29 નવેમ્બરે 10મી આવૃત્તિ યોજાશે; રેસમાં દોડવીરોનું પ્રદર્શન વર્લ્ડ એથ્લેટિક્સ રેન્કિંગ માટે વિચારણા હેઠળ આવી શકશે
અમદાવાદ
અમદાવાદમાં 29 નવેમ્બર, 2026ના રોજ યોજાનારી અદાણી અમદાવાદ મેરેથોનની 10મી આવૃત્તિ અગાઉ તેને ‘વર્લ્ડ એથ્લેટિક્સ ગ્લોબલ કેલેન્ડર’માં સ્થાન મળ્યું છે. મેરેથોન માટે આ નોંધપાત્ર આંતરરાષ્ટ્રીય સિદ્ધિ માનવામાં આવી રહી છે. આ માન્યતા સાથે અમદાવાદની મેરેથોનને વૈશ્વિક રોડ-રેસિંગ કેલેન્ડરમાં વધુ મજબૂત સ્થાન મળ્યું છે.
વૈશ્વિક એથ્લેટિક્સ કેલેન્ડરમાં સ્થાન
વર્લ્ડ એથ્લેટિક્સ એ એથ્લેટિક્સ રમતનું વૈશ્વિક સંચાલન કરતી સંસ્થા છે, જે 214 સભ્ય ફેડરેશન સાથે રમતના આંતરરાષ્ટ્રીય ધોરણો અને સ્પર્ધાઓનું સંચાલન કરે છે. તેનું ગ્લોબલ કેલેન્ડર વિશ્વભરમાં યોજાતી માન્યતા પ્રાપ્ત એથ્લેટિક્સ સ્પર્ધાઓ માટે એક સામાન્ય વૈશ્વિક સંદર્ભ પૂરો પાડે છે.
અદાણી અમદાવાદ મેરેથોનના ગ્લોબલ કેલેન્ડરમાં સમાવેશનો મહત્વનો અર્થ એ છે કે આ રેસમાં નોંધાયેલ દોડવીરોનું પ્રદર્શન વર્લ્ડ એથ્લેટિક્સ રેન્કિંગ માટે વિચારણા હેઠળ આવી શકે છે. આ સાથે અમદાવાદ આંતરરાષ્ટ્રીય સ્તરે માન્ય રોડ-રેસિંગ ઈવેન્ટ યોજતા શહેરોની યાદીમાં વધુ મજબૂત રીતે સ્થાન પામ્યું છે.
આયોજનના આંતરરાષ્ટ્રીય ધોરણોની માન્યતા
આ માન્યતા મેરેથોનના આયોજનમાં જાળવવામાં આવતા વિવિધ આંતરરાષ્ટ્રીય ધોરણોને પણ પ્રતિબિંબિત કરે છે. તેમાં કોર્સનું ચોક્કસ માપન અને પ્રમાણપત્ર, રેસ મેનેજમેન્ટ, તબીબી સુવિધાઓ અને સુરક્ષા વ્યવસ્થા, સચોટ ટાઈમિંગ અને પરિણામ પ્રણાલી, શ્રેષ્ઠ એથ્લિટ મેનેજમેન્ટ તેમજ ડોપિંગ વિરોધી નિયમોનું પાલન જેવી બાબતોનો સમાવેશ થાય છે.
એક દાયકામાં હજારોમાંથી 24 હજારથી વધુ દોડવીરો સુધીની સફર
અદાણી અમદાવાદ મેરેથોનની સફર છેલ્લા એક દાયકામાં સતત વિસ્તરી છે. શરૂઆતની આવૃત્તિઓમાં અમુક હજાર દોડવીરોએ ભાગ લીધો હતો, જ્યારે ગત આવૃત્તિમાં 24 હજારથી વધુ સ્પર્ધકો મેરેથોનનો હિસ્સો બન્યા હતા. આમ, મેરેથોન અમદાવાદની સૌથી મોટી રમતગમતની સામૂહિક ઈવેન્ટ્સમાં સ્થાન મેળવી ચૂકી છે.
દર વર્ષે દોડવીરો ઉપરાંત સ્વયંસેવકો, પરિવારો અને સશસ્ત્ર દળોના જવાનો પણ અમદાવાદના માર્ગો પર ઉતરીને આ રમતોત્સવમાં જોડાય છે.
#Run4OurSoldiers પહેલ સાથે ખાસ જોડાણ
મેરેથોનની #Run4OurSoldiers પહેલ પણ તેની વિશિષ્ટ ઓળખ બની છે. છેલ્લા એક દાયકાથી આ પહેલ ભારતીય સશસ્ત્ર દળોના સાહસ, સેવા અને બલિદાનને સન્માન આપવા માટે નાગરિકો અને સશસ્ત્ર દળોના જવાનોને એકસાથે લાવે છે. જેના કારણે મેરેથોન માત્ર રમતગમતની સ્પર્ધા ન રહીને સામાજિક ઉદ્દેશ સાથે જોડાયેલી સામૂહિક પહેલ બની છે.
કોમનવેલ્થ ગેમ્સની તૈયારી વચ્ચે મહત્વપૂર્ણ સિદ્ધિ
અમદાવાદ 2030 કોમનવેલ્થ ગેમ્સની તૈયારી કરી રહ્યું છે ત્યારે અદાણી અમદાવાદ મેરેથોનને મળેલી આ આંતરરાષ્ટ્રીય માન્યતા શહેરની રમતગમતની ઓળખને વધુ મજબૂત બનાવે છે. મોટા આંતરરાષ્ટ્રીય રમતોત્સવોના આયોજન માટે અમદાવાદ પોતાની ક્ષમતા વિકસાવી રહ્યું છે ત્યારે વર્લ્ડ એથ્લેટિક્સ ગ્લોબલ કેલેન્ડરમાં શહેરની ફ્લેગશિપ મેરેથોનનો સમાવેશ આ દિશામાં મહત્વપૂર્ણ પગલું છે.
અદાણી સ્પોર્ટ્સલાઈનના ચીફ બિઝનેસ ઓફિસર સંજય આદેશરાએ જણાવ્યું હતું કે વર્લ્ડ એથ્લેટિક્સ ગ્લોબલ કેલેન્ડરનો ભાગ બનવું ગૌરવની ક્ષણ છે. તેમણે દોડવીરો, સ્વયંસેવકો અને સશસ્ત્ર દળોના જવાનો સહિત મેરેથોનને આ સ્તર સુધી પહોંચાડવામાં યોગદાન આપનાર સૌનો આભાર માન્યો હતો. તેમણે જણાવ્યું કે કોર્સ પ્રમાણપત્ર, દોડવીરોની સુરક્ષા, ટાઈમિંગ સિસ્ટમ અને શ્રેષ્ઠ એથ્લિટ મેનેજમેન્ટ જેવા ધોરણો જાળવીને 10મી આવૃત્તિને આંતરરાષ્ટ્રીય માન્યતાને અનુરૂપ બનાવવાનો પ્રયાસ રહેશે.
