મોરારી બાપુની હાર્વર્ડમાં નવ દિવસીય રામકથાનું સમાપન

ભારતના પવિત્ર ગ્રંથોના સંરક્ષણ માટે હાર્વર્ડને ખાસ અપીલ; રામચરિતમાનસ અને વૈશ્વિક શૈક્ષણિક જગત વચ્ચે સંવાદની નવી શરૂઆત

કેમ્બ્રિજ, મેસેચ્યુસેટ્સ

હાર્વર્ડ યુનિવર્સિટીના સેન્ડર્સ થિયેટરમાં મોરારી બાપુની ‘માનસ ગુરુ પ્રસાદ’ રામકથાનું ભવ્ય સમાપન થયું. નવ દિવસીય આ આયોજનમાં રામચરિતમાનસની આધ્યાત્મિક અને સાહિત્યિક પરંપરા સાથે ભારતીય શાસ્ત્રીય ચિંતન અને વૈશ્વિક શૈક્ષણિક જગતને એક મંચ પર લાવવામાં આવ્યા.

હાર્વર્ડને પવિત્ર ગ્રંથોના સંરક્ષણની અપીલ

સમાપન પ્રસંગે મોરારી બાપુએ હાર્વર્ડ યુનિવર્સિટીને ખાસ અપીલ કરતાં જણાવ્યું કે ચારેય વેદો, રામચરિતમાનસ અને વાલ્મીકિ રામાયણની નકલોનું સંરક્ષણ કરીને તેને યુનિવર્સિટીમાં રાખવામાં આવે. તેમણે ભાર મૂક્યો કે ભારતની આ પ્રાચીન જ્ઞાનપરંપરા ભવિષ્યની પેઢીના વિદ્યાર્થીઓ અને સંશોધકો માટે પણ ઉપલબ્ધ રહે તે જરૂરી છે.

‘હું ભણવા નહીં, પ્રસાદ વહેંચવા આવ્યો છું’

બાપુએ પોતાના હાર્વર્ડ આગમનનો ઉદ્દેશ સમજાવતા કહ્યું, “કોઈએ મને પૂછ્યું કે હું હાર્વર્ડ કેમ આવ્યો છું? મેં કહ્યું — ‘મૈં પઢને નહીં આયા, મૈં પઢાને નહીં આયા; મૈં પ્રસાદ બાંટને આયા હૂં.’” તેમના આ શબ્દોમાં રામકથાના આધ્યાત્મિક સંદેશને સમગ્ર વિશ્વ સુધી પહોંચાડવાની ભાવના વ્યક્ત થઈ.

તુલસી જયંતીએ ગ્લોબલ એવોર્ડ્સનું આયોજન

19 ઑગસ્ટે ગોસ્વામી તુલસીદાસજીની જન્મજયંતી નિમિત્તે સેન્ડર્સ થિયેટરમાં તુલસી જન્મોત્સવ અને ગ્લોબલ એવોર્ડ્સ સમારોહ યોજાયો હતો. આ પ્રસંગે 16 વર્ષના ઇતિહાસમાં પ્રથમ વખત ભારતની બહાર તુલસી, વ્યાસ, વાલ્મીકિ અને રત્નાવલી એવોર્ડ્સ એનાયત કરવામાં આવ્યા. કુલ આઠ એવોર્ડ નવ વિદ્વાનો અને સાંસ્કૃતિક ક્ષેત્રના યોગદાનકર્તાઓને આપવામાં આવ્યા.

વિશ્વના વિદ્વાનોનું સન્માન

વાલ્મીકિ એવોર્ડ પ્રોફેસર સેલી જે. સુધરલેન્ડ ગોલ્ડમેન, પ્રોફેસર રોબર્ટ પી. ગોલ્ડમેન અને ઓસાકા યુનિવર્સિટીના પ્રોફેસર મડોકા ફુકુઓકાને આપવામાં આવ્યો. વ્યાસ એવોર્ડ પ્રોફેસર જ્હોન સ્ટ્રેટન હોલી, ડૉ. અશ્વિન કાંતિ રાજગોર અને દેવી ચિત્રલેખાને એનાયત થયો. તુલસી એવોર્ડ પ્રોફેસર રૂપર્ટ સ્નેલ અને પિયુષ મહેતાને મળ્યો. હાર્વર્ડની પ્રોફેસર ડાયના એલ. એકને તુલનાત્મક ધર્મના ક્ષેત્રમાં યોગદાન બદલ રત્નાવલી એવોર્ડથી સન્માનિત કરવામાં આવ્યા.

ત્રણ દિવસીય શૈક્ષણિક ચર્ચાઓએ વધાર્યો સંવાદ

16થી 18 ઑગસ્ટ દરમિયાન યોજાયેલી ત્રણ દિવસીય શૈક્ષણિક ચર્ચાઓમાં જાપાન, નેધરલેન્ડ્સ, યુકે અને અમેરિકાના વિવિધ વિસ્તારોમાંથી આવેલા વિદ્વાનો અને પ્રેક્ટિશનર્સ જોડાયા હતા. ભારતની સાહિત્યિક, દાર્શનિક અને સાંસ્કૃતિક પરંપરાના વિવિધ પાસાઓ પર વિસ્તૃત વિચારવિમર્શ કરવામાં આવ્યો.

સત્ય, પ્રેમ અને કરુણાનો સંદેશ

આયોજનના મુખ્ય આયોજક પાવન પોપટ OBEએ જણાવ્યું કે નવ દિવસની રામકથાના સમાપન સમયે હૃદય કૃતજ્ઞતાથી ભરાઈ ગયા છે. સત્ય, પ્રેમ અને કરુણા જેવા સાર્વત્રિક મૂલ્યોના આધારે વિદ્વાનો, શ્રદ્ધાળુઓ અને વિવિધ સમુદાયોના લોકો એકસાથે જોડાયા હતા.

વૈશ્વિક સ્તરે રામચરિતમાનસનો સંવાદ

‘માનસ ગુરુ પ્રસાદ’ કથાએ ભક્તિ, શાસ્ત્રજ્ઞાન, સંગીત અને સાંસ્કૃતિક આદાનપ્રદાનને એક મંચ પર લાવ્યું. હાર્વર્ડ ખાતે યોજાયેલા આ નવ દિવસ માત્ર રામકથાનું આયોજન બનીને રહ્યા નહીં, પરંતુ રામચરિતમાનસની પરંપરા અને વૈશ્વિક શૈક્ષણિક સમુદાય વચ્ચે સંવાદની નવી દિશા ઊભી કરી. ભારતની શાસ્ત્રીય જ્ઞાનપરંપરાને વૈશ્વિક સ્તરે પહોંચાડવાની સાથે મોરારી બાપુના સત્ય, પ્રેમ અને કરુણાના સંદેશને પણ વ્યાપક શ્રોતાઓ સુધી પહોંચાડવામાં આવ્યો.