ફ્લાયદુબઈની દુબઈ-તેલ અવિવ ફ્લાઇટમાં હુમલા બાદ ઘાયલ હોવા છતાં કેપ્ટને સંભાળેલી સ્થિતિ; સ્પાઇસજેટમાં ‘લાઇન ટ્રેનિંગ કેપ્ટન’ તરીકેનો અનુભવ કામ આવ્યો
નવી દિલ્હી
ફ્લાયદુબઈની દુબઈથી તેલ અવિવ જઈ રહેલી ફ્લાઇટમાં સર્જાયેલી ગંભીર ઘટનામાં ભારતીય પાઇલટ કેપ્ટન સ્મિત મચ્છરની તાલીમ, અનુભવ અને તાત્કાલિક નિર્ણયક્ષમતા મહત્વપૂર્ણ સાબિત થઈ હોવાનું સામે આવ્યું છે. ફ્લાઇટ એફઝેડ1073માં કોપાઇલટના હુમલામાં ઘાયલ થયા બાદ પણ કેપ્ટન મચ્છારે કોકપિટ અને વિમાનની સ્થિતિને નિયંત્રણમાં રાખવામાં મહત્વની ભૂમિકા ભજવી હતી. વિમાનમાં સવાર 170થી વધુ લોકોની સુરક્ષા માટે તેમના પ્રયાસો નિર્ણાયક રહ્યા હતા.
ફ્લાયદુબઈમાં જોડાતા પહેલાં કેપ્ટન સ્મિત મચ્છર સ્પાઇસજેટમાં સિનિયર કમાન્ડર તરીકે ફરજ બજાવતા હતા. આ દરમિયાન તેમણે ‘લાઇન ટ્રેનિંગ કેપ્ટન’ તરીકે પણ કામગીરી કરી હતી. આ ભૂમિકામાં પાઇલટોને માત્ર નિયમિત ઉડાન કામગીરી માટે જ નહીં, પરંતુ ફ્લાઇટ દરમિયાન ઊભી થઈ શકે તેવી વિવિધ પડકારજનક પરિસ્થિતિઓનો સામનો કરવા માટે પણ તાલીમ આપવામાં આવતી હતી.
ફ્લાઇટમાં હુમલા દરમિયાન કેપ્ટન મચ્છર પોતે ગંભીર રીતે ઘાયલ થયા હોવા છતાં અન્ય પાઇલટોને વિમાનનું નિયંત્રણ સંભાળવામાં મદદ કરી શક્યા હતા. આ સમગ્ર પ્રક્રિયામાં તેમનો અગાઉનો તાલીમ અને કોકપિટ મેનેજમેન્ટનો અનુભવ ઉપયોગી બન્યો હોવાનું અહેવાલમાં જણાવાયું છે.
વિમાનમાં કેપ્ટન મચ્છરની સારવાર કરનારા ડેન્ટિસ્ટ ડૉ. શોતા મુસાએવના જણાવ્યા મુજબ, તેમની સ્થિતિ ગંભીર હતી. જોકે તે ક્રિટિકલ ન હતી, પરંતુ હુમલા દરમિયાન થયેલી ઇજાઓને કારણે મોટા પ્રમાણમાં લોહી વહી ગયું હતું.
આ સ્થિતિમાં પણ કેપ્ટન મચ્છરે કોકપિટમાંથી ઘટનાને નિયંત્રિત કરવામાં અને અન્ય લોકોને પરિસ્થિતિ સંભાળવામાં મદદ કરી હતી.
કેપ્ટન મચ્છરના એક જૂના પોડકાસ્ટનો ઉલ્લેખ પણ સામે આવ્યો છે. તેમાં તેમણે હવામાં ઉડતા વિમાનમાં અચાનક કોઈ ગંભીર પરિસ્થિતિ ઊભી થાય તો ક્રૂ અને મુસાફરોની ભૂમિકા કેટલી મહત્વપૂર્ણ બની શકે છે તે અંગે વાત કરી હતી. તેમણે ખાસ કરીને વિમાનમાં તબીબી જાણકારી ધરાવતી વ્યક્તિ અથવા પ્રશિક્ષિત ક્રૂ સભ્યો હાજર હોય તો કટોકટીની સ્થિતિમાં તેઓ જીવન બચાવવામાં મદદરૂપ થઈ શકે છે તેવો વિચાર વ્યક્ત કર્યો હતો.
કેપ્ટન સ્મિત મચ્છરના પરિવાર સાથે જોડાયેલી બીજી રસપ્રદ માહિતી પણ સામે આવી છે. તેમના ભાઈ પણ ફ્લાયદુબઈમાં પાઇલટ તરીકે ફરજ બજાવે છે. કેપ્ટન મચ્છાર મુંબઈના ઘાટકોપરમાં ઉછર્યા હોવાનું જણાવાયું છે અને તેમણે માનેસરમાં વિમાન ઉડાવવાની વિશેષ તાલીમ લીધી હતી.
તેમનું મચ્છર અટક ગુજરાત સાથે જોડાયેલું હોવાનું પણ અહેવાલમાં જણાવાયું છે. મચ્છર અટક ગુજરાતી મૂળ સાથે સંકળાયેલી હોવાનું અને ખાસ કરીને કચ્છ વિસ્તારમાં જોવા મળતી હોવાનું જણાવાયું છે.
અહેવાલ મુજબ, ફ્લાઇટના કોપાઇલટે કેપ્ટન મચ્છર પર હુમલો કર્યો હતો. આ હુમલા બાદ કેપ્ટન ઘાયલ થયા છતાં તેમણે તેને વિમાનનું નિયંત્રણ મેળવવાથી રોકવામાં ભૂમિકા ભજવી હતી. ત્યારબાદ કોકપિટનો દરવાજો ખોલવામાં આવ્યો અને વિમાનમાં સવાર અન્ય લોકોની મદદથી હુમલાખોરને કાબૂમાં લેવામાં આવ્યો.
આ પછી વિમાનમાં હાજર અન્ય પાઇલટોએ ફ્લાઇટનું નિયંત્રણ સંભાળ્યું અને વિમાનને સાઉદી અરેબિયામાં સુરક્ષિત રીતે લેન્ડ કરવામાં આવ્યું. સમગ્ર ઘટનામાં કેપ્ટન મચ્છરની તાલીમ અને લાંબા સમયનો ઉડ્ડયન અનુભવ મહત્વપૂર્ણ બન્યો હોવાનું અહેવાલમાં સામે આવ્યું છે.
કેપ્ટન સ્મિત મચ્છર વિશે
- ફ્લાયદુબઈના પાઇલટ
- અગાઉ સ્પાઇસજેટમાં સિનિયર કમાન્ડર
- સ્પાઇસજેટમાં ‘લાઇન ટ્રેનિંગ કેપ્ટન’ તરીકે કામગીરી
- મુંબઈના ઘાટકોપરમાં ઉછેર
- માનેસરમાં વિશેષ ફ્લાઇટ ટ્રેનિંગ
- ભાઈ પણ ફ્લાયદુબઈમાં પાઇલટ
