દિવાળીના વેકેશનમાં ગુજરાતના પ્રવાસન સ્થળો પર પ્રવાસીઓનો રેકોર્ડબ્રેક ધસારો: 8 સ્થળોએ 38 લાખથી વધુ લોકોએ પ્રવાસન માણ્યું

Spread the love
  • દ્વારકામાં પ્રવાસીઓની સંખ્યામાં 128.8 ટકાનો જંગી ઉછાળો, અંબાજીમાં 48.9 ટકા અને સોમનાથમાં 43.9 ટકાનો વધારો.
  • નડાબેટમાં 54.1 ટકા અને સ્ટેચ્યુ ઓફ યુનિટી ખાતે 32.35 ટકા વધુ પ્રવાસીઓ ઉમટ્યા.
  • 6થી 14 નવેમ્બર દરમિયાન રાજ્યનાં 8 મુખ્ય પ્રવાસન અને યાત્રાધામોમાં પ્રવાસીઓની સંખ્યાએ નવો વિક્રમ સર્જ્યો.

અમદાવાદ:

ગુજરાતમાં દિવાળીના તહેવારો અને વેકેશન દરમિયાન પ્રવાસન ક્ષેત્રે અભૂતપૂર્વ ઉત્સાહ જોવા મળ્યો છે. રાજ્યનાં ઐતિહાસિક પ્રવાસન સ્થળો, ધાર્મિક યાત્રાધામો અને આધુનિક પ્રવાસન આકર્ષણો પર દેશ-વિદેશના પ્રવાસીઓનો રેકોર્ડબ્રેક ધસારો નોંધાયો છે. દિવાળીના નવ દિવસના તહેવારી સમયગાળા દરમિયાન ગુજરાતનાં આઠ મુખ્ય પ્રવાસન અને ધાર્મિક સ્થળોએ 38 લાખથી વધુ પ્રવાસીઓએ મુલાકાત લેતાં રાજ્યના પ્રવાસન ક્ષેત્રે નવો કીર્તિમાન સ્થાપિત થયો છે.

દ્વારકા, સોમનાથ, અંબાજી, નડાબેટ અને સ્ટેચ્યુ ઓફ યુનિટી સહિતનાં સ્થળોએ પ્રવાસીઓની સંખ્યામાં નોંધપાત્ર વધારો થયો છે. ખાસ કરીને દ્વારકામાં ગત વર્ષની સરખામણીએ પ્રવાસીઓની સંખ્યામાં 128.8 ટકાનો જંગી ઉછાળો નોંધાયો છે. આ આંકડા ગુજરાત પ્રવાસન ક્ષેત્રની વધતી લોકપ્રિયતા અને રાજ્યમાં વિકસાવવામાં આવી રહેલી પ્રવાસન સુવિધાઓની સફળતા દર્શાવે છે.

રાજ્યના પ્રવાસન વિભાગ દ્વારા પ્રવાસન સ્થળો અને યાત્રાધામો પર આધુનિક સુવિધાઓ, પ્રવાસીઓ માટેની વ્યવસ્થાઓ અને પ્રવાસનને પ્રોત્સાહન આપતાં આયોજનો કરવામાં આવી રહ્યાં છે. તેના પરિણામે ગુજરાત હવે ધાર્મિક પ્રવાસન ઉપરાંત ઐતિહાસિક, સાંસ્કૃતિક અને કુદરતી પ્રવાસન માટે પણ પ્રવાસીઓની પસંદગી બની રહ્યું છે.

દ્વારકામાં સૌથી વધુ 128.8 ટકાની વૃદ્ધિ

વર્ષ 2025ના દિવાળીના નવ દિવસના સમયગાળાની સરખામણીએ ચાલુ વર્ષે 6થી 14 નવેમ્બર, 2026 દરમિયાન રાજ્યનાં આઠ મુખ્ય સ્થળોએ પ્રવાસીઓની સંખ્યામાં નોંધપાત્ર વધારો થયો છે. તેમાં સૌથી વધુ આકર્ષણનું કેન્દ્ર દ્વારકા બન્યું છે. ભગવાન દ્વારકાધીશના દર્શન માટે દેશભરમાંથી ઉમટેલા શ્રદ્ધાળુઓને કારણે દ્વારકા મંદિરમાં 9.75 લાખથી વધુ પ્રવાસીઓએ દર્શન કર્યા હતા. ગત વર્ષની સરખામણીએ અહીં 128.8 ટકાનો વધારો નોંધાયો છે.

