અમદાવાદમાં આઇએએકૉન ૨૦૨૬ : એઆઈ-રોબોટિક્સથી સાંધા બદલવાની સર્જરીમાં નવી દિશા

૧,૦૦૦થી વધુ પ્રતિનિધિઓ અને દેશ-વિદેશના ૧૮૦ નિષ્ણાતોની હાજરી • IAAના ઇતિહાસમાં પ્રથમ વખત મોટા પાયે કેડેવરિક વર્કશોપ • ૨૫ વૈજ્ઞાનિક સત્રોમાં અત્યાધુનિક સર્જિકલ પદ્ધતિઓ પર ચર્ચા

અમદાવાદ

સાંધા બદલવાની સર્જરી એટલે કે આર્થ્રોપ્લાસ્ટીના ક્ષેત્રમાં એઆઈ, રોબોટિક્સ, કાઇનેમેટિક્સ અને આધુનિક સર્જિકલ નેવિગેશન જેવી ટેકનોલોજીના વધતા ઉપયોગ વચ્ચે ઇન્ડિયન આર્થ્રોપ્લાસ્ટી એસોસિએશનની ૨૨મી વાર્ષિક કોન્ફરન્સ **‘આઇએએકૉન ૨૦૨૬’**નું આયોજન અમદાવાદમાં કરવામાં આવ્યું છે. ૨૩થી ૨૫ ઓક્ટોબર દરમિયાન ક્લબ ઓ-7 ખાતે યોજાનારી આ કોન્ફરન્સમાં ૧,૦૦૦થી વધુ પ્રતિનિધિઓ અને ભારત સહિત વિવિધ દેશોના ૧૮૦ નિષ્ણાતો ભાગ લેશે.

કોન્ફરન્સની થીમ ‘ઇવોલ્વિંગ આર્થ્રોપ્લાસ્ટી: રોબોટિક્સ, કાઇનેમેટિક્સ એન્ડ ઇનોવેશન’ રાખવામાં આવી છે. આઇએએકૉન ૨૦૨૬માં ટેકનોલોજીના ઉપયોગથી સર્જરીમાં ચોકસાઈ વધારવા, દર્દીઓના સારવાર પરિણામોમાં સુધારો લાવવા અને જટિલ કેસોના વ્યવસ્થાપન અંગે વ્યાપક ચર્ચા થશે.

એઆઈ અને રોબોટિક્સ રહેશે મુખ્ય કેન્દ્રબિંદુ

કોન્ફરન્સમાં એઆઈ આધારિત સર્જિકલ સિસ્ટમ, રોબોટિક ટેકનોલોજી, થ્રી-ડી કેમેરા અને આધુનિક સર્જિકલ નેવિગેશન જેવી પદ્ધતિઓ પર વિશેષ ધ્યાન આપવામાં આવશે. ડૉ. એચ. પી. ભાલોડિયા દ્વારા ઇન્ટેલિજોઇન્ટ ટેકનોલોજીનો ઉપયોગ કરીને એઆઈ આધારિત ટોટલ હિપ રિપ્લેસમેન્ટ સર્જરી અંગે વિશેષ સત્ર યોજાશે.

રોબોટિક સર્જરીમાં રોબોટિક આર્મ્સની મદદથી હાડકામાં જરૂરી કટ અને એલાઈનમેન્ટ વધુ ચોકસાઈથી કરવામાં આવે છે. સર્જરી પહેલાં ઉપલબ્ધ સ્કેન અને ઇમેજિંગમાંથી મળેલી માહિતીના આધારે સર્જિકલ પ્લાન તૈયાર કરવામાં આવે છે, જેના આધારે રોબોટિક સિસ્ટમ સર્જનને માર્ગદર્શન આપે છે. આથી સર્જરી દરમિયાન અનાવશ્યક છેડછાડ ઘટાડવા અને યોગ્ય એલાઈનમેન્ટ મેળવવામાં મદદ મળી શકે છે.

