કુર્નૂલ જિલ્લામાં સોનાની વિશાળ ખાણની પુષ્ટિ; ચાર અન્ય સ્થળોએ પણ માઇનિંગની તૈયારી, હજારો કરોડની સંપત્તિ બહાર આવવાની સંભાવના
નવી દિલ્હી/અમરાવતી:
વિશ્વભરમાં સોનાની વધતી માંગ અને સતત વધી રહેલા ભાવ વચ્ચે ભારત માટે મહત્વના સમાચાર સામે આવ્યા છે. આંધ્રપ્રદેશના કુર્નૂલ જિલ્લામાં આવેલા જોન્નાગિરી વિસ્તારમાં અંદાજે 50 ટન સોનાનો ભંડાર હોવાનો અંદાજ વ્યક્ત કરવામાં આવ્યો છે. આ શોધ દેશના ખનિજ ક્ષેત્ર માટે એક મહત્વપૂર્ણ સીમાચિહ્ન સાબિત થઈ શકે છે અને ભવિષ્યમાં ભારતની સોનાની આયાત પરની નિર્ભરતા ઘટાડવામાં મદદરૂપ બનશે.
જોન્નાગિરીમાં મળી સોનાની સમૃદ્ધ ખાણ
આંધ્રપ્રદેશ સરકારના માઇન્સ વિભાગના અગ્ર સચિવ મુકેશ કુમાર મીણાના જણાવ્યા અનુસાર, જોન્નાગિરી વિસ્તારમાં અત્યાર સુધી થયેલા સર્વેક્ષણ અને ખોદકામના આધારે અંદાજે 50 ટન સોનું હોવાની સંભાવના વ્યક્ત કરવામાં આવી છે. હાલ સ્થાનિક બજારના ભાવ મુજબ આ સોનાની કિંમત આશરે ₹7,500 કરોડથી ₹9,000 કરોડ વચ્ચે હોઈ શકે છે.
અહેવાલ મુજબ, લગભગ દસ વર્ષ અગાઉ આ વિસ્તારમાં માઇનિંગ માટે 1,500 એકર જમીન ફાળવવામાં આવી હતી. અત્યાર સુધી માત્ર 500 એકર વિસ્તારમાં સંશોધન અને ખોદકામ કરવામાં આવ્યું છે, જેમાં અંદાજે 13 ટન સોનાના ભંડારના સંકેતો મળ્યા છે.
ચાર અન્ય વિસ્તારોમાં પણ થશે માઇનિંગ
જોન્નાગિરી ઉપરાંત રાજ્ય સરકારે સોનાના ખનન માટે અન્ય ચાર સંભવિત વિસ્તારોની ઓળખ પણ કરી છે. તેમાં રામાગિરી, જવ્વકુલા, ચિગુરુકુંટા અને બિસ્નાટમનો સમાવેશ થાય છે. આ વિસ્તારોમાં પણ ભવિષ્યમાં વ્યાપક ખનિજ સંશોધન અને માઇનિંગ કામગીરી હાથ ધરવામાં આવશે.
ખાનગી કંપનીઓને સોંપાયા માઇનિંગ અધિકારો
સોનાનું ખનન ટેક્નોલોજી, મૂડી અને વિશેષ કુશળતા માગતું ક્ષેત્ર હોવાથી રાજ્ય સરકારે પારદર્શક ટેન્ડર પ્રક્રિયા દ્વારા માઇનિંગ અધિકારો ખાનગી કંપનીઓને સોંપ્યા છે. સરકારનું માનવું છે કે ખાનગી ક્ષેત્રની ભાગીદારીથી પ્રોજેક્ટ ઝડપથી આગળ વધશે અને ઉત્પાદન ક્ષમતા વધશે.
ચંદ્રબાબુ નાયડુ કરશે સત્તાવાર ઉદ્ઘાટન
જોન્નાગિરી ગોલ્ડ પ્રોજેક્ટમાં વ્યાપારી ધોરણે ઉત્પાદનની પ્રક્રિયા શરૂ થઈ ચૂકી હોવાનું જણાવવામાં આવ્યું છે. આંધ્રપ્રદેશના મુખ્યમંત્રી એન.ચંદ્રાબાબુ નાયડુ આ મહિનાના અંતમાં પ્રોજેક્ટનું સત્તાવાર ઉદ્ઘાટન કરશે.
અર્થતંત્રને મળશે નવી દિશા
નિષ્ણાતોના મતે, જોન્નાગિરી અને અન્ય વિસ્તારોમાં મળેલા સોનાના ભંડારોના સફળ ખનનથી રાજ્યમાં રોજગારીની નવી તકો ઊભી થશે, સ્થાનિક અર્થતંત્રને વેગ મળશે અને ભારતના ખનિજ ક્ષેત્રમાં આત્મનિર્ભરતાની દિશામાં એક મહત્વપૂર્ણ પગલું સાબિત થશે. આ પ્રોજેક્ટ દેશના સોના ઉત્પાદન ક્ષેત્રમાં નવી ક્રાંતિ લાવવાની ક્ષમતા ધરાવે છે.
