રિલાયન્સ ફાઉન્ડેશન અને એસ્ટે લોડર કંપનીઝ ચેરિટેબલ ફાઉન્ડેશનની લાંબાગાળાની ભાગીદારી

ભારતમાં 10 લાખ બાળકીઓ અને યુવતીઓને સશક્ત બનાવવાનું લક્ષ્ય, જીવન કૌશલ્યથી લઈને ડિજિટલ અને નાણાકીય સાક્ષરતા સુધીની તાલીમ અપાશે

મુંબઈ / ન્યૂ યોર્ક

ભારતમાં બાળકીઓ અને યુવતીઓને સશક્ત બનાવવા માટે રિલાયન્સ ફાઉન્ડેશન અને ધ એસ્ટે લોડર કંપનીઝ ચેરિટેબલ ફાઉન્ડેશને લાંબાગાળાની સહભાગિતાની જાહેરાત કરી છે. આ ભાગીદારીનો મુખ્ય હેતુ સમગ્ર ભારતમાં 10 લાખ બાળકીઓ અને યુવતીઓને જીવનમાં આગળ વધવા માટે જરૂરી કૌશલ્યો, આત્મવિશ્વાસ અને નવી તકો પૂરી પાડવાનો છે. આ કાર્યક્રમની શરૂઆત મહારાષ્ટ્ર અને મધ્યપ્રદેશથી થશે અને ભવિષ્યમાં દેશનાં અન્ય રાજ્યોમાં પણ તેનો વિસ્તાર કરવાની યોજના છે.

14થી 20 વર્ષની યુવતીઓ પર વિશેષ ધ્યાન

આ બે વર્ષીય કાર્યક્રમ 14થી 20 વર્ષની વયજૂથની ગ્રામીણ અને શહેરી વિસ્તારોમાં રહેતી બાળકીઓ તથા યુવતીઓ માટે તૈયાર કરવામાં આવ્યો છે. તેનો ઉદ્દેશ તેમને જીવનના આગામી તબક્કા માટે તૈયાર કરવાનો અને શિક્ષણ, રોજગાર તથા આજીવિકાના ક્ષેત્રોમાં યોગ્ય પસંદગી કરવા સક્ષમ બનાવવાનો છે. કાર્યક્રમ હેઠળ યુવતીઓને જીવન કૌશલ્ય, ડિજિટલ સાક્ષરતા અને નાણાકીય સમજણ વિકસાવવા માટે તાલીમ આપવામાં આવશે.

ઈશા અંબાણી: દરેક બાળકીમાં મોટાં સપનાં જોવાનો આત્મવિશ્વાસ હોવો જોઈએ

રિલાયન્સ ફાઉન્ડેશનનાં ડિરેક્ટર ઈશા અંબાણીએ જણાવ્યું હતું કે દરેક બાળકીને મોટાં સપનાં જોવાનો આત્મવિશ્વાસ, નેતૃત્વ કરવાની હિંમત અને પોતાની આકાંક્ષાઓ પૂર્ણ કરવાની તક મળવી જોઈએ. તેમણે આ ભાગીદારીને 10 લાખ બાળકીઓ અને યુવતીઓની ક્ષમતાને સાકાર કરવાની દિશામાં મહત્ત્વપૂર્ણ પગલું ગણાવ્યું હતું. તેમના મતે, આ પહેલથી માત્ર વ્યક્તિગત જીવનમાં જ નહીં, પરંતુ પરિવારો અને સમગ્ર સમુદાયમાં પણ સકારાત્મક પરિવર્તન લાવવાની તક ઊભી થશે.

મહિલાઓને નવી તકો આપવા માટે સહિયારો સંકલ્પ

ધ એસ્ટે લોડર કંપનીઝના પ્રેસિડેન્ટ અને ચીફ એક્ઝિક્યુટિવ ઓફિસર તથા તેના ચેરિટેબલ ફાઉન્ડેશનના પ્રેસિડેન્ટ સ્ટેફન ડી લા ફેવેરીએ જણાવ્યું હતું કે ભારતમાં બાળકીઓ અને યુવતીઓ માટે નવી તકો ઊભી કરવા રિલાયન્સ ફાઉન્ડેશન સાથે જોડાવાનો તેમને ગર્વ છે. તેમણે કહ્યું કે મહિલાઓને શીખવાની, નેતૃત્વ કરવાની અને પોતાનું ભવિષ્ય ઘડવાની તક મળે ત્યારે તેઓ સમાજમાં નોંધપાત્ર પરિવર્તન લાવી શકે છે.