જટિલ સર્જરીઓના લાઇવ ડેમો અને વીડિયો

કોન્ફરન્સ દરમિયાન યુનિકોન્ડાઇલર ની આર્થ્રોપ્લાસ્ટી અને ટોટલ હિપ રિપ્લેસમેન્ટ જેવી સર્જરીના નિદર્શન ઉપરાંત આશરે ૩૦ સર્જિકલ વીડિયો રજૂ કરવામાં આવશે. પેરિપ્રોસ્થેટિક ફ્રેક્ચર, સાંધાના ગંભીર ચેપ, જટિલ કેસ અને સર્જરી દરમિયાન આવતા પડકારો અંગે નિષ્ણાતોની પેનલ ચર્ચા યોજાશે.

IAAના ઇતિહાસમાં પ્રથમ વખત મોટા પાયે કેડેવરિક વર્કશોપ

આઇએએકૉન ૨૦૨૬નું સૌથી મહત્વપૂર્ણ આકર્ષણ ઇન્ડિયન આર્થ્રોપ્લાસ્ટી એસોસિએશનના ઇતિહાસમાં પ્રથમ વખત મોટા પાયે યોજાનારી કેડેવરિક વર્કશોપ રહેશે. ૨૨ ઓક્ટોબરે બી. જે. મેડિકલ કોલેજ અને સિવિલ હોસ્પિટલ, અમદાવાદ ખાતે યોજાનારી આ વર્કશોપમાં ૧૨ કેડેવરિક સ્પેસિમેનનો ઉપયોગ કરવામાં આવશે.

વર્કશોપમાં ડાયરેક્ટ એન્ટિરિયર એપ્રોચ હિપ રિપ્લેસમેન્ટ, યુનિકોન્ડાઇલર ની આર્થ્રોપ્લાસ્ટી, ટોટલ ની આર્થ્રોપ્લાસ્ટી અને રિવર્સ શોલ્ડર આર્થ્રોપ્લાસ્ટી જેવી સર્જિકલ પદ્ધતિઓનું પ્રત્યક્ષ નિદર્શન થશે.

કેડેવર તાલીમનું વધતું મહત્વ

આ પ્રકારની તાલીમમાં તાજા કેડેવર સ્પેસિમેનનો ઉપયોગ કરવામાં આવે છે, જેથી શરીરની રચનાની વાસ્તવિક સ્થિતિ અને સર્જિકલ ટેકનિકને વ્યવહારુ રીતે સમજવામાં સર્જનોને મદદ મળે. દેશમાં દેહરાદૂન, ગોવા અને બેંગલોર સહિતના સ્થળોએ કેડેવર લેબમાં મોટા પાયે સર્જિકલ તાલીમ યોજાઈ રહી છે.

આઇએએકૉન ૨૦૨૬માં પણ કેડેવરિક તાલીમ માટે મોટી સંખ્યામાં નોંધણી થઈ હોવાનું આયોજકોએ જણાવ્યું છે. તેનો મુખ્ય હેતુ યુવા તેમજ અનુભવી સર્જનોને વિવિધ ઓપરેટિવ ટેકનિકનો પ્રાયોગિક અનુભવ આપવાનો છે.

“કેડેવરિક વર્કશોપ સર્જનોને માત્ર થિયરી નહીં, પરંતુ વાસ્તવિક એનાટોમિકલ પરિસ્થિતિમાં સર્જિકલ પદ્ધતિ સમજવાની તક આપશે. આઇએએકૉન ૨૦૨૬ને પ્રાયોગિક શિક્ષણ સાથે જોડવાનો આ મહત્વપૂર્ણ પ્રયાસ છે.”
— ડૉ. ધીરજ મારોઠી જૈન, આયોજન સચિવ

૨૫ વૈજ્ઞાનિક સત્રોમાં આધુનિક સારવાર પદ્ધતિઓની ચર્ચા

કોન્ફરન્સના વૈજ્ઞાનિક કાર્યક્રમમાં કુલ ૨૫ સત્રો યોજાશે. તેમાં રોબોટિક અને નોન-રોબોટિક સર્જરી, રિલાઇવ અને ઇનબોક્સ સર્જિકલ સત્રો, જટિલ સર્જરી, સર્જિકલ નિર્ણય પ્રક્રિયા અને નવી ટેકનોલોજીના વ્યવહારુ ઉપયોગ અંગે ચર્ચા થશે.

