ટ્રેલર પાછળ પૂરપાટ ઝડપે ધડાકાભેર કાર ઘૂસી; ઘટનાસ્થળે 6નાં મોત, સારવાર દરમિયાન એકનું મોત, સમગ્ર અલંગ પંથકમાં શોકનો માહોલ
ભાવનગર
ભાવનગર જિલ્લાના ત્રાપજ નજીક મંગળવારે વહેલી સવારે ગમખ્વાર માર્ગ અકસ્માત સર્જાયો હતો. પૂરપાટ ઝડપે આવી રહેલી એક કાર ઉભેલા ટ્રેલરના પાછળના ભાગમાં ધડાકાભેર ઘૂસી જતાં ભયાનક અકસ્માત સર્જાયો હતો. અકસ્માત એટલો ગંભીર હતો કે કારમાં સવાર 6 લોકોનાં ઘટનાસ્થળે જ મોત નીપજ્યાં હતાં. જ્યારે એક વ્યક્તિ ગંભીર રીતે ઈજાગ્રસ્ત થતાં તેને તાત્કાલિક સારવાર માટે હોસ્પિટલ ખસેડવામાં આવ્યો હતો. જોકે, સારવાર દરમિયાન તેનું પણ મોત નીપજતાં અકસ્માતમાં મૃત્યુઆંક 7 પર પહોંચ્યો છે.
કાર ટ્રેલર પાછળ ઘૂસી ગઈ
પ્રાપ્ત માહિતી અનુસાર, ત્રાપજ નજીકથી કાર પસાર થઈ રહી હતી ત્યારે માર્ગ પર ઉભેલા ટ્રેલરના પાછળના ભાગે કાર પૂરપાટ ઝડપે ધડાકાભેર અથડાઈ હતી. અથડામણ એટલી જોરદાર હતી કે કારનો આગળનો ભાગ સંપૂર્ણપણે કચ્ચરઘાણ થઈ ગયો હતો. અકસ્માતને પગલે આસપાસના વિસ્તારમાં અફરાતફરીનો માહોલ સર્જાયો હતો. સ્થાનિક લોકો તાત્કાલિક મદદ માટે દોડી આવ્યા હતા અને પોલીસને જાણ કરવામાં આવી હતી.
અલંગ શિપબ્રેકિંગ યાર્ડના સ્ટાફના સભ્યો
આ અકસ્માતમાં જીવ ગુમાવનાર તમામ લોકો અલંગ શિપબ્રેકિંગ યાર્ડના સ્ટાફના સભ્યો હોવાનું સામે આવ્યું છે. મળતી માહિતી મુજબ, મૃતકો અલંગના બે અલગ-અલગ પ્લોટમાં ફરજ બજાવતા હતા. અકસ્માતના સમાચાર મળતાં જ અલંગ પંથકમાં શોકની લાગણી પ્રસરી ગઈ હતી. મૃતકોના પરિવારજનો પર પણ આભ તૂટી પડ્યું છે.
મૃતકોમાં વિજય, સાધુ સહિત સાત લોકો
અકસમાતમાં મૃત્યુ પામેલા છ લોકોની ઓળખ વિજય, સાધુ, જિગ્નેશ, ભાર્ગવ, હિરેન અને યોગેશ તરીકે થઈ છે. જ્યારે અકસ્માતમાં જયેશ નામનો વ્યક્તિ ગંભીર રીતે ઈજાગ્રસ્ત થયો હતો. તેને તાત્કાલિક નજીકની હોસ્પિટલમાં સારવાર માટે ખસેડવામાં આવ્યો હતો. જોકે, તબીબોના પ્રયાસો છતાં સારવાર દરમિયાન જયેશનું મોત થયું હતું.
પોલીસે તપાસ હાથ ધરી
અકસ્માતની જાણ થતાં જ સ્થાનિક પોલીસનો કાફલો તાત્કાલિક ઘટનાસ્થળે પહોંચી ગયો હતો. પોલીસે મૃતદેહોને કબજે લઈ પોસ્ટમોર્ટમ માટે હોસ્પિટલ ખસેડવાની કાર્યવાહી હાથ ધરી હતી. સાથે જ અકસ્માત કેવી રીતે સર્જાયો, કારની ઝડપ કેટલી હતી અને ટ્રેલર કયા સંજોગોમાં રસ્તા પર ઊભું હતું તે સહિતના મુદ્દે તપાસ શરૂ કરવામાં આવી છે.
આ ગમખ્વાર અકસ્માતે એકસાથે સાત પરિવારોને ઊંડા આઘાતમાં ધકેલી દીધા છે. અલંગ શિપબ્રેકિંગ યાર્ડના કર્મચારીઓના મોતના સમાચારથી સમગ્ર અલંગ અને આસપાસના વિસ્તારમાં શોકનો માહોલ છવાઈ ગયો છે. પોલીસ દ્વારા અકસ્માતની સમગ્ર ઘટનાની તપાસ હાથ ધરવામાં આવી છે.
