સ્થળ પર 2.55 લાખ લીટર ક્ષમતાની ભૂગર્ભ પાણીની ટાંકી જ ન હતી; બિલ રજૂ કરનાર બે ઈજનેરો સામે પોલીસ ફરિયાદ અને ફરજમુક્તિની કાર્યવાહી, ધર્મનંદન કન્સ્ટ્રકશન-સુરતને બ્લેકલિસ્ટ કરવા સૂચના
પાલીતાણા:
પાલીતાણા હોસ્પિટલમાં 2.55 લાખ લીટર ક્ષમતાની ભૂગર્ભ પાણીની ટાંકીનું કામ સ્થળ પર થયું જ ન હોવા છતાં તેના માટે ₹50.43 લાખનું બિલ મંજૂર કરવા વડી કચેરીમાં રજૂ કરવામાં આવ્યાની ગંભીર બાબત સામે આવી છે. આરોગ્ય મંત્રીશ્રી પ્રફુલ પાનશેરીયાએ હોસ્પિટલની મુલાકાત દરમિયાન આ ગેરરીતિ ધ્યાનમાં આવતા સમગ્ર મામલે તાત્કાલિક કડક કાર્યવાહી કરવાનો નિર્ણય લીધો છે.
સ્થળ તપાસમાં ગેરરીતિ સામે આવી
આરોગ્ય મંત્રી પ્રફુલ પાનશેરીયાની પાલીતાણા હોસ્પિટલની તાજેતરની મુલાકાત દરમિયાન મંજૂર કરવામાં આવેલી ભૂગર્ભ પાણીની ટાંકી સ્થળ પર જોવા મળી ન હતી. તપાસ દરમિયાન ટાંકીનું કામ થયેલું ન હોવા છતાં ₹50.43 લાખનું બિલ રજૂ કરવામાં આવ્યું હોવાનું ધ્યાને આવ્યું હતું. આ બાબતને મંત્રીએ ગંભીર બેદરકારી તરીકે લઈ સમગ્ર પ્રક્રિયાની તપાસના આદેશ આપ્યા હતા.
વીડિયો કોન્ફરન્સથી તાત્કાલિક સમીક્ષા
મામલો ધ્યાનમાં આવ્યા બાદ આરોગ્ય મંત્રીએ તાત્કાલિક વીડિયો કોન્ફરન્સના માધ્યમથી પાલીતાણા હોસ્પિટલ તથા પ્રોજેક્ટ ઈમ્પ્લિમેન્ટેશન યુનિટ (PIU)ના સંબંધિત અધિકારીઓ સાથે બેઠક યોજી હતી. બેઠકમાં ટાંકીના કામ, બિલની રજૂઆત અને તેને મંજૂરી માટે મોકલવાની પ્રક્રિયા અંગે વિગતવાર માહિતી મેળવવામાં આવી હતી.
બે અધિકારીઓ સામે પોલીસ ફરિયાદની સૂચના
બિલ રજૂ કરવાની પ્રક્રિયામાં જવાબદારી નિભાવનાર ઇન્ચાર્જ કાર્યપાલક ઈજનેર મેહુલ દવે અને નાયબ કાર્યપાલક ઈજનેર એન.વી. કાલીયા સામે પોલીસ ફરિયાદ નોંધાવવા સ્પષ્ટ સૂચના આપવામાં આવી છે. સાથે જ ફરજમાં બેદરકારી બદલ બંને સંબંધિત ઈજનેરો સામે ફરજમુક્તિની કાર્યવાહી કરવા પણ આદેશ આપવામાં આવ્યો છે.
કન્સ્ટ્રક્શન કંપનીને બ્લેકલિસ્ટ કરવાની કાર્યવાહી
આ સમગ્ર મામલામાં સંડોવાયેલી ધર્મનંદન કન્સ્ટ્રકશન-સુરત સામે પણ કડક કાર્યવાહી કરવામાં આવશે. કંપનીને બ્લેકલિસ્ટ કરવાની પ્રક્રિયા હાથ ધરવા PIUના અધિકારીઓને સૂચના આપવામાં આવી છે. સરકારી વિકાસકામોમાં કામની વાસ્તવિક સ્થિતિ અને રજૂ થતા બિલ વચ્ચે કોઈ વિસંગતતા ન રહે તે માટે જવાબદારી નક્કી કરવાનો નિર્ણય લેવાયો છે.
જાહેર નાણાંના ઉપયોગમાં બેદરકારી નહીં ચાલે
આરોગ્ય મંત્રી પ્રફુલ પાનશેરીયાએ સ્પષ્ટપણે જણાવ્યું હતું કે રાજ્યની આરોગ્ય સેવાઓ માટે ફાળવવામાં આવતા જાહેર નાણાંના ઉપયોગમાં કોઈપણ પ્રકારની બેદરકારી, ગેરરીતિ કે અનિયમિતતા ચલાવી લેવામાં આવશે નહીં. સરકારી આરોગ્યલક્ષી વિકાસકાર્યોમાં ગુણવત્તા, પારદર્શિતા અને જવાબદારી સુનિશ્ચિત કરવી રાજ્ય સરકારની સર્વોચ્ચ પ્રાથમિકતા હોવાનું તેમણે જણાવ્યું હતું.
વિકાસકામોની ગુણવત્તા પર કડક દેખરેખ
મંત્રીએ જણાવ્યું હતું કે જનતાના નાણાંનો એક પણ રૂપિયો બિનજવાબદારીપૂર્વક ખર્ચાય નહીં અને મંજૂર થયેલા વિકાસકાર્યો સ્થળ પર વાસ્તવિક રીતે, ગુણવત્તાપૂર્વક તથા નિર્ધારિત ધોરણો અનુસાર પૂર્ણ થાય તે માટે આરોગ્ય વિભાગ દ્વારા કડક દેખરેખ રાખવામાં આવી રહી છે. પાલીતાણા હોસ્પિટલનો મામલો સરકારી કામોમાં જવાબદારી અને પારદર્શિતા જાળવવા માટે વિભાગની કડક નીતિનો સંકેત માનવામાં આવી રહ્યો છે.
