મણિયાર
• રનર્સ-અપ: સુહાની હાંડા

હોપ્સ બોયઝ (અંડર-9)

• ચેમ્પિયન: સાયાંશ ક્રિસ્ટી
• રનર્સ-અપ: અહાન ગોયલ

હોપ્સ બોયઝ (અંડર-11)

• ચેમ્પિયન: રેહાંશ સિંઘવી
• રનર્સ-અપ: પ્રણવ કેલ્લા

હોપ્સ ગર્લ્સ (અંડર-11)

• ચેમ્પિયન: પ્રિશા પરેશ
• રનર્સ-અપ: યાના સિંઘ

કેડેટ ગર્લ્સ (અંડર-13)

• ચેમ્પિયન: ધિમહી કારબરાવાલા
• રનર્સ-અપ: ઝિનાલી પટેલ

કેડેટ બોયઝ (અંડર-13)

• ચેમ્પિયન: નક્ષ પટેલ
• રનર્સ-અપ: ધ્રુવ ભાંભાણી

સબ જુનિયર ગર્લ્સ (અંડર-15)

• ચેમ્પિયન: દાનિયા ગોદીલ
• રનર્સ-અપ: ફિઝા પવાર

સબ જુનિયર બોયઝ (અંડર-15)

• ચેમ્પિયન: દેવ ભટ્ટ
• રનર્સ-અપ: રિયાન શાહ

જુનિયર ગર્લ્સ (અંડર-17)

• ચેમ્પિયન: મૌબોની ચેટરજી
• રનર્સ-અપ: દાનિયા ગોદીલ

જુનિયર ગર્લ્સ (અંડર-19)

• ચેમ્પિયન: પ્રથા પવાર
• રનર્સ-અપ: દાનિયા ગોદીલ

વિમેન્સ

• ચેમ્પિયન: પ્રથા પવાર
• રનર્સ-અપ: ઓઇશિકી જોઆરદાર