બ્રેકઅપની વાતથી નારાજ પ્રમિકાનો પ્રેમી પર ચપ્પુથી હુમલો

પોલીસને પણ આ ઘટના અંગે જાણ કરાઈ અને બાદમાં પ્રેમિકા પૂનમ વિરૂદ્ધ આઈપીસી સેક્શન 324 હેઠળ ગુનો નોંધવામાં આવ્યો હતો

અમદાવાદ

અમદાવાદ શહેરમાં પ્રેમિકાએ બ્રેકઅપની વાતથી નારાજ થઈ પ્રેમીને ચપ્પાનાં ઘા માર્યા હોવાની ઘટના સામે આવી છે. આમ જોવા જઈએ તો લવમાં બ્રેકઅપ અને પેચઅપ સામાન્ય વાત બની ગઈ છે. પરંતુ સમય પસાર થતા હવે જો પ્રેમી કે પ્રેમિકા હદો વટાવી નાખે તો મામલો વધારે સિરિયસ પણ થઈ શકે છે. કેટલાક પ્રેમીઓ પ્રેમથી છૂટા પડે છે તો કેટલાક આવી રીતે ક્રાઈમના રસ્તે ચઢી જાય છે. વસ્ત્રાલમાં આવો જ કિસ્સો બન્યો છે.
પ્રેમિકાએ ફોન કરી પ્રેમીને કહ્યું કે ઘરે કોઈ નથી તું જલદીથી અહીંયા આવી જજે. આ દરમિયાન પ્રેમી હતો તે પણ વ્હોટ્સએપ કોલ પર જવાબ આપવા લાગ્યો કે સારુ હું આવી જવું છું. આ સમયે બંને કપલે એકબીજા સાથે વાતચીત કરવાનું મન બનાવી લીધું અને ઘણી સિરિયસ વાતો પણ એકબીજા સાથે કરી હતી. છેલ્લા ઘણા વર્ષોથી આ બંને એકબીજા સાથે રિલેશનશીપમાં હતા. અહેવાલ પ્રમાણે 33 વર્ષીય વિશાલ પટેલ બાપુનગરનો રહેવાસી હતો. તેવામાં તે વસ્ત્રાલમાં રહેતી પૂનમ પટેલ સાથે રિલેશનશિપમાં આવ્યો હતો.
પૂનમે વ્હોટ્સએપ કોલ કર્યો અને તેના બોયફ્રેન્ડ વિશાલને ઘરે મળવા માટે બોલાવ્યો હતો. મીડિયા રિપોર્ટ્સ પ્રમાણે છેલ્લા ઘણા દિવસોથી તેમના સંબંધોમાં ખટાશ આવી હતી અને ચઢાવ ઉતાર ચાલી રહ્યા હતા. તેવામાં બંને એકબીજા સાથે વાતચીત કરવા માગતા હતા જેથી કરીને ત્યાં મળવાનો પ્લાન બનાવ્યો હતો. આ સમયે બંને વચ્ચે ઘરે ઉગ્ર બોલાચાલી થઈ અને પછી અચાનક વાત વાતમાં વિશાલે બ્રેકઅપ કરી રહ્યો છું એવી વાત જણાવી દીધી હતી.
વિશાલે કહ્યું કે મારે હવે આ સંબંધ રાખવો જ નથી. આ દરમિયાન પૂનમ ગુસ્સે થઈ ગઈ અને ઊગ્ર વાતચીત કરવા લાગી હતી. બંને વચ્ચે બબાલ થઈ અને યુવતીને એટલો ગુસ્સો આવી ગયો કે તેણે કાબૂ ગુમાવી દીધો અને ચપ્પુ લઈ બોયફ્રેન્ડ પર હુમલો કર્યો હતો. આ દરમિયાન તેણે હાથનાં ભાગ પર 2 વાર ઊંડા ઘા કર્યા. જમણા અને ડાબા એમ બંને હાથ પર પૂનમે હુમલો કરી દીધો હતો. હવે બોયફ્રેન્ડ ગભરાઈ ગયો અને બચાવ માટે બુમા બુમ કરવા લાગ્યો હતો. તેણે કહ્યું કે મને બચાવો બચાવો.
યુવક પર હુમલો થયો હતો અને તે ઘાયલ હતો તેવામાં બચાવ માટે તેણે બૂમો પાડતા પાડોશીઓ આવી પહોંચ્યા હતા. તેના માથાના ભાગ પર અને હાથ પર ઈજા પહોંચી હતી. આ જોઈને પાડોશીઓ પણ બે ઘડી ગભરાઈ ગયા અને બાદમાં તેને હોસ્પિટલ ખસેડવા માટેનું પ્લાનિંગ શરૂ કરી દીધું હતું. હવે બોયફ્રેન્ડની આવી હાલત કર્યા પછી ગર્લફ્રેન્ડ ગભરાઈ ગઈ અને ત્યાંથી દૂર ભાગી ગઈ હતી. અમદાવાદ સિવિલ હોસ્પિટલમાં ત્યારપછી વિશાલને સારવાર માટે પહોંચાડાયો હતો અને તેની ટ્રિટમેન્ટ પણ શરૂ કરી દેવામાં આવી હતી.
અત્યારે પોલીસને પણ આ ઘટના અંગે જાણ કરાઈ અને બાદમાં ફરિયાદ નોંધવામાં આવી હતી. પૂનમ વિરૂદ્ધ આઈપીસી સેક્શન 324 હેઠળ ગુનો નોંધવામાં આવ્યો હતો.