ભારતના ગ્રીડ ઈન્ફ્રાસ્ટ્રક્ચરને મજબૂત બનાવવા સાથે 1,000થી વધુ રોજગારીની તકો સર્જાશે
વડોદરા
વૈશ્વિક વિદ્યુતીકરણ ક્ષેત્રની અગ્રણી કંપની હિટાચી એનર્જીએ ગુજરાતના વડોદરા જિલ્લાના કરજણ ખાતે નવા લાર્જ પાવર ટ્રાન્સફોર્મર (LPT) પ્લાન્ટની સ્થાપના માટે અંદાજે રૂ. 2,000 કરોડના રોકાણની જાહેરાત કરી છે. આ પ્રોજેક્ટ ભારતના ઊર્જા માળખાને મજબૂત બનાવવા તેમજ વધતી વીજળીની માંગને પહોંચી વળવા મહત્વપૂર્ણ સાબિત થશે.
ઊર્જા ક્ષેત્રની વધતી જરૂરિયાતને મળશે બળ
કેન્દ્રિય વિદ્યુત પ્રાધિકરણ (CEA)ના અંદાજ મુજબ વર્ષ 2035 સુધીમાં 900 ગીગાવોટથી વધુ સ્વચ્છ ઊર્જાને ગ્રીડ સાથે જોડવા માટે વિશાળ ટ્રાન્સમિશન ઈન્ફ્રાસ્ટ્રક્ચરની જરૂર પડશે. ગ્રીડ વિસ્તરણ, ડેટા સેન્ટરોની વધતી સંખ્યા અને ઉદ્યોગોના ઝડપી વિદ્યુતીકરણને કારણે લાર્જ પાવર ટ્રાન્સફોર્મર્સની માંગ સતત વધી રહી છે. હિટાચી એનર્જીનો નવો પ્લાન્ટ આ જરૂરિયાતોને પૂર્ણ કરવામાં મદદરૂપ બનશે.
‘મેક ઇન ઇન્ડિયા’ને મળશે વેગ
નવો પ્લાન્ટ ગુજરાતમાં કંપનીના હાલના ટ્રાન્સફોર્મર ઉત્પાદન એકમોને પૂરક બનશે. સાથે જ મૈસુર અને હાલોલ સ્થિત સુવિધાઓ સાથે મળીને સ્થાનિક ઉત્પાદન અને સપ્લાય ચેઇનને વધુ મજબૂત બનાવશે. આ રોકાણ ભારત સરકારની ‘મેક ઇન ઇન્ડિયા’ પહેલને પણ પ્રોત્સાહન આપશે.
આધુનિક ટેક્નોલોજીથી સજ્જ પ્લાન્ટ
FY28 સુધીમાં પૂર્ણ થનારા આ પ્લાન્ટમાં સ્માર્ટ મેન્યુફેક્ચરિંગ અને અદ્યતન ડિજિટલ ટેક્નોલોજીનો ઉપયોગ કરવામાં આવશે. પ્લાન્ટ LEED પ્રમાણપત્રના ધોરણોને અનુરૂપ તૈયાર થશે, જેમાં ઊર્જા બચત, સંસાધનોનો કાર્યક્ષમ ઉપયોગ અને પર્યાવરણ સંરક્ષણ પર વિશેષ ભાર મૂકવામાં આવશે. અહીં ઉત્પાદિત ટ્રાન્સફોર્મર્સ હાઈ-વોલ્ટેજ ટ્રાન્સમિશન, HVDC પ્રોજેક્ટ્સ, AI ડેટા સેન્ટર્સ અને મોટા ઉદ્યોગોની જરૂરિયાતોને પૂરી કરશે.
રોજગારી અને વિકાસને પ્રોત્સાહન
હિટાચી એનર્જી ઇન્ડિયા લિમિટેડના મેનેજિંગ ડિરેક્ટર અને CEO એન. વેણુએ જણાવ્યું હતું કે આ રોકાણ ભારતના ઊર્જા ક્ષેત્રના ભવિષ્યમાં કંપનીના વિશ્વાસનું પ્રતિબિંબ છે. પ્રોજેક્ટ દ્વારા 1,000થી વધુ પ્રત્યક્ષ અને પરોક્ષ રોજગારીની તકો ઊભી થશે. કંપનીના જણાવ્યા અનુસાર આ પ્લાન્ટ ભારતની આત્મનિર્ભરતા, ઔદ્યોગિક વિકાસ અને સ્વચ્છ ઊર્જા પરિવર્તનના લક્ષ્યોને વધુ ગતિ આપશે.
