આરોગ્ય મંત્રી અને કામરેજના ધારાસભ્ય પ્રફુલ પાનશેરીયાની અધ્યક્ષતામાં PIU, GETCO અને સિવિલ વિભાગના અધિકારીઓ સાથે બેઠક યોજાઈ; દક્ષિણ ગુજરાતમાં અદ્યતન આરોગ્ય સેવાઓને મળશે વેગ
કામરેજ:
દક્ષિણ ગુજરાતમાં અદ્યતન આરોગ્ય સેવાઓનું માળખું વધુ મજબૂત બનાવવા માટે કામરેજ વિધાનસભા ક્ષેત્રમાં વિશાળ આરોગ્ય સંકુલ વિકસાવવાનું આયોજન હાથ ધરવામાં આવ્યું છે. આ મહત્વાકાંક્ષી પ્રોજેક્ટને અવિરત અને અદ્યતન વીજ પુરવઠો મળી રહે તે માટે 66 KV સબસ્ટેશનની સ્થાપના સહિતની જરૂરી માળખાકીય સુવિધાઓના આયોજનની સમીક્ષા કરવામાં આવી હતી. રાજ્યના આરોગ્ય મંત્રી અને કામરેજના ધારાસભ્ય પ્રફુલ પાનશેરીયાની અધ્યક્ષતામાં PIU, GETCO તથા સિવિલ વિભાગના અધિકારીઓ સાથે આ અંગે વિસ્તૃત બેઠક યોજાઈ હતી.
બેઠકમાં આરોગ્ય સંકુલના નિર્માણને અનુરૂપ વીજ પુરવઠા સહિતની પાયાની સુવિધાઓનું આયોજન, સંબંધિત વિભાગો વચ્ચે સંકલન અને પ્રોજેક્ટની કામગીરી સુવ્યવસ્થિત રીતે આગળ વધે તેવા વિવિધ મુદ્દાઓ પર ચર્ચા કરવામાં આવી હતી.
1,500 બેડની જનરલ અને 500થી વધુ બેડની સુપર સ્પેશિયાલિટી હોસ્પિટલો
કામરેજમાં વિકસાવવામાં આવનાર આ વિશાળ આરોગ્ય સંકુલમાં 1,500 બેડની જનરલ બ્રોડ સ્પેશિયાલિટી હોસ્પિટલ સ્થાપિત કરવાની યોજના છે. આ ઉપરાંત 500થી વધુ બેડની ક્ષમતા ધરાવતી વિશેષ સારવારની હોસ્પિટલો પણ વિકસાવવામાં આવશે. તેમાં કાર્ડિયાક એન્ડ ન્યુરો, યુરોલોજી એન્ડ નેફ્રોલોજી તથા કેન્સર જેવી ગંભીર બીમારીઓની સારવાર માટેની સુપર સ્પેશિયાલિટી સેવાઓનો સમાવેશ થાય છે.
આ પ્રોજેક્ટ સાકાર થતાં દક્ષિણ ગુજરાતના દર્દીઓને હૃદયરોગ, ન્યુરોલોજી, મૂત્રમાર્ગ અને કિડની સંબંધિત બીમારીઓ તેમજ કેન્સરની સારવાર માટે અદ્યતન આરોગ્ય સુવિધાઓ ઉપલબ્ધ કરાવવાની દિશામાં મહત્વપૂર્ણ પગલું સાબિત થઈ શકે છે. વિશાળ બેડ ક્ષમતા ધરાવતા આ સંકુલથી સામાન્ય સારવારથી લઈને જટિલ અને વિશિષ્ટ તબીબી સારવાર સુધીની સેવાઓને એક જ સ્થળે વિસ્તૃત કરવાની તક મળશે.
મેડિકલ શિક્ષણ અને સંશોધનને પણ મળશે પ્રોત્સાહન
આરોગ્ય સંકુલ માત્ર સારવાર પૂરતું મર્યાદિત નહીં રહે, પરંતુ મેડિકલ શિક્ષણ, તબીબી સંશોધન અને ઇમરજન્સી સેવાઓના વિકાસ માટે પણ મહત્વપૂર્ણ બની શકે છે. આધુનિક આરોગ્ય સુવિધાઓના વિસ્તરણથી દક્ષિણ ગુજરાતના નાગરિકોને ગુણવત્તાસભર સારવાર ઉપલબ્ધ કરાવવાની સાથે આરોગ્ય ક્ષેત્રમાં વધુ સારી વ્યવસ્થાઓ ઊભી કરવાનો માર્ગ મોકળો થશે.
સમયસર આયોજન અને વિભાગો વચ્ચે સંકલન પર ભાર
આરોગ્ય સંકુલ જેવા મોટા પ્રોજેક્ટ માટે વીજળી સહિતની પાયાની સુવિધાઓનું યોગ્ય આયોજન અત્યંત આવશ્યક છે. ખાસ કરીને હોસ્પિટલમાં વિવિધ તબીબી સાધનો, ઇમરજન્સી વિભાગો અને અન્ય જરૂરી સેવાઓ સતત કાર્યરત રહી શકે તે માટે વિશ્વસનીય વીજ પુરવઠો મહત્વપૂર્ણ છે. આ બાબતને ધ્યાનમાં રાખીને 66 KV સબસ્ટેશન સહિતની માળખાકીય સુવિધાઓના આયોજનની સમીક્ષા કરવામાં આવી હતી.
આરોગ્ય મંત્રી અને કામરેજના ધારાસભ્ય પ્રફુલ પાનશેરીયાએ સંબંધિત વિભાગોના અધિકારીઓને પરસ્પર સંકલન જાળવીને જરૂરી કાર્યવાહી હાથ ધરવા અને પ્રોજેક્ટને અનુરૂપ માળખાકીય સુવિધાઓનું સમયસર આયોજન થાય તે માટે માર્ગદર્શન આપ્યું હતું.
કામરેજમાં આકાર પામનારા આ વિશાળ આરોગ્ય સંકુલને કારણે દક્ષિણ ગુજરાતમાં આરોગ્ય સેવાઓના વિસ્તરણને નવી દિશા મળવાની અપેક્ષા છે. પ્રોજેક્ટને અનુરૂપ પાયાની સુવિધાઓનું આયોજન અને સંબંધિત વિભાગો વચ્ચેનું સંકલન તેની કામગીરીને આગળ વધારવામાં મહત્વપૂર્ણ ભૂમિકા ભજવશે.