પાંચ અલગ-અલગ હોલમાં હાડકાંની શરીરરચનાને અનુરૂપ મોડેલની મદદથી એકસાથે વર્કશોપ પણ યોજાશે. દરેક સત્ર બાદ વરિષ્ઠ તબીબો પોતાના અનુભવો અને વ્યવહારુ સૂચનો રજૂ કરશે, જ્યારે વિદ્યાર્થીઓ અને અન્ય નિષ્ણાતોને પ્રશ્નોત્તરીની તક મળશે.

આર્થ્રોપ્લાસ્ટીમાં સર્વસંમતિ દસ્તાવેજ પણ રજૂ થશે

કોન્ફરન્સ દરમિયાન ઇન્ડિયન આર્થ્રોપ્લાસ્ટી એસોસિએશન દ્વારા તૈયાર કરાયેલો સર્વસંમતિ દસ્તાવેજ રજૂ કરવામાં આવશે. ખાસ કરીને યુવા સર્જનોને ધ્યાનમાં રાખીને તૈયાર કરવામાં આવેલા આ દસ્તાવેજનો હેતુ સ્થાપિત સર્જિકલ પદ્ધતિઓ અંગે વ્યવહારુ માર્ગદર્શન આપવાનો, સારવારમાં એકરૂપતા લાવવાનો અને દર્દીઓના સારવાર પરિણામોને સુધારવામાં મદદ કરવાનો છે.

વરિષ્ઠ નિષ્ણાતો માટે બે કલાકનું વિશેષ સત્ર યોજાશે, જેમાં દસ્તાવેજની ભલામણો અંગે વિગતવાર ચર્ચા કરવામાં આવશે.

“વર્તમાન પડકારો અને વિકસતી સર્જિકલ પદ્ધતિઓને ધ્યાનમાં રાખીને વૈજ્ઞાનિક કાર્યક્રમ તૈયાર કરવામાં આવ્યો છે. જટિલ પરિસ્થિતિઓમાં સર્જિકલ નિર્ણય કેવી રીતે લેવો તે અંગે પણ વ્યવહારુ ચર્ચા થશે.”
— ડૉ. દીપક દવે, વૈજ્ઞાનિક સમિતિના અધ્યક્ષ

૧૮૦ નિષ્ણાતોનું વૈશ્વિક મંચ પર આદાન-પ્રદાન

કોન્ફરન્સમાં ભારત ઉપરાંત વિદેશના ૧૦ નિષ્ણાતો ભાગ લેશે. તેમાં ઓસ્ટ્રેલિયાના ચાર, આયર્લેન્ડના ત્રણ, અમેરિકાના બે અને યુનાઇટેડ કિંગડમના એક નિષ્ણાતનો સમાવેશ થાય છે.

વિદેશી નિષ્ણાતો નવી ટેકનોલોજી અને મટિરિયલ્સ અંગેના પોતાના અનુભવો રજૂ કરશે, જ્યારે ભારતીય સર્જનો પોતાના વિશાળ સર્જિકલ અનુભવ અને વિવિધ પ્રકારના દર્દીઓ સાથેના વ્યવહાર અંગેના અનુભવોનું આદાન-પ્રદાન કરશે.

“આઇએએકૉન ૨૦૨૬ નિષ્ણાતો માટે બદલાતી સારવાર પદ્ધતિઓ અંગે ચર્ચા કરવા અને વિવિધ દેશોના અનુભવોમાંથી શીખવા માટે મહત્વપૂર્ણ મંચ બનશે.”
— ડૉ. ડિમ્પલ પારેખ, સહઅધ્યક્ષ

વધતી ઉંમર સાથે આર્થ્રાઈટીસનો પડકાર

ભારતમાં લોકોનું સરેરાશ આયુષ્ય વધતાં ઉંમર સંબંધિત સાંધાના ઘસારા અને આર્થ્રાઈટીસના કેસોમાં પણ વધારો થઈ રહ્યો છે. તબીબી નિષ્ણાતોના જણાવ્યા મુજબ વરિષ્ઠ વસ્તીમાં ઘૂંટણ, હિપ અને અન્ય સાંધાની સમસ્યાઓ સામાન્ય બની રહી છે.

આર્થ્રાઈટીસના કારણે દૈનિક જીવનની પ્રવૃત્તિઓ પર અસર થતી હોય ત્યારે દવાઓ, ફિઝિયોથેરાપી અને અન્ય સારવાર પદ્ધતિઓ બાદ જરૂરિયાત મુજબ જોઈન્ટ રિપ્લેસમેન્ટ સર્જરીનો વિકલ્પ અપનાવવામાં આવે છે.

આયુષ્માન ભારતથી ખર્ચાળ સર્જરી સુધી પહોંચ સરળ

આયોજકોના જણાવ્યા મુજબ છેલ્લા કેટલાક વર્ષોમાં પ્રધાનમંત્રી આયુષ્માન ભારત યોજના હેઠળ ઘૂંટણ અને હિપ રિપ્લેસમેન્ટ જેવી સારવારને કવર મળતાં આર્થિક રીતે નબળા અને સામાન્ય વર્ગના દર્દીઓ માટે સારવાર મેળવવાની તકો વધી છે. છેલ્લા બે વર્ષમાં દેશમાં બે લાખથી વધુ જોઈન્ટ રિપ્લેસમેન્ટ સર્જરી થઈ હોવાનો પણ દાવો કરવામાં આવ્યો છે.

મેડીક્લેમમાં ટેકનોલોજી કવરેજ અંગે જાગૃતિ જરૂરી

આધુનિક રોબોટિક અને અન્ય ટેકનોલોજી આધારિત સર્જરીનો ખર્ચ પરંપરાગત સર્જરીની સરખામણીએ અલગ હોઈ શકે છે. તેથી મેડીક્લેમ લેતી વખતે પોલિસીમાં રોબોટિક સર્જરી, ટેકનોલોજી આધારિત પ્રક્રિયા, ઇમ્પ્લાન્ટ અને સંબંધિત ડિસ્પોઝેબલ્સનું કવરેજ છે કે નહીં તેની માહિતી અગાઉથી તપાસવી જરૂરી હોવાનું નિષ્ણાતોએ જણાવ્યું છે.

આયોજકોના જણાવ્યા મુજબ કેટલીક વીમા કંપનીઓમાં ટેકનોલોજી આધારિત સારવારના કવરેજ અંગે અલગ જોગવાઈઓ જોવા મળે છે અને બજારમાં હવે કેટલીક પોલિસીઓમાં ટેકનોલોજીનો સમાવેશ પણ કરવામાં આવી રહ્યો છે. તેથી પોલિસી લેતા પહેલાં તેના નિયમો અને કવરેજને સમજવું જરૂરી છે.

મેડીક્લેમ લેતા પહેલાં આ બાબતો તપાસો

• રોબોટિક સર્જરીનું કવરેજ છે કે નહીં
• ઇમ્પ્લાન્ટ અને મટિરિયલનો ખર્ચ કવર થાય છે કે નહીં
• સર્જરી સાથે જોડાયેલા ડિસ્પોઝેબલ્સ અને અન્ય ખર્ચની જોગવાઈ
• હોસ્પિટલ તથા સર્જિકલ ટેકનોલોજી અંગે પોલિસીની મર્યાદાઓ
• કેશલેસ સારવાર અને પૂર્વ મંજૂરીની શરતો

સી. એસ. રાનાવત ગોલ્ડ મેડલ સ્પર્ધા પ્રથમ વખત

આ વર્ષની કોન્ફરન્સમાં પ્રથમ વખત સી. એસ. રાનાવત ગોલ્ડ મેડલ સ્પર્ધા યોજાશે. સ્પર્ધા માટે આશરે ૧૪૦ સંશોધન પેપર્સ રજૂ થયા છે, જેમાંથી બે પેપર્સની પસંદગી કરવામાં આવશે.

આ ઉપરાંત ડૉ. પરાગ સંચેતી દ્વારા પ્રથમ સી. એસ. રાનાવત સ્મૃતિ વ્યાખ્યાન પણ આપવામાં આવશે. કોન્ફરન્સના ઉદ્ઘાટન અને સમાપન સમારોહનું પણ આયોજન કરવામાં આવ્યું છે.

આઇએએકૉન ૨૦૨૬નું મુખ્ય લક્ષ્ય

આઇએએકૉન ૨૦૨૬નો વ્યાપ માત્ર નવી ટેકનોલોજીના પ્રદર્શન પૂરતો સીમિત નહીં રહે, પરંતુ નવી ટેકનોલોજીનો વાસ્તવિક દર્દીઓમાં કેટલો લાભ થાય છે, સારવારના પરિણામોમાં શું સુધારો થાય છે અને કઈ ટેકનિક કઈ પરિસ્થિતિમાં યોગ્ય છે તે અંગે વૈજ્ઞાનિક અને વ્યવહારુ ચર્ચા પર ભાર મૂકવામાં આવશે.

આયોજન સમિતિના અધ્યક્ષ ડૉ. એચ. પી. ભાલોડિયાના જણાવ્યા મુજબ, દેશના અગ્રણી નિષ્ણાતોને એક મંચ પર લાવી ભારતમાં આર્થ્રોપ્લાસ્ટી સારવારના ધોરણોને વધુ ઉન્નત બનાવવાનો પ્રયાસ છે.

“આઇએએકૉન ૨૦૨૬ ઇન્ડિયન આર્થ્રોપ્લાસ્ટી એસોસિએશન માટે મહત્વપૂર્ણ સીમાચિહ્ન છે. આધુનિક તબીબી જ્ઞાન સાથે શૈક્ષણિક ચર્ચા અને સર્જિકલ અનુભવોનું અર્થપૂર્ણ આદાન-પ્રદાન થાય તે માટે આ કોન્ફરન્સ મહત્વપૂર્ણ મંચ બની રહેશે.”
— ડૉ. એચ. પી. ભાલોડિયા, આયોજન સમિતિના અધ્યક્ષ

આઇએએકૉન ૨૦૨૬ : એક નજરે

• તારીખ: ૨૩થી ૨૫ ઓક્ટોબર, ૨૦૨૬
• સ્થળ: ક્લબ ઓ-7, અમદાવાદ
• પૂર્વ-કોન્ફરન્સ વર્કશોપ: ૨૨ ઓક્ટોબર
• વર્કશોપ સ્થળ: બી. જે. મેડિકલ કોલેજ અને સિવિલ હોસ્પિટલ, અમદાવાદ
• થીમ: ‘ઇવોલ્વિંગ આર્થ્રોપ્લાસ્ટી: રોબોટિક્સ, કાઇનેમેટિક્સ એન્ડ ઇનોવેશન’
• પ્રતિનિધિઓ: ૧,૦૦૦થી વધુ
• નિષ્ણાતો: ૧૮૦
• વિદેશી નિષ્ણાતો: ૧૦
• વૈજ્ઞાનિક સત્રો: ૨૫
• કેડેવરિક સ્પેસિમેન: ૧૨
• મુખ્ય ટેકનોલોજી: એઆઈ, રોબોટિક્સ, થ્રી-ડી કેમેરા અને સર્જિકલ નેવિગેશન
• વિશેષ કાર્યક્રમ: સી. એસ. રાનાવત ગોલ્ડ મેડલ સ્પર્ધા