રાજકોટ
ભારતીય ક્રિકેટના ‘દિવાલ’ તરીકે જાણીેલા પૂર્વ કેપ્ટન અને મુખ્ય કોચ રાહુલ દ્રવિડના પુત્ર અન્યોય દ્રવિડે પોતાની આક્રમક બેટિંગથી ક્રિકેટ જગતમાં ધૂમ મચાવી દીધી છે. રાજકોટમાં રમાયેલી અંડર-19 મેચમાં તેણે વિરોધી ટીમ સામે શાનદાર પ્રદર્શન કર્યું છે.
રાજકોટમાં ઓસ્ટ્રેલિયા સામે મચાવી તબાહી
રાજકોટના નિરંજન શાહ સ્ટેડિયમમાં રમાયેલા ઓસ્ટ્રેલિયા અંડર-19 સામેના પ્રથમ અનઓફિશિયલ વનડે મુકાબલામાં અન્યોય દ્રવિડે પોતાની વિસ્ફોટક બેટિંગનું પ્રદર્શન કર્યું છે. જમણા હાથના યુવા વિકેટકીપર-બેટ્સમેન અન્યોયે છઠ્ઠા નંબરે બેટિંગ કરતા માત્ર 28 બોલમાં 2 ચોગ્ગા અને 3 ગગનચુંબી છગ્ગાની મદદથી 38 રનની ધમાકેદાર ઇનિંગ રમી હતી. વરસાદથી પ્રભાવિત આ 20-20 ઓવરના મુકાબલામાં જ્યારે ભારતીય ટીમ મુશ્કેલીમાં હતી, ત્યારે તેણે મેચનું ચિત્ર બદલી નાખ્યું હતું.
સંકટમોચક બનીને ટીમને અપાવી મજબૂત સ્થિતિ
જ્યારે ભારતીય અંડર-19 ટીમે માત્ર 88 રનમાં જ પોતાની 4 મહત્વની વિકેટો ગુમાવી દીધી હતી, ત્યારે અન્યોય દ્રવિડે ક્રિઝ પર પગ મૂક્યો હતો. દબાણ હેઠળ બતાવવાને બદલે તેણે ઓસ્ટ્રેલિયન બોલરો પર કાઉન્ટર અટેક કર્યો હતો. અન્યોયે સાથી ખેલાડી યશવર્ધન ચૌહાણ સાથે મળીને માત્ર 34 બોલમાં 69 રનની અત્યંત ઝડપી ભાગીદારી નોંધાવી હતી. આ શાનદાર ભાગીદારીના દમ પર ભારતીય ટીમ નિર્ધારિત 20 ઓવરમાં 6 વિકેટે 182 રનનો મજબૂત સ્કોર બનાવવામાં સફળ રહી હતી.
શ્રીલંકા પ્રવાસમાં પણ મચાવી ચૂક્યો છે ધમાકો
આ પહેલીવાર નથી જ્યારે અન્યોય દ્રવિડે પોતાની બેટિંગથી પ્રભાવિત કર્યા હોય. અગાઉ જુલાઈ 2026માં શ્રીલંકા અંડર-19 સામે રમાયેલી યુથ વનડે સિરીઝમાં પણ તેનું બેટ ખૂબ ગુંજ્યું હતું. હંબનટોટામાં રમાયેલી બીજી યુથ વનડે મેચમાં અન્યોયે માત્ર 67 બોલમાં 87 રનની અત્યંત આકર્ષક ઇનિંગ રમી હતી. રાજકોટમાં ઓસ્ટ્રેલિયા સામે રમાયેલી આ 38 રનની આક્રમક ઇનિંગે ફરી એકવાર સાબિત કરી દીધું છે કે તે મુશ્કેલ પરિસ્થિતિઓમાં મેચનું પાસું પલટવાની ક્ષમતા ધરાવે છે.