ધાર્મિક પ્રવાસન ક્ષેત્રે અંબાજી અને સોમનાથમાં પણ પ્રવાસીઓનો ભારે ધસારો જોવા મળ્યો હતો. અંબાજી મંદિર, ગબ્બર હિલ અને રોપ-વે ખાતે 11.95 લાખથી વધુ મુલાકાતીઓ નોંધાયા હતા, જે ગત વર્ષની સરખામણીએ 48.9 ટકાનો વધારો દર્શાવે છે. જ્યારે પ્રથમ જ્યોતિર્લિંગ સોમનાથ મહાદેવના દર્શન માટે 9.12 લાખથી વધુ શ્રદ્ધાળુઓ પહોંચ્યા હતા. અહીં પ્રવાસીઓની સંખ્યામાં 43.9 ટકાનો વધારો નોંધાયો છે.

નડાબેટથી સ્ટેચ્યુ ઓફ યુનિટી સુધી પ્રવાસીઓની પસંદગી

ગુજરાતના સરહદી પ્રવાસન સ્થળ નડાબેટની લોકપ્રિયતામાં પણ નોંધપાત્ર વધારો થયો છે. ભારત-પાકિસ્તાન સરહદ નજીક આવેલા આ પ્રવાસન સ્થળે 37 હજારથી વધુ પ્રવાસીઓએ મુલાકાત લીધી હતી. ગત વર્ષની સરખામણીએ અહીં 54.1 ટકાનો વધારો નોંધાયો છે. સરહદી વિસ્તારની વિશિષ્ટતા, રાષ્ટ્રભક્તિની અનુભૂતિ અને પ્રવાસન સુવિધાઓને કારણે નડાબેટ પ્રવાસીઓ માટે વિશેષ આકર્ષણ બન્યું છે.

બીજી તરફ, વિશ્વની સૌથી ઊંચી પ્રતિમા સ્ટેચ્યુ ઓફ યુનિટી ખાતે પણ પ્રવાસીઓનો ભારે ધસારો રહ્યો હતો. કેવડિયા સ્થિત આ પ્રવાસન સંકુલમાં 5.57 લાખથી વધુ પ્રવાસીઓ પહોંચ્યા હતા. અહીં મુલાકાતીઓની સંખ્યામાં ગત વર્ષની સરખામણીએ 32.35 ટકાનો વધારો નોંધાયો છે.

આ ઉપરાંત, જૂનાગઢના ગિરનાર રોપ-વે ખાતે 48,800થી વધુ પ્રવાસીઓએ મુલાકાત લીધી હતી, જે 25.3 ટકાનો વધારો દર્શાવે છે. ઐતિહાસિક નગરી વડનગરમાં 62 હજારથી વધુ પ્રવાસીઓ પહોંચ્યા હતા. જ્યારે કચ્છના ભુજ સ્થિત સ્મૃતિવન મેમોરિયલ ખાતે પણ 25 હજારથી વધુ મુલાકાતીઓ નોંધાયા હતા.

પ્રવાસન સુવિધાઓના વિકાસથી ગુજરાત બન્યું પસંદગીનું સ્થળ

ગુજરાતનાં આઠ મુખ્ય પ્રવાસન સ્થળો પર નોંધાયેલા આ આંકડા દર્શાવે છે કે રાજ્યમાં ધાર્મિક પ્રવાસન સાથે ઐતિહાસિક વારસો, સાંસ્કૃતિક ઓળખ, પ્રાકૃતિક સૌંદર્ય અને આધુનિક પ્રવાસન આકર્ષણો પ્રત્યે પણ લોકોનો રસ વધી રહ્યો છે. રાજ્ય સરકાર દ્વારા પ્રવાસન સ્થળો પર માળખાકીય સુવિધાઓનો વિકાસ, પ્રવાસીઓ માટેની વ્યવસ્થાઓ અને સુવ્યવસ્થિત સંચાલન પર આપવામાં આવેલા ભારને કારણે પ્રવાસન ક્ષેત્રને નવી ગતિ મળી છે.

દિવાળીના તહેવારો દરમિયાન નોંધાયેલો આ અભૂતપૂર્વ પ્રવાસી પ્રવાહ માત્ર પ્રવાસન ક્ષેત્રની સફળતા જ નહીં, પરંતુ સ્થાનિક અર્થતંત્ર, હોટેલ ઉદ્યોગ, પરિવહન, વેપાર-ધંધા અને રોજગારીની તકો માટે પણ સકારાત્મક સંકેત છે. ગુજરાતનાં યાત્રાધામો અને પ્રવાસન સ્થળોની વધતી લોકપ્રિયતાએ રાજ્યને દેશના અગ્રણી પ્રવાસન કેન્દ્ર તરીકે વધુ મજબૂત ઓળખ અપાવી છે.

Leave a Reply

Your email address will not be published. Required fields are marked *