આદિજાતિ ખેડૂતોને હવે રવિ પાકમાં પણ બિયારણ-ખાતરની સહાય મળશે: 48,190 ખેડૂતોને લાભ આપવાનો નિર્ણય

Spread the love
  • મુખ્યમંત્રી ભૂપેન્દ્ર પટેલે કૃષિ વૈવિધ્યકરણ યોજનાનો રવિ ઋતુમાં પણ અમલ શરૂ કરાવ્યો.
  • રાજ્યના આદિજાતિ વસ્તી ધરાવતા 14 જિલ્લાઓમાં બિયારણ અને ખાતરની કિટનું વિતરણ શરૂ.
  • વર્ષ 2012થી અમલી યોજનાનો અત્યાર સુધીમાં 15.70 લાખ આદિજાતિ ખેડૂતોને લાભ મળ્યો.

ગાંધીનગર

ગુજરાતના આદિજાતિ ખેડૂતોની આવક વધારવા અને ખેતીને વધુ પ્રોત્સાહન આપવાના હેતુથી રાજ્ય સરકારે મહત્વપૂર્ણ નિર્ણય લીધો છે. રાજ્ય સરકાર દ્વારા અમલમાં મૂકવામાં આવતી કૃષિ વૈવિધ્યકરણ યોજનાનો લાભ હવે આદિજાતિ ખેડૂતોને ખરીફ ઋતુની સાથે રવિ ઋતુમાં પણ મળશે. આ નિર્ણયના પરિણામે ખેડૂતોને રવિ પાકની વાવણી માટે પણ બિયારણ અને ખાતરની સહાય ઉપલબ્ધ થશે. ચાલુ વર્ષ 2026-27માં રાજ્યના 48,190 આદિજાતિ ખેડૂતોને આ યોજનાનો લાભ આપવાનું આયોજન કરવામાં આવ્યું છે.

જનજાતિય કલ્યાણ યોજના અંતર્ગત કૃષિ વૈવિધ્યકરણ યોજના (રવિ ઋતુ)નો અમલ શરૂ કરી દેવામાં આવ્યો છે. રવિ પાક માટે સહાય મેળવવા પાત્ર આદિજાતિ ખેડૂતો પાસેથી અરજીઓ મંગાવવામાં આવી હતી. અરજી પ્રક્રિયા બાદ પસંદગી પામેલા ખેડૂતોને બિયારણ અને ખાતરની કિટ આપવામાં આવશે. રાજ્યના આદિજાતિ વસ્તી ધરાવતા 14 જિલ્લાઓમાં કિટ વિતરણની શરૂઆત પણ થઈ ગઈ છે.

2012થી અત્યાર સુધી 15.70 લાખ ખેડૂતોને લાભ

ગુજરાત સરકાર દ્વારા વર્ષ 2012માં આદિજાતિ ખેડૂતો માટે કૃષિ વૈવિધ્યકરણ યોજના શરૂ કરવામાં આવી હતી. આ યોજના પાછળનો મુખ્ય ઉદ્દેશ આદિવાસી વિસ્તારોમાં ખેતીની ઉત્પાદકતા વધારવાનો, ખેડૂતોનો ખેતી ખર્ચ ઘટાડવાનો અને પરંપરાગત પાકની સાથે વૈકલ્પિક પાકોના વાવેતરને પ્રોત્સાહન આપવાનો છે. અત્યાર સુધીમાં આ યોજના હેઠળ 15.70 લાખ આદિજાતિ ખેડૂતોને લાભ આપવામાં આવ્યો છે.

વર્ષ 2022-23થી ખરીફ ઋતુમાં મગફળી, સોયાબીન, જુવાર, ડાંગર, રીંગણ, અડદ, તુવેર, રાગી (નાગલી), ભીંડા અને બાજરી જેવા પાકોમાંથી કોઈ એક પાકના બિયારણની સહાય આપવામાં આવે છે. પસંદ કરેલા પાક મુજબ એક એકર જમીનમાં વાવેતર માટે જરૂરી બિયારણ અને ખાતરનો જથ્થો પૂરો પાડવામાં આવે છે.

જિલ્લાવાર પાક પ્રમાણે બિયારણ અને ખાતરની કિટ

રવિ ઋતુની યોજનામાં જિલ્લાઓની ભૌગોલિક અને ખેતીલક્ષી પરિસ્થિતિને ધ્યાનમાં રાખીને પાકની પસંદગી કરવામાં આવી છે.

બનાસકાંઠા, સાબરકાંઠા, અરવલ્લી, મહિસાગર, પંચમહાલ, દાહોદ અને છોટાઉદેપુર જિલ્લામાં ખેડૂતોને ઘઉં, ચણા અને મકાઈ પૈકી કોઈ એક મુખ્ય પાકનું બિયારણ આપવામાં આવશે. તેની સાથે ટામેટા, ભીંડા અને રીંગણનું બિયારણ પણ મળશે.

જ્યારે નર્મદા, ભરૂચ, સુરત, નવસારી, તાપી, વલસાડ અને ડાંગ જિલ્લામાં મુખ્ય પાક તરીકે ભીંડા, ટામેટા, દૂધી અને કાકડી (કુકંબર)ના બિયારણની સાથે રીંગણ અને બ્રોકલીનું બિયારણ આપવામાં આવશે.

બંને જૂથના જિલ્લાઓમાં બિયારણ ઉપરાંત પ્રોમ (PROM)ની 50 કિલોની એક બેગ, એમોનિયમ સલ્ફેટની 50 કિલોની એક બેગ તથા એન.પી.કે. કોન્સોર્ટિયાની એક બોટલ ખાતર તરીકે આપવામાં આવશે.

તાલીમથી લઈને માર્કેટ લિંકેજ સુધી માર્ગદર્શન

યોજનાનો લાભ મેળવનારા ખેડૂતોને માત્ર બિયારણ અને ખાતર પૂરતાં જ નહીં, પરંતુ ખેતી અંગેની તાલીમ, માર્કેટ લિંકેજની સેવાઓ અને ફોન તથા મેસેજ મારફતે જરૂરી માર્ગદર્શન પણ પૂરું પાડવામાં આવશે. આ વ્યવસ્થાથી ખેડૂતોને પાકની ખેતીથી લઈને તેના વેચાણ સુધી ઉપયોગી સહાય મળી રહેશે.

ઓનલાઇન પોર્ટલથી પ્રક્રિયા પારદર્શક બની

ખેડૂતોને યોજનાનો લાભ મેળવવા સરકારી કચેરીઓના ધક્કા ન ખાવા પડે અને પસંદગીની પ્રક્રિયા ઝડપી તથા પારદર્શક બને તે માટે આદિજાતિ વિકાસ વિભાગે ઓનલાઇન પોર્ટલ વિકસાવ્યું છે. નાણાકીય વર્ષ 2022-23થી આ પોર્ટલ રાજ્યના તમામ આદિજાતિ જિલ્લાઓમાં કાર્યરત છે. અરજીથી લઈને લાભની મંજૂરી સુધીની પ્રક્રિયા ઓનલાઇન કરવામાં આવી હોવાથી ખેડૂતો માટે યોજનાનો લાભ મેળવવો વધુ સરળ બન્યો છે.

રવિ ઋતુમાં પણ યોજનાનો વિસ્તાર કરવામાં આવતા આદિજાતિ ખેડૂતોને વર્ષમાં બે ખેતીની ઋતુમાં સહાય મેળવવાની તક મળશે. આ પહેલથી આદિવાસી વિસ્તારોમાં કૃષિ વૈવિધ્યકરણ અને ખેડૂતોની આવક વધારવાના પ્રયાસોને વધુ વેગ મળવાની અપેક્ષા છે.

Leave a Reply

Your email address will not be published. Required fields are marked *