અમદાવાદના ટ્રાન્સસ્ટેડિયા એરેના ખાતે ફૂટબોલના મહાકુંભનો પ્રારંભ; જી.એસ.એફ.એ.ની નવી ડિજિટલ એપ, સત્તાવાર જર્સી અને ટ્રોફીનું અનાવરણ
અમદાવાદ
ગુજરાત સ્ટેટ ફૂટબોલ એસોસિએશન (જી.એસ.એફ.એ.) દ્વારા ગુજરાત સુપર લીગ (જી.એસ.એલ.)ની ત્રીજી સીઝનના પ્રારંભની તૈયારીઓને આખરી ઓપ આપવામાં આવ્યો છે. જી.એસ.એલ. સીઝન-3નો ભવ્ય પ્રારંભ 1 સપ્ટેમ્બર, 2026ના રોજ સાંજે 4 વાગ્યે ટ્રાન્સસ્ટેડિયા એરેના, અમદાવાદ ખાતે યોજાશે. ગુજરાતમાં ફૂટબોલનું મજબૂત ઇકોસિસ્ટમ વિકસાવવાની દિશામાં આ સીઝનને મહત્વપૂર્ણ પગલું માનવામાં આવી રહ્યું છે.
જર્સી અને ટ્રોફીનું અનાવરણ
જી.એસ.એફ.એ.ના પદાધિકારીઓ તથા જી.એસ.એલ.ની ટીમોના માલિકોની હાજરીમાં સીઝન-3ની સત્તાવાર ટ્રોફી અને ટીમ જર્સીનું અનાવરણ કરવામાં આવ્યું હતું. જર્સીની ડિઝાઇન ગુજરાત ફૂટબોલની ઊર્જા અને આધુનિક અભિગમને દર્શાવે છે, જ્યારે ટ્રોફી લીગની સર્વોચ્ચ સિદ્ધિનું પ્રતીક બનશે.
ઇજાગ્રસ્ત રાહુલ ભાટીયાને સહાય
લીગ દરમિયાન ગંભીર રીતે ઇજાગ્રસ્ત થયેલા યુવા ફૂટબોલર રાહુલ ભાટીયાને રૂ. 2 લાખની એક્સ-ગ્રેશિયા સહાય આપવાની પણ જાહેરાત કરવામાં આવી હતી. ખેલાડીઓના કલ્યાણ અને મુશ્કેલ સમયમાં તેમની સાથે ઊભા રહેવાની જી.એસ.એફ.એ.ની પ્રતિબદ્ધતાના ભાગરૂપે આ નિર્ણય લેવામાં આવ્યો છે.
ત્રીજી સીઝન વધુ રોમાંચક બનશે
જી.એસ.એલ.ની પ્રથમ બે સીઝનને મળેલા સારા પ્રતિસાદ બાદ ત્રીજી સીઝન વધુ સ્પર્ધાત્મક અને રોમાંચક બનવાની અપેક્ષા છે. લીગ ગુજરાતની ફૂટબોલ પ્રતિભાઓને એક મંચ પર લાવશે અને યુવા તથા ઉભરતા ખેલાડીઓને ઉચ્ચ ગુણવત્તાની સ્પર્ધામાં પોતાની ક્ષમતા દર્શાવવાની તક પૂરી પાડશે.
‘જી.એસ.એલ. માત્ર સ્પર્ધા નથી’: પરિમલ નથવાણી
જી.એસ.એફ.એ.ના પ્રમુખ પરિમલ નથવાણીએ જણાવ્યું હતું કે જી.એસ.એલ.ની ત્રીજી સીઝન ગુજરાતની ફૂટબોલ યાત્રામાં વધુ એક મહત્વપૂર્ણ સીમાચિહ્ન છે. તેમણે કહ્યું કે, “જી.એસ.એલ. માત્ર એક સ્પર્ધા નથી; ગુજરાતમાં ફૂટબોલના વિકાસ માટેની અમારી વ્યાપક દૃષ્ટિનો તે એક મહત્વપૂર્ણ હિસ્સો છે.” તેમનો ઉદ્દેશ પ્રતિભાશાળી ખેલાડીઓને તક આપવા, વધુ લોકોને ફૂટબોલ સાથે જોડવા અને રાજ્યના યુવાનો માટે ફૂટબોલને પસંદગીની રમત બનાવવાનો છે.
ફૂટબોલ ચાહકો માટે નવી ડિજિટલ એપ
ફૂટબોલ ચાહકોને લીગ સાથે વધુ નજીકથી જોડવા માટે જી.એસ.એફ.એ. દ્વારા સમર્પિત નવી ડિજિટલ એપ પણ લોન્ચ કરવામાં આવી છે. આ એપને ગુજરાત ફૂટબોલ માટે વન-સ્ટોપ ડિજિટલ પ્લેટફોર્મ તરીકે વિકસાવવામાં આવી છે. તેમાં જી.એસ.એલ.ના ફિક્સ્ચર્સ, મેચ શેડ્યૂલ, પરિણામો, ટીમોની માહિતી, ખેલાડીઓની પ્રોફાઇલ, ફોટોગ્રાફ્સ તથા લીગના વિવિધ અપડેટ્સ ઉપલબ્ધ રહેશે.
લીગ હવે મોબાઇલ સુધી પહોંચશે
પરિમલ નથવાણીએ જણાવ્યું હતું કે નવી એપના માધ્યમથી જી.એસ.એલ. અને તેના સમર્થકો વચ્ચેનું જોડાણ વધુ મજબૂત બનશે. તેમણે જણાવ્યું કે લીગ માત્ર સ્ટેડિયમ સુધી સીમિત ન રહે પરંતુ દરેક ફૂટબોલપ્રેમીના મોબાઇલ અને ડિજિટલ ઉપકરણ સુધી પહોંચે તેવો પ્રયાસ કરવામાં આવી રહ્યો છે.
સંપૂર્ણ ફિક્સ્ચર્સની જાહેરાત
આ પ્રસંગે સીઝન-3ના સંપૂર્ણ ફિક્સ્ચર્સની પણ જાહેરાત કરવામાં આવી હતી. મેચોની તારીખ, ટીમો અને સમય સહિતની વિગતવાર માહિતી નવા ડિજિટલ પ્લેટફોર્મ તથા જી.એસ.એફ.એ.ના સત્તાવાર સંચાર માધ્યમો પર ઉપલબ્ધ રહેશે.
ટ્રાન્સસ્ટેડિયા ખાતે ફૂટબોલનો રોમાંચ
સીઝન-3ના પ્રારંભ નિમિત્તે ટ્રાન્સસ્ટેડિયા, અમદાવાદ ખાતે વિશેષ સમારોહ યોજાશે. તેમાં ફૂટબોલ ખેલાડીઓ, અધિકારીઓ, કોચ, સમર્થકો, રમતગમત ક્ષેત્રની હસ્તીઓ તથા અન્ય હિતધારકો ઉપસ્થિત રહેશે. ત્યારબાદ ટ્રાન્સસ્ટેડિયા ખાતે યોજાનારી મેચોની શ્રેણી દ્વારા ચાહકોને સ્ટેડિયમના વાતાવરણમાં ઉચ્ચ સ્તરીય અને સ્પર્ધાત્મક ફૂટબોલનો રોમાંચ માણવા મળશે.