તેમણે વધુમાં જણાવ્યું કે એસ્ટે લોડર કંપનીઝની સ્થાપના એક મહિલા ઉદ્યોગસાહસિકે કરી હતી અને આજે કંપનીના વૈશ્વિક કાર્યબળમાં મહિલાઓનો હિસ્સો 80 ટકાથી વધુ છે. આ અનુભવ મહિલાઓની ક્ષમતાઓને ઓળખવા અને તેમને આગળ વધારવા માટેની સંસ્થાની પ્રતિબદ્ધતાને દર્શાવે છે.

જીવન કૌશલ્યથી નાણાકીય સાક્ષરતા સુધી તાલીમ

આ કાર્યક્રમ અંતર્ગત યુવતીઓમાં આત્મવિશ્વાસ, આત્મસન્માન, નિર્ણય લેવાની ક્ષમતા અને નેતૃત્વ કૌશલ્યો વિકસાવવામાં આવશે. ડિજિટલ સાધનો અને નાણાકીય સેવાઓનો સુરક્ષિત તથા અસરકારક ઉપયોગ કરવા માટે પણ તેમને માર્ગદર્શન અપાશે.

આ ઉપરાંત, શિક્ષણ, રોજગાર, આજીવિકા અને ઉદ્યોગસાહસિકતાના વિવિધ વિકલ્પોની માહિતી આપવામાં આવશે. સામાજિક અને સાંસ્કૃતિક પરિબળો વચ્ચે પોતાની સુરક્ષા, શિક્ષણ અને રોજગારી સંબંધિત નિર્ણયો લેવામાં યુવતીઓ વધુ સક્ષમ બને તે માટે પણ પ્રયાસ કરાશે.

‘ગર્લ ઇફેક્ટ’ સાથે મળીને કાર્યક્રમનું અમલીકરણ

આ પહેલને બાળકીઓના સશક્તીકરણ માટે કાર્યરત બિનનફાકારક સંસ્થા ‘ગર્લ ઇફેક્ટ’ના સહયોગથી તૈયાર કરવામાં આવી રહી છે. સંસ્થા અભ્યાસક્રમ અને શૈક્ષણિક સંસાધનો વિકસાવવામાં નિષ્ણાત સહાય પૂરી પાડશે. કાર્યક્રમમાં પ્રત્યક્ષ તથા ડિજિટલ તાલીમ અને ક્ષમતા નિર્માણનો સમાવેશ થશે. તેના અમલીકરણ માટે સ્થાનિક સ્તરે કાર્યરત ભાગીદારો સાથે પણ સહયોગ કરવામાં આવશે.

રિલાયન્સ ફાઉન્ડેશન 2010થી શિક્ષણ, રમતગમત અને આજીવિકાની વિવિધ પહેલો દ્વારા મહિલાઓ તથા યુવતીઓના સશક્તીકરણ માટે કાર્યરત છે. બીજી તરફ, એસ્ટે લોડર કંપનીઝ અને તેનું ચેરિટેબલ ફાઉન્ડેશન બે દાયકાથી વધુ સમયથી ભારતમાં આરોગ્ય, શિક્ષણ અને ઉદ્યોગસાહસિકતાના ક્ષેત્રોમાં વિવિધ સંસ્થાઓ સાથે મળીને કામ કરે છે. આ નવી ભાગીદારી મહિલાઓ અને યુવતીઓ માટે વધુ તકો ઊભી કરવા તથા તેમને આત્મનિર્ભર ભવિષ્ય તરફ આગળ વધારવાના સહિયારા પ્રયાસને વેગ આપશે.