અભિલાષ રાવલ અને કૌશાએ અમદાવાદ જિલ્લા ટેબલ ટેનિસના ખિતાબ જીત્યા, નક્ષ પટેલનો ડબલ ક્રાઉન

મલ્ટિમેટ 8મી અમદાવાદ જિલ્લા ટેબલ ટેનિસ ચેમ્પિયનશિપ-2026માં 17 કેટેગરીના વિજેતાઓ જાહેર; 283 એન્ટ્રીઓ સાથે ત્રણ દિવસીય સ્પર્ધાનું સમાપન

અમદાવાદ

ટેબલ ટેનિસ એસોસિયેશન ઑફ અમદાવાદ (TTAA) દ્વારા આયોજિત મલ્ટિમેટ 8મી અમદાવાદ જિલ્લા ટેબલ ટેનિસ ચેમ્પિયનશિપ-2026નું રવિવારે વીર સાવરકર સ્પોર્ટ્સ કોમ્પ્લેક્સ, નારણપુરા ખાતે સમાપન થયું હતું. 2થી 4 ઓક્ટોબર દરમિયાન યોજાયેલી ત્રણ દિવસીય સ્પર્ધામાં વિવિધ વયજૂથ અને કેટેગરીમાં કુલ 283 એન્ટ્રીઓ નોંધાઈ હતી. સ્પર્ધામાં આશરે રૂ.80,000ની કુલ ઇનામી રકમ ઉપરાંત ટ્રોફી અને મેડલ્સ એનાયત કરવામાં આવ્યા હતા.

મેન્સ સિંગલ્સમાં અભિલાષ રાવલનો શાનદાર વિજય

પ્રતિષ્ઠિત મેન્સ સિંગલ્સની ફાઇનલમાં અભિલાષ રાવલે સોહમ ભટ્ટાચાર્યને પાંચ ગેમ સુધી ચાલેલા રોમાંચક મુકાબલામાં 11-7, 12-10, 6-11, 11-8, 11-8થી હરાવી અમદાવાદ જિલ્લા ચેમ્પિયનશિપનો ખિતાબ પોતાના નામે કર્યો હતો. સોહમ અગાઉની ત્રણેય જિલ્લા રેન્કિંગ સ્પર્ધામાં રનર્સ-અપ રહ્યો હતો અને આ સ્પર્ધામાં પણ ફાઇનલ સુધી પહોંચ્યો હતો.

વુમન્સ સિંગલ્સમાં કૌશાએ નિધિ પ્રજાપતિને 11-2, 11-9, 8-11, 11-7, 11-4થી હરાવી ચેમ્પિયનશિપ જીતી હતી. કૌશાએ સમગ્ર મુકાબલા દરમિયાન સંયમ અને આત્મવિશ્વાસ સાથે શાનદાર રમતનું પ્રદર્શન કર્યું હતું.

અભિલક્ષ, નિધિ અને માલવ પણ ચેમ્પિયન

અન્ડર-19 બોયઝમાં અભિલક્ષ પટેલે માલવ પંચાલને છ ગેમ સુધી ચાલેલા મુકાબલામાં 10-12, 11-5, 11-7, 11-4, 8-11, 13-11થી હરાવ્યો હતો. અન્ડર-19 ગર્લ્સમાં નિધિ પ્રજાપતિએ મિશા લખાણીને 11-4, 11-6, 11-5, 11-3થી હરાવી ખિતાબ જીત્યો હતો.

અન્ડર-17 બોયઝમાં માલવ પંચાલે અંશ ખમારને 11-6, 11-5, 11-8થી હરાવી ચેમ્પિયનશિપ મેળવી હતી. અન્ડર-17 ગર્લ્સમાં નિત્યા ચોક્સીએ ઝિનાલી પટેલને 11-8, 6-11, 11-8, 11-8થી હરાવી ખિતાબ પોતાના નામે કર્યો હતો.

નક્ષ પટેલનો ડબલ ક્રાઉન

સ્પર્ધામાં સૌથી નોંધપાત્ર પ્રદર્શન નક્ષ પટેલનું રહ્યું હતું. નક્ષે અન્ડર-15 અને અન્ડર-13 બોયઝ બંને કેટેગરીમાં ચેમ્પિયન બની ડબલ ક્રાઉન મેળવ્યો હતો. અન્ડર-15ની ફાઇનલમાં તેણે અંશ ખમારને 11-7, 10-12, 12-10, 7-11, 11-4થી જ્યારે અન્ડર-13ની ફાઇનલમાં શ્લોક દવેને 11-8, 11-7, 11-9થી હરાવ્યો હતો.

અન્ડર-15 ગર્લ્સમાં ખાનક શાહે બે ગેમ ગુમાવ્યા બાદ શાનદાર કમબેક કરીને નિત્યાને 5-11, 5-11, 11-8, 11-7, 11-8થી હરાવી ખિતાબ જીત્યો હતો. અન્ડર-13 ગર્લ્સમાં ઝિનાલી પટેલે મિશા લખાણીને 11-1, 11-3, 11-2થી હરાવી ચેમ્પિયનશિપ મેળવી હતી.

યુવા અને વેટરન ખેલાડીઓનું પણ શાનદાર પ્રદર્શન

અન્ડર-11 બોયઝમાં સાહસ મંગલે રૂશિલ ત્રિવેદીને 11-6, 11-4, 11-6થી હરાવી ખિતાબ જીત્યો હતો. અન્ડર-11 ગર્લ્સમાં રિયા શાહે વિહા રાઠોડને 11-9, 11-7, 11-9થી હરાવી ચેમ્પિયનશિપ મેળવી હતી.

અન્ડર-9 બોયઝમાં શ્રેયાંશ ક્રિસ્ટીએ મહેન ઉપાધ્યાયને 11-5, 11-2, 11-5થી જ્યારે અન્ડર-9 ગર્લ્સમાં દુર્વા શાહે ઈશિતા જોશીને 11-7, 7-11, 11-7, 11-7થી હરાવી ખિતાબ જીત્યો હતો.

વેટરન કેટેગરીમાં મેન્સ 39+ સિંગલ્સમાં નિરવ પટેલ, મેન્સ 49+માં અમિષ પટેલ અને મેન્સ 59+માં સુભાષ અગ્રવાલ ચેમ્પિયન બન્યા હતા. આ સાથે સ્પર્ધાની તમામ 17 કેટેગરીના વિજેતાઓ નક્કી થયા હતા.

હવે રાજ્ય કક્ષાની સ્પર્ધા માટે અમદાવાદની ટીમની પસંદગી થશે

આ ચેમ્પિયનશિપ 2026ની અમદાવાદ જિલ્લાની ચોથી અને અંતિમ જિલ્લા સ્પર્ધા હતી. હવે આ સ્પર્ધાના પરિણામોના આધારે અમદાવાદ જિલ્લા ટેબલ ટેનિસ ટીમની પસંદગી કરવામાં આવશે. પસંદ થયેલી ટીમ આગામી ગુજરાત સ્ટેટ અને ઇન્ટર-ડિસ્ટ્રિક્ટ ટેબલ ટેનિસ ચેમ્પિયનશિપ-2026માં અમદાવાદ જિલ્લાનું પ્રતિનિધિત્વ કરશે. આ સ્પર્ધા ગાંધીધામ ખાતે 16થી 20 ઓક્ટોબર 2026 દરમિયાન યોજાનાર છે.

અમદાવાદ જિલ્લા ટેબલ ટેનિસ ચેમ્પિયનશિપ-2026 : તમામ અંતિમ પરિણામો

મલ્ટિમેટ 8મી અમદાવાદ જિલ્લા ટેબલ ટેનિસ ચેમ્પિયનશિપ-2026માં કુલ 17 કેટેગરીના અંતિમ પરિણામો નીચે મુજબ રહ્યા: